dimarts, 14 de juliol de 2009

bonas vacanças!

Me'n vau luènh d'internet pendent quauques jorns.

Segon l'astre, tornarai debuta o fin d'agost.



Bonas vacanças a totes!!!

dilluns, 13 de juliol de 2009

Los òmes son de pòrcs: Whatever stinks

L'autre jorn èri al cinèma de bòbòs per veire lo darrièr Woody Allen (alucini coma un film de Woody Allen reverta un autre film de woody allen). Al fons de la sala.
Un grandàs se ven assetar a UNA plaça a costat de ieu.
Putan, 150 sètis e lo tipe, li cal venir a costat de ieu.
Rai.
Lo tipe comença de s'escambarlar, estira son braç que fa 1,10m de long e lo pausa sul sèti d'a costat. Aquò fa qu'aviái sos dets dins la cara. Òu, conàs, siás pas sol. L'agach que fissèt sa man foguèt plan eficaç, se la tornèt metre dins la pòcha sa man de viciós...

E aquí, coma a l'ostal, se levèt las cauçaduras.
Ieu tanben las levi mas tongs al cinèma, tot lo mond o fa.
Levat que el, coma es un òme que se crei polit e intelligent perque va veire los films en VO, carga los solièrs del gendre perfièch. Sabètz, las sabatas que meton los cons: de sabatas en cuèr, mas sens caucetas que al cap de 4 passes faches, susan das pès, an caud e se vòlon assetar al primièr bar que i a per beure una cervesa que los farà rotar. Vesètz quinas sabatas vòli dire? Aquelas dels cordilhs de cuèr, que lo cordilh se desfa de longa. Avèm totes un bèl-fraire o un vesin e mai un amic que ne carga. Ieu me demandi totjorn ont las crompan. Benlèu que ne crompèron un estòc a la fin de las annadas 80.

Brèu, vos fau pas un dessenh, aquò pudissiá.
Tòrni far mon agach violent cap a sas extremitats pudifèras e tòrna metre sas sabatas laidas d'ejaculator precòç (SI, i a un rapòrt, ai fach un estudi sociologico-sexual aquí dessús).
Lo lum s'atuda, generic.
E l'odor que monta.
A, la puta!
Mas se pensa qu'es a l'ostal o qué? dins un momenton, se va gratar los colhonets en me demandant un ricard. Òu, soi pas sa femna ieu per suportar sas odors , mèrda.

Mas o sabètz pas, los òmes, que se metètz de cauçaduras tancadas sens caucetas AQUÒ ENGARRONA?!?!?

Mila Dieus, o sabètz pas que al cinèma, sètz pas a l'ostal e que se cal pas gratar los colhons ni levar las sabatas que pudisson?!?!



dimecres, 8 de juliol de 2009

La granhòta: teorias.

Ma granhòta dins lo frigò, vos pòdi dire qu'aquò fa parlar. Sus MSN, parlam pas que d'aquò, e cadun i va de sa teoria.

LaJefa ditz que benlèu dintrèt dins lo frigo qu'èra pas qu'un capgròs sens patas e que venguèt granhòta dins mon frigo. Ieu disi que creisser dins un frigò e passar ton enfància de granhotona dins un frigo, e ben es nul. LaJefa es lo Dickens de las granhòtas.

LoPeiroton ditz que segur que dintrèt dins lo frigo dins d'aliments que metèri. Per exemple, tombèt dins lo saladièr quand manjavi defòra jos mon arbre e veguèri pas res. Moè. E a la teoria de LaJefa, diguèt un capgròs pòt pas evoluir en granhòta dins un frigò. Fa tròp freg. Pas con l'animal (loPeiroton, pas la granhòta).

e ma teoria a ieu?
E ben, me disi que la granhòta deviá èsser dins una ensalada que crompèri al mercat e s'escapèt de la saca un còp la pòrta tancada.
Oè, anam dire aquò.
Me rassegura mai que non pas la teoria de la Granhòta Warrior.

