dijous, 25 de juny de 2009

Nosautras tanben i anèrem a Cotlliure!

Ten, ne profechi que lo Peiroton nos mòstra sas fòtos nocturnas de Cotlliure per vos mostrar la sesilha qu'ensagèrem de far amb la Marieta.
tot comencèt per "fasèm una fòto de pès amb lo chin", ok:

pas ganhat...
LaRòta voliá pas. Vai te'n li explicar un concèpte bloguesc completament con "te deves metre drecha sus la pobèla, nosautras, metèm los pès, e fasèm la fòto". Moè. LaMarieta, pacienta, esperava:
Lèva lèva lèva la camba...

Davant la non-cooperativitat de LaRòta, tornèrem a las valors seguras:

Man catalana davant quequeta de pèira dins quadre.

dimecres, 24 de juny de 2009

Commis d'office




Dins l'encastre del Festenal Internacional del Roman Negre, dins mon polit cinèma de FRontinhan, i aviá la projeccion de Commis d'Office.
L'aficha es pas gaujosa e i anavi sens me faire d'ilusions.
Putan, me regalèri.


Seguissèm un avocat, Lahoud (jogat per Roschdy Zem, remirable dins lo ròtle... puèi ne fariái plan mon dimenge, avètz son numèro? li podètz donar lo mieu? ), que galèra, que ganha pas un sòu, que sos solets afars son los afars de "comés d'ofici" (sabètz, los avocats donats automaticament al mond que se pòdon pas permetre de se'n pagar un) que l'estat li dona per aquò 300€ per cas... Galèra, mas crei a son mestièr, a la morala, a la justícia e l'ajuda als mai modèstes. E la primièra partida del film retracha (existís aqueste vèrb?, me'n bati, l'inventi) lo quotidian d'un avocat "precari". Qué? Se'n foton pas totes plen las pòchas? Rotlan pas totes en berlina alemanda. e ben non. wow. (me caldrà far mèfi lo còp que ven quand sus meetic lo tipe me farà "soi avocat"... coma qué, lo vestit fa pas lo sòu). Lahoud es lo bon costat de la fòrça, puèi rescontrarà la fòrça escura, un avocat desgulassa que s'emplena las pòchas e los comptes en Soïssa... e aquí comença l'aventura.
Veguèri pas lo temps passar, ieu que sovent al cap de 50 minutas, me demandi s'acabarà lèu (lo cort metratge es estat inventat per ieu). Es leugièr tot en trachar un tèma pas gaujós, amb tot plen d'umor. Pensavi pas d'i rire tant a aqueste film... los que me coneisson diràn "moè, tu e ton umor a la con", ben non, perque los autres dins la sala risián tanben.
Una bona suspresa, qué!

La banda anóncia:

A oè, e ai oblidat de vos dire que la musica, e ben es tant bona coma l'actor principal...




Una entrevista de la realizatritz, avocata, que deviá venir a Frontinhan, mas venguèt pas, daumatge:
Mai d'informacions sul film





Quicòm mai:
Un avocat comés d'ofici, es quicòm qu'exitís dins totes los païses o sonque en França?
Quauqu'un me pòt dire cossí se ditz en espanhòl?

dimarts, 23 de juny de 2009

Star Wars: la lebreta







S'avètz visitat lo Lupanar de Pompèi, lo guide vos aurà dich que la lebreta en latin aquò se ditz coitus more ferarum (anatz quèrre vòstre Gaffiòt).







E s'àvetz la costuma de telecargar ilegalament de films porcassièrs, sauretz que en anglés, akò se ditz doggy style.



Quauques temps fa, vos demandavi cossí se disiá en òc. Ben finala, se ditz coma en francés, la lebreta... Cossí o ai descobèrt?
E ben, la coneisses pas la cançon?

La lebreta




Los dessenhs son d'Albert Dubout per l'ilustracion del Kama
Sutra
.
La video es de Philippe Vialard.

dilluns, 22 de juny de 2009

Fèsta del cinèma abans l'ora

Me soi facha una dimenjada cinèma!
Aquò me prend de quora en quora...






Vengeance. de Jonhhie To amb Johnny halliday. De chineses que se tiran dessús, una realisacion que m'agradèt fòrça, plena de ralentis, de vent e de musica. Johnny es pas mal dedins, mas quand meme, aviái totjorn l'impression qu'anava cantar "toute la musique que j'aimeuh..." Los actors chineses mafioses, genials. M'agradèt plan, regreti d'o aver vist en Vf (coma de costuma...).






