A Besièrs, lo conse d'extrèmadrecha-que-ditz-qu'es-pas-pus-d'extrèmadrecha-solament-ben-a-la-drecha-deladrecha-mas-ques-dextrèmadrecha a ganhat a 65% las eleccions municipalas. Se i apondes, lo 9% del tipe RN, sèm a tres quarts de la populacion que vòtan per l'extrèma drecha.
Dimenge, èri assessora dins mon burèu per la lista d'esquèrra unida. Sèm 6% sus la vila d'aver votat per la lista d'esquèrra. Se i apondèm los vòtes de LFI, arribam pas a 10%.
Me sentissi tan minoritària ! Ai l'impression que totas las personas qu'an votat a esquèrra, e ben, las coneissi : las vesi pels concèrts, a las manifestacions, a las conferéncias, a la botiga biologica. Ai l'impression que las pòdi comptar... e que sèm pas nombroses.
Lo problèma es que las personas que vòtan drecha extrèma, las coneissi tanben. Lor diguèri bonjorn, lor sorriguèri dimenge, lor diguèri bona jornada tot lo jorn. Las crosi cada jorn e las vesi elas tanben pels concèrts, a las conferéncias, a las botigas.
Sus lo Camèl, l'animal totemic de Besièrs, i a de marcat "Sèm fòrça" (sen fouasso). Aquesta devisa, es un pauc coma "Passaràn pas", ben si son passats ! un pauc coma "Siamo tutti antifascisti", ben non, son totes fascistas! e non, sèm pas fòrça, mas eles si, son fòrça.
Aquesta "sèm fòrça" que trobavi tan fòrt e tan polit, uèi m'anequelís.