Una autra teoria?

dimarts, 7 de juliol de 2009

Babel onirica

D'escotar CesariaEvora e ben aquò me dona enveja de far l'amor. Comenci de cuolejar e pas res mai me pòt arrestar...





E ben l'autra nuèch, figuratz-vos que ne somièri de la CesariaEvora. Oè!
E dins mon sòmi, èri amb ela dins una apartament luxuós, abans un concèrt sieu e charraviam. Al Cap Vèrd, la lenga oficiala es lo portugués mas lo mond parlan creòl. E dins mon sòmi, sai pas de qué me parlava ela, mas la compreniái e ieu e ben te li parlavi una bolhabaissa linguistica e ela èra mòrta de rire.
E de qué li fasiái parlar a ela? Me parlava lo creòl dau Cap Vèrd? e cossí fau per li far parlar dins mon sòmi una lenga que coneissi pas?
Es complicat aquò.

Sòmii dins tot plen de lengas e mai las que coneissi pas... M'agrada l'idèa.

E vosautres, en quina(s) lenga(s) somiatz?




Bon e coma soi segura que i sètz pas jamai anats, lo sit del govèrn de la Republica de Cap Vèrd, aquò vos cambiarà de youporn.

dilluns, 6 de juliol de 2009

Revelacions sus l'Amorós

Dempuèi lo còp de la granhòta dins lo frigò, me pausi de questions.
Dau còp, me disi qu'es MonAmorósPrincièr que la mandèt per que comprenguèsse qu'èra el mon prince.

Alara, dempuèi aquò, me disi que MonAmorósPrincièr parla la lenga de las granhòtas, es mon HarryPotter a ieu. Soi esmoguda.

De tot biais, o sabiái ja... a una bagueta magica.




Lo primièr que ditz que deu parlar tanben la lenga dels gripauds, li mandi Voldemòrt.
Lo primièr que ditz la calor, aquò's pas bon per ieu, ben aurà rason LOL

diumenge, 5 de juliol de 2009

Lo messatge de la granhòta

Lo Pèire de la Sauma me demanda se li ai fach un poton a la granhòta qu'èra benlèu mon Prince....

La granhòta sul burre.
S'agacham un moment. Ambient musical "duèl de western".

Puèi preni lo burre, amb la granhòta dessús, per l'anar metre defòra (la granhòta, pas lo burre).
E tot de long la granhòta de m'agachar.

E ieu, ai tot plen d'imaginacion. Ai un pauc 5 ans e mièg dins mon cap. M'agradan las istòrias, o cresi tot e soi inocenta complet.
Alara, òc, es vertat, i pensèri que benlèu me li caliá faire un poton a la granhòta. Puèi, quitava pas de m'agachar. Es plan que i aviá quicòm. Sequenon, auriá agachat quicòm mai.

Li faire un poton. E apareissèra mon prince (e m'espotirà lo burre aquel conàs).
Ben non, pas de poton a la granhòta.
L'ai ja mon prince.
Èra benlèu aquò lo messatge de la granhòta dins lo frigo.

dissabte, 4 de juliol de 2009

Ma fèsta dau cinèma

Per la Fèsta dau Cinèma, veguèri:




Coraline, bon dieu que me faguèri cagar! Al cap de mièja-ora, n'aviái mon confle e agachavi lo relòtge de longa. Pas res de nòu jos lo solelh. N'aviái enveja, l'aficha m'agradava.. puèi la referéncia dau Nadal de Jack... Decepcion. Benlèu me fau vièlha e los dessenhs animats m'agradan pas mai?