Confessions of a shopalcoholic, un film per las dròllas american, coma o sabon faire, ont rises (fòrça), ploras (un pauqueton) e a la fin s'aiman e capitan e tot acaba plan. N'aviái de besonh de veire un film leugièr. Agradiu. Lo film que lo veses, passas un bon moment e te'n sovenes pas al cap de 2 jorns. L'actritz es polida que non sai. Un visatge polit, natural, sabiái pas qu'aquò existissiá a Hollywood

Urosament, n'aviái pas vist la reclama que tot lo film i es dedins... coma sovent!Es l'adaptacion d'un libre, del meteis títol, se quauqu'un l'a, soi clienta!
ben òc, los libres de la mena de Bridget m'agradan,so what?!?








Los abrazos rotos, Almodovar, dins tot son art. Qu'es fòrt la puta. I anèri que sabiái pas de qué parlava, sabiái sonque que i aviá Penelope Cruz dedins (mon dieu qu'es polida quand vira amb Almodovar.. ).
De pas mancar se vos agrada son estil, son biais de faire, son biais de contar sas istòrias. Sai pas se la fin fin del film m'agrada, m'i cal soscar encara. En tot cas, vos ne parlarai mai longament. Benlèu que i tornarai lo veire. Los films d'Almodovar, aquò m'agrada de los veire e de los tornar veire.







Rachel Getting Maried, pas vist... Èri la sola clienta dau cinèma en causa de la fèsta de la musica, projeccion anulada. Lo polit projeccionista me diguèt qu'èra trist e que mancavi pas grand causa.



Pel monde que vivon en França, es la fèsta dau cinèma pendent una setmana dau 27 de junh au 3 de Julh, una plaça crompada, las autras a 3€. Regalatz-vos!!!

diumenge, 21 de juny de 2009

Aventura extrèma: Miston dins la Kagona


- Alò, kò vai?
- Bon dieu, non, ai tròp de trabalh, ne pòdi pas mai, n'ai mon confle. M'agradariá de faire mon òrt, mon paure òrt dins mon Cantal.
- E ben, vaizi dins ton Cantal, colha!!
- A ben non, amb la rota, la lassièra, pòdi pas.
- E se te meni ieu?

E menèri laBelaValenta a son ostal cantalés.
Aquò's la version corta.
E poiram acabar aquí.
Mas non, i a una version longa.

La version longa comença per "e menèri laBelaValenta e son cat a son ostal cantalés".

Amb maRòta, tot es aisit. Fau la valisa, me seguís de longa, que l'anèsse pas doblidar a l'ostal! Quand dubrissi l'autò, "sauta!".Sauta, vira en redond 3 o 4 còps dins lo còfre de l'autò, s'ajaça en redond , e fai tirar Marius, mar o montanha, autorota o vila, RDV dins 3 oras quand se dirà "oooo, es un pauc longa la siesta, quora jogam a la bala?". La vida es polida amb un chin. Mas amb una puta de cat... (demandatz a la Fadarela! )


Tot comencèt a 08h30 dau matin qu'esperèri 1/4 d'ora laBelavalenta en bas de son ostal. "encara al telefòn a sauvar lo mond". Tu parles Charles, monsur lo cat s'èra amagat. Rai.
Meti la gàbia dau gat (òc, FAdarela, la belavalenta a una gàbia ela) suls sètis de darrièr. E zo!
Miaaaaaaaaaaaaaaaaaaaau
Miaaaaaaaaaaaaaaaaaaaaaaaaaaau
Miaaaaaaaaaaaaaaaaaaaaaaaaaaaaaaaaaaaaaaauuuuu!.
ieu, que m'agrada d'escotar lo silenci de mon motor: Va miaular fins a Sant-Flor?
ela, fisançosa e 30Millionsd'AmisInside: Non non, s'arrestarà un pauc sus l'autorota puèi aprèp tornarà començar e aquí racarà. A la puta de bèstia: È, mon Miston, que racaràs?
ieu, fastigada È? Racarà? È? Es programat? (votz off: dins mon autò tota polida, neta e netejada cada jorn? e ai quitament pas mes un pauc de jornal jos la gábia d'aquela puta de gat que en mai de bramar tot de long va racar. Mas quinas putas de bèstias!! bon, espèri que se cagarà pas dessús. )

A75.
Lo cat dormís. Racarà pas. Puèi amb un pauc d'astre, aurà pas manjat, a l'estomac vuèg.
E l'A75 comença de virar...
Miaaaaaaaauraaaaaaaaaaaaaau
Miaaaaaaaauraaaaaaaaaaaaaaaaaaaaaaaau
Miaaaaaaaauuuuuuuuraaaaaaaaaaaaaaaaaaaaaaaauuuuu
ela - A!, va racar dins pas gaire, miaula aital just abans de racar.
A ben soi urosa d'o saber ten...
Blllaaaaaaaaaaaaaaaarpppppp kof kof.
ieu - A, es fach!
E començam de montar lo Pas de l'Escaleta. Per los que coneisson pas, es la còsta que te fa montar de la plana al Larzac. Es una còsta de 25%, al mens, amb tot plen de viradas.
- Arrèsta-te aquí! Vau netejar la gàbia.
- A non, m'arrèsti pas aquí, au mitan de res, en plena còsta!!! I a l'aira dau Cailar dins 5 minutas, podrà plan esperar 5 minutas, òu!

Mas lo Pas de l'Escaleta, aquò vira...
E la gàbia, e ben l'aviái pas plan cunhada... e la gàbia... enfin avètz comprés qué, rodèt, anèt d'una pòrta a l'autra... amb lo cat dedins... e son vòmit....

nos arrestèrem sus l'Aira dau Cailar.
estonada - È? as pas de sacas de plastica ni d'aiga ni de papièr per netejar quand lo cat raca?
- Ben, non, mon chin raca pas jamai.

E sortiguèrem la bèstia fèra de sa gàbia... de son shaker.

Ai vergonha... mas ... èri mòrta de rire.





Alara, vos vesi arribar amb vòstra carta de 30millionsd'amis, pas de melodrama, es pas mòrta la bèstia! Nos arrestèrem per picanicar, e agachatz-lo coma semblava pas tant traumatizat:





E la galejada dau jorn:
- C'est quoi un chat dans un arbre?
C'est un chat de moins sur terre.



Mas, catofils e catofilas legeires dau blòg, regaudissètz-vos, Miston se venguèt al tornar.



.

Aquí, sabèm faire l'amor

Profechi que K ne parla per o dire que i èri ieu tb al concèrt de Chin na na poun a Montpelhièr! E aquò me faguèt cercar mon CD dins mon bordel, dins ma bibliotèca, dins ma CDtèca, l'ai botat dins l'ordenador, e vos ne meti una cançon.
Alara Chin na na Poun, a la debuta, cantavan mai que mai de poèmas de cançons de Victòr Gelu, ara an alargat lo repertòri... a ieu, m'agradan mai las cançons de GElu, rai.
La cançon que vos meti, es "Martèu" que m'agrada aquesta cançon. Perqué? Ben m'agrada de pensar que Gelu èra un amator dau fist fucking. Cf lo repic... "Que volètz? Siáu un capon! Fau l'amor a còps de ponh."



Martèu

Mon capolier, Mestre Ouraci,
Mi dis: Martèu, paure enfant,
As una fotuda gràcia
A costat dei femelams:
Quand Citè
Vò Zovè
Ti quiston quauquei babetas,
Tu li vas garçar de coetas!...
- Que volètz? Siáu un capon!
Fau l'amor a còps de ponh.

Ieu que vivi dins la fanga,
Estent curaire de potz,
M'istariá ben de far la langa
Coma un lisquet d'amorós!...
Diatz: Martèu,
Que borrèu!
Totjorn peçuga e bostiga,
Tuerta, quicha, mòrde, embriga...
- Que volètz? Siáu un capon!
Fau l'amor a còps de ponh.

Sabètz ben qu'emé d'estopas
Si fa ges de tafetàs
Ai l'uelh modorro que copa,
Lo gousier plen de tartar;
Ai lo gest
De l'envers,
La pèu negra e l'arpa ruda;
Siáu pus brut que mei cornudas;
- Que volètz? Siáu un capon!
Fau l'amor a còps de ponh.

Siáu bastard coma mon pèra:
Cu m'auriá mublat lo suc?...
Quand lo fam tueguèt ma mèra,
A doge ans, metiáu dessús:
Ni soliers,
Ni camiás!...
A set ans culhiáu de petas:
A vint, possi lei brovetas.
- Que volètz? Siáu un capon!
Fau l'amor a còps de ponh.