Notorious BIG, aviái vista la banda anóncia. E qué volètz, lo gangsta rap, los negres bling bling de la Còsta Est o Oèst, e ben aquò m'agrada. De rèstas de mon adolescéncia... Me regalèri grèu. Sesilha de 00h45. Èri la sola dròlla en mièg dels joves... Pecat de la VF (levat las parts cantadas, òu, cal pas desconar).
Mai d'infos





State of PLay, Jeux de pouvoir en francés, amb Russell Crowe. Ok, o avoi, i anèri per Russell Crowe. Vos en sovenètz dins Gladiatòr? Lo mascle tot en susor... E ben aquí, susa pas, fa lo jornalista e enquèsta sus de murtres, a lo pel long e beu. Votz perfiècha en VF. Avètz lo numero del doblaire? Brèu, lo film american que t'i fas pas cagar mas que dins una setmana aurai doblidat.





Very Bad Trip en VF, The Hangover en VO, con que vira, mòrta de rire tot de long :). L'aficha e las bandas-anóncias valon pas un pet mas es la gròssa comedia d'americans :) . Rai, soi dins mon periòde visca los filmes americans :)






La suspresa! Le hérisson. La banda anóncia me donèt enveja d'i anar. E me regalèri de la debuta a la fin. Es una adaptacion del libre L'élégance du hérisson de Muriel Barbery qu'ai pas legit (quauqu'un per lo prestar? o me'n faire present?)



Balasko, se coneis pas de tant qu'es bona e plan maquilhada .La dròlla, es perfiècha, dins son fisic, dins sa votz, dins son biais de parlar (fa una drolleta subreintelligenta, filha de parisencs ricasses). E lo Japonés, li podètz donar mon numero a akeste tanben (Sabiái pas que los vièlhs japoneses m'agradavan. )

Un film que fa rire... mas pas sonque...
E per un còp qu'un film francés es bon, lo cal pas mancar :)



Mai d'infos

Un còp èra, una granhòta dins lo frigò


De granhòtas, al mieu, ne vesi cada jorn. Dins lo potz, enfin, sus l'escala que davala dins lo potz, dins lo valat, pròche del toat, dins los rosièrs, dins las tomatas, dins los geranis... Son las mai urosas del mond, de vèrd, d'ombra, d'aiga. What else? çò diriá George Clooney se foguèsse una granhòta dau mieu.


Mas... Cossí dintrèt dins lo frigo?
Per la pòrta me ditz la Fadarèla.
Rai.
1èra question: Mas cossí faguèt per arribar fins al frigò?
Per arribar al frigo cal montar los escalièrs, cal traversar la terrassa, èrm arid per una granhòta verda, cal que la pòrta de l'ostal siá duberta, cal arribar a la cosina, cal esperar que la pòrta del frigò se dubrisca per i sautar dedins.
I a un autre camin, benlèu mai probable, lo camin dels cats-aquelas-putas-de-bèstias. montar dins l'arbre, seguir la branca fins a la fenèstra dau cagador, sautar per la fenèstra dau cagador que barra pas mai (oè, l'ivèrn, dins mos cagadors fa 5º, comprenètz perque cagui al trabalh, los cagadors i son caufats e dins ma sala de banh fa 12º, mas a mon trabalh i a pas de dochas, e aquí ai pas la causida.), dubrir la pòrta das cagadors (los cats-aquelas-putas-de-bèstias o sabon faire, mas una granhòta?) e sautar dins lo frigò quand preni una Bud un còca.
Putan, ai rescontrat una granhòta warrior e l'ai escampada dins un gerani.



2nda question : E perqué arribar fins al frigò?
La granhòta green warrior seriá interessada pel iaort perimit? Voliá investigar la putrefaccion de la pastanaga abandonada (e ò, avèm totes una pastanaga abandonada al fons del tirador dels legums. QUAL A PAS UNA PASTANAGA ABANDONADA AL FONS DE SON TIRADOR DEL FRIGO???? n'i a quitament que l'an dins son eslip!)

Benlèu, èra un messatgièr del mond del potz...

Benlèu, òc, mas de qué me voliá dire?!?

divendres, 3 de juliol de 2009

Cluedo

L'ora de sopar. Qué manjar? Lo frigò es vuèg, mas lo dubrissi per costuma.
Dins la pòrta, coma tot lo mond, botelhas, mostarda, kectchup, uòus, de burre.