A Jarret, per Pandecosta,
Per Pascas, lòng dau Bachàs,
Dins lei ronds m'onte si gosta
Vau debauçar lo frecàs!
Per Sant Joan,
A Malhan,
Vau apalhar leis aleias
De ginestas e de panseias...
- Que volètz? Siáu un capon!
Fau l'amor a còps de ponh.

Per derrabar la cacilha,
Sensa li dire: oublisè!
A la filha pas tant filha
Que creida: fenissètz! Fètz!
Un neblat
Pòu molar;
Mai un ferri de cervèla
Bèu qu'ave: grego! Bacèla!...
- Que volètz? Siáu un capon!
Fau l'amor a còps de ponh.

Ieu diriáu: « Madameisela,
Crèsi que m'avètz enmascat:
Si pòu-ti r'estre tant bèla!
Ve! Siáu òme a ne'n brecar!
Li vieu blu
Mangi plus;
Chasca nuech de vos pantaii,
Se vos vieu passar, varalhi! ... »
- Auça anem! Siáu un capon!
Fau l'amor a còps de ponh.

Ieu diriáu: « Ma santa facha,
Lo tiquetac de mon còr
V'es caucien que se fèm pacha,
N'ai per la vida e la mòrt!
Bòn niní
Sauvatz-mi!
En ponchier cotatz de chapa
Còntra mon potz que s'aclapa!... »
- Auça anem! Siáu un capon!
Fau l'amor a còps de ponh.

Bòn niní fariá l'escota
Au chilar de meis apèus.
Ah tè! La campana es rota:
Vai-ti far rompre, Martèu!
Ti va fau,
Patatòu!
Finholaire de tendressa,
Trauques dins la secaressa!
- Auça anem! Siáu un capon!
Fau l'amor a còps de ponh.

En fent virar ma carrèla,
Quant de còps mi siáu cresut
Qu'un jorn porriam dei piusèlas
Pastissar lei cuou-cousuts!...
Siam estats
D'abetats
De dormir dau temps dei patas!...
Ara qu'a manjon si grata!...
- Que volètz? Siáu un capon!
Fau l'amor a còps de ponh.

Mai espocarà, la flama,
Soncò ven lo gròs pelau!
En chaupinant lei madamas,
Li mostrarem se siam cauds!
Ai menins
De satins
L'escartairar lei membruras,
Ò! De Dieu! Que joissura!...
- Que volètz? Siáu un capon!
Fau l'amor a còps de ponh.

Siáu grossier coma un pan d'òrdi;
Siáu pus feroge qu'un lop;
Mai se grafinhi, se mòrdi,
Es-ti ma fauta, après tot?
M'onte son
Lei leçons
Que m'aurián rasclat la gruelha?
Que s'apren dedins lei sueias?...
Que volètz? Siáu un capon!
Fau l'amor a còps de ponh.

Victòr GELU, Cançons provençalas, Ostau dau País Marselhés.


Podètz trobar totas las cançons de Gelu dins l'edicion que ne faguèt l'Ostau dau País Marselhés amb un libre CD que ne voldrem mai coma aquò :) (mas qu'es escrich tot pichon, la mèrda)

divendres, 19 de juny de 2009

Un pauc de poesia... e de dialectologia

Lo poèta Joan Ives Roièr m'a mandat un mail que me pausavi de questions sus aqueste article "les". E demanda : "Per mon sonet, seriá ben de tornar prendre la version des Temps passats,
en copiat-pegat, que mando pereu : esparnhariá de decas coma lOòm, ò preśencia"
Causa facha , Mossur:


LXXXV



Les cacos dau país dins les cafès tardiers
vènon faire terrassa au bòn de la serada ;
lei veires son vuejats, lei braguetas gonfladas,
la votz ressòna fòrt sota lei marroniers.
La camisa dubèrta, un còr entre-badier,
l'arcòl dins lo sang viu peçuguent les coradas
l'òm se paga lo temps de tornada en tornada :
- E manda-l'i encar'n còp, anem, qu'ei lo darrier !
Sensa donar la man lei flics ne'n fan sa ronda
esperent qu'a la fin s'escolèsse la bonda
per au patron dau bar anar far la leiçon.
Puei dins son ostau vièlh chascun tot solet torna
e mentre lo pantais d'una preséncia s'orna,
lei segas dins la nuech fan sa paura meisson.

Joan-Ives ROIER, Òbras en Rimas, Forcauquier, 1980
e dins Les Temps Passats, Jorn, que podètz comandar aquí.

Alara, de qu'es aqueste "les" vos demandatz totes, e ben la responsa del poeta:

Per la respònsa a la question,
en Forcauqueirés la s ei mantenguda e articulada (quand tomba pas) davans vocala e p, c/q, t,
e vocalisada en i (ò tomba) en tota situacion autra.

Aquò vau per totei lei mots, alevat, dins lo sistèma verbau mai que mai,
una resisténcia de la semantica a la fonetica
(per evitar, per exemple, de confusions entre fas e fai).

La promiera frasa d'aqueu sonet se pronóncia ansin, metent entre parentèsis lei s casudas :

Les cacos(s) dau paí(s) dins les cafè(s) tardiè(rs)
(Encara que aquí la s de país posquèsse de còps resistir.)

Ben entendut, mon escritura a fach la causida de pas rendre còmpte de la totalitat dau fenomène, (deuriáu autrament escriure vos ai dich e voi fau...) ne'n gardent just ce que faliá (les articles e sa familha, lo vèrb èsser) per donar son identitat au parlar.

Ai considerat les autres cas coma relevent de la realisacion orala, que se fai d'esperela un còp lo parlar identificat.

Ai pas notat d'autrei formas localas, coma la quasi-monoftongason de au.
Es ansin qu'un Plauchud, per mai se sarrar dau parlar locau, escriviá ouriai di per auriatz dich, pa per pas etc., ce qu'ei sovent de mau legir.
Per exemple, venguda pòt se prononciar vengua (mai pas totjorn),
ce qu'escriviá eu vengueu, coma pereu recampa per recampadas...
Vuejats, que se tròba aicí, lo prononcièm viuja(ts), etc.

Mai m'aviso que la question anava pas tant luenh, e m'arrèsto.


Mercés Monsur Roier per vòstra responsa e mercés a la Maria-Joana d'aver fach l'intermediari.


Dau còp, lo blòg te pren una auçada culturalo-linguistica que n'ai lo vertigi.


dimecres, 10 de juny de 2009

De qué i a dins mas plantacions anarquistas?

Es un pauc lo pati dins mas plantacions... perque soi pas gaire organisada... Lo canton mai bordelic es aqueste:
Jòc: de qué i a sus la fòto? (al mens 5 causas diferentas)

EDIT:
Òsca al Tavan! (quicòm de veire amb aqueste Taban?):
- las capucinas en flors
- las tomatas anarquistas que, ara, an flors e tomatas
- las bèlas de nuèch
- de blet (es l'erbassa la mai bela, contra la paret)
- non, pas de basilic... son encara de bèlas de nuèch... M'agradariá de n'aver de tant polit de basilic!
alara la cinquena planta de qu'es??
Rai, la caliá veire... es un glaujòl que se'n vei un bocinon de fuèlha sus l'esquèrra.
E los mai vicioses veiràn tanben d'èrba d'agram qu'ensaja de butar jos las bèlas de nuèch.

De qu'as ganhat Tavan? Mon admiracion e ma benvolença... te'n vòli pas qu'aguèsses dich que mon òrt es mal tengut :DDD

E, akò's pas mon òrt (mon paure òrt...), akò's ma cort ont plantèri las flors. De qué i venon brandar las tomatas? E ben, akò's la magia dau compòst :)

divendres, 5 de juny de 2009

E sabètz qu'es aquò?

Quand es pas mai la sason d'o faire, crompi los pqkets de bulbs e los planti, en me dire "veirem de qué sortís. Crompi de pakets amb 100 bulbs de flors diferentas, planti tot akò e cada jorn, agachi la tèrra per veire de qué ne sortís.
E coma soi un pauc cona, escampi lo paket e aprèp, e ben, sai pas cossí se dison las flors...
Sabètz de qu'es aquò coma flor çai sota ?

La flor de drecha en pas passida dona akò: (es plan polida akela)
EDIT: L'anonim gascon dau matin a dich: Iris blu e jaune e Liri. Son fòrts aquestes gascons.

LaRòta en vacanças



Es pas cool ma china?

dimarts, 2 de juny de 2009

Amis de la poésie

Ai recebut un SMS... que tròbi pas de mot per lo qualificar. Agachatz-me aquò:

J'aime ton QI
O ma Mélani
Et meme sans le i
Moi je l'aime aussi



Rouquette e Mistral pòdon anar jogar a la petanca, Rocco fa de poesia.



.