E sul paquet de burre, una granhòta m'agacha.


Mila dieus, cossí a fach la granhòta per arribar dins mon frigò?!?!?!?!?!?!?



Ajudatz-me, ai paur.




(precisi que soi sola a l'ostal, es pas una galejada de mon frairòt o de mon amorós...)

dijous, 2 de juliol de 2009

Au retour de dure prison / Où j'ai laissé presque la vie...





Le corps incarcéré
LEMONDE.FR | 22.06.09

© Le Monde.fr
Dins Le Monde, un reportatge sus la vida en preson.

Polit per la forma, òrre pel fons. Òsca als jornalistas pel trabalh.
Sensibles, passatz vòstre camin, pels autres, es aquí.





E un poèma de Loís Bellaud de la Bellaudièra tirat de son Dòn Dòn infernau
(lo dòn dòn es lo bruch de la campana que ritmava la jornada e la vida das presonièrs)

Luènh de preson a d'amics una ardada,
cascun li fa la granda bonetada,
tant que lo juòc de fortuna li ditz.
Mais si los dats encòntra d'eu si tornan
e que sergents dins aquest luòc l'enfornan,
coma lo fum se pèrdon los amics.

Car la preson dels parents es la pròva
e de l'amic la plus fidèla espròva.
Au temps que siam, tot es dissimulat;
dins la preson tau vos deu, que demanda,
Notatz aiçò per una causa granda:
tots van au bòsc quand un aubre es tombat.

Non es subjèct a tant de japadissas,
a tant de bruch, a tant de clavadissas
a tant de plors que ça renhan tot l'an.
A tant de maus la plus segura sciença
es dau bòn Jòb aver la paciença
per non morir enrabiat coma un can.

Ben es exempt dels torments qu'òm endura
dins las parets d'aquesta preson dura
e subretot dau dòn-dòn esfraiós.
Car tau s'apensa acomplir la jornada
qu'es deçauput quand ven la matinada
e va passar lo fluvi stigiós.

Non es menat dins la fièra cambreta,
ni davant si non vetz d'escabeleta
vonte Minòs li ditz : "assetatz-vos,
çò que fasèm n'es per vos faire omatge.
Sus librament confessatz lo barnatge,
si non lei braç passeràn leis ginós."

Aquí non vetz d'aquela fina tropa,
que l'un son nas embe sa man estopa,
que l'auter escota en messèr Pantalon:
mai si tan pauc la sieu lenga si vira
es menaçat tot subit de l'estira
per li tirar dau còs lo meolhon.

N'es retornat dins l'estància crudèla,
tant estonat de dintre sa cervèla,
qu'un gran de melh li tapariá lo trauc.
Eu cretz desjà si vèire tot en tròces,
car tot subit l'estira peta-òsses
e lo dòn-dòn li redoblan son mau.

Non vetz dintrar la gent escapuchina
per l'exortar a la glòria divina:
au prisonier un senhau tròp catiu.
Davant son temps la tisserana Parca
dins lo vaissèu de Caron non l'embarca
per nos laissar un eternal adieu.

O don eurós e tròp eurós encara
que n'a sentit de preson la fanfara
ni la dolor d'un procès criminau.
Aqueu si pòt dire de la fortuna
lo favorit, que, siá jorn o nuech bruna,
non es subject au virar d'una clau.

Louis Bellaud de la Bellaudière, Lo Dòn-Dòn infernau, strophes 83-91


que l'ai copiat de Baroques occitans, Anthologie de la poésie en langue d'oc - 1560-1660 de Robèrt Lafont, PULM
(i a de nòtas e de comentaris intelligents)


voliái metre la grafia d'origina. Mas GoogleBooks m'a traïda

Lo títol del pòst es la debuta de Chanson de François Villon

dimecres, 1 de juliol de 2009

Galejada dau jorn











L'enterrament a Sabras de Mickael Jackson.




Èra la galejada dau jorn per Quequejaire!