Ma bibliotèca

Aquel trentenat de caissas e cartons devon anar emplenar aquò : 

Donatz-me una L,
donatz-me una U,
donatz-me una M,
donatz-me una B,
donatz-me una A,
donatz-me una G,
donatz-me una O!

Per la coregrafia, caldrà passar un autre jorn...

Una idèa?

Vaquí, es fach, an conectada ma tuta a internet! 


Per ara, soi a l'adobar la tuta : destapissar, pintrar e autres plasers que ne vos parlarai quand aurai acabat. 

La granda question : trobaretz cossí seràn las parets de la sala de banh?

Bonas vacanças!

Lo blòg partís en vacanças.

Sabi pas s'aurai internet las setmanas que venon, alara vos desiri a totes un bon estiu, plen de jòia, de sèxe, de musica e de lecturas. 

E nos tornam trobar tre que Orange conectarà ma tuta a l'ADSL!

Francament, what else?

14 jorns per trobar la solucion.

De còps que i a, me trachi que soi un pauc desconectada de mos contemporanèus. 

E uèi, me soi pausada la question del million : an començat los Jòcs Olimpics? Òc, me'n bati completament mas vòli saber. Lo Tour de Rance, o sabi qu'a començat que va passar davant l'ostal lo 14 de Julh e totas las rotas seràn blocadas. Jòia, estrambòrd e tolerància.

Mas los Jòcs Olimpics?

lequipe.fr es mon amic.

E ben non, an pas començat! Començan lo 25.

De res.

lacòlha.fr (pas d'accent sus las adreiças internet!) m'an fach un calendièr e tot:

Pas gaire interessant me diretz.

Mas siiiiiiiii, i a tot plen d'òmes musclats, plens de testoterònas, en susor e a mitat nuses.

O me tròbi un plan-cuol per l'estiu o escampi la television.

Lo Miralh

(d'agachar en plen ecran!)

Se vos agrada, podètz veire darrièr lo miralh.

Pichòt bonaür de la vida...

Al vilatge.
Vau per dintrar a la fornariá.
Un òme ne sortís.
Passi.
Me crida.
"oh, Melania! Ò fant! L'autre jorn parlaviam de tu amb lo Filon".
L'agachi.
Aquel risolet, aquel agach, aquela votz.
La maquina del temps se bota en marcha. 
Es U., lo tipe mai brave de l'escòla. 
El e son fraire èran los braves dròlles de l'escòla. Manhacs, totjorn a rire, totjorn de bona umor. 
Los aimavi grèu a l'epòca. 
Dins la cort, jogavi al balon amb eles. Òc, jogavi amb los dròlles, lor companhiá e lors jòcs m'agradavan mai que los de las dròllas. 
E aquí, èra coma i a vint ans, me parlèt, li parlèri. Ieu que de costuma parli pas gaire al mond de mon atge, aquí me sentiguèri d'aise, tornavi dins la cort a jogar e charrar amb aquel dròlle tant gent. 
A pas cambiat. 
Totjorn tan simpatic. 
E polit coma un astre. 
Me contèt un bocin de sa vida, li contèri un bocin de la mieuna, nos contèrem un bocin de la dels autres. 
Nos trobam quauques punts en comun : lo país, viure al país, l'ostal, la vida, la musica, Mauresca,  far amb çò qu'avèm e prene lo bonur que se presenta.
U. 
U coma urós.
U coma urosa de lo veire. 


Parlam de concèrts. Li doni dos o tres bons plans. 
Dona-me ton numèro, te mandarai un sms per te prevenir.
Escrivi son nom dins lo telefonet. 
Espeti de rire : "a l'escòla, èras totjorn just abans ieu dins las tièras!". S'escacalassa.


Sul papièr, eriam tot pròches un contra l'autre. Es plan un signe aquò, non?

my tailor is coquinàs

Soi nullassa en anglés. 

Mas per un còp que sortissi, compreni plan lo nom dels cocktails.

Mon nivèl d'anglés es jos la cencha.

Soi una STAR

O aviatz remarcat un pauqueton, dempuèi quauques jorns, m'i cresi un pauc, fau la quèca.

Mas ai una bona rason : i a agut un article dels bèls sus mon blòg dins La Setmana. Es la consecracion. Es ma palma d'aur a ieu. 

Tomba plan, es la sason de las sortir las palmas! (musiqueta "galejada poirida" please!).

L'article, es dins lo nº 874, pagina 9, lo vau metre jos veire e lo penjar sus la paret del lièch, aital lo veirai quand farai l'amor.

Se lo vòls legir, pòs telefonar a mon secretari per aver un rendètz-vos per visitar ma cambra, sequenon, lo pòs legir en linha. E se siás abonat a la Setmana, auràs lo plaser d'ausir ma votz. Me soveni pas quinas conariás diguèri, mas ai una excusa : me desrevelhavi. 

E pièger, se siás gascon o tolosan, me pòs ausir a la ràdio.

Granmercegi Aura per aquel article que tot lo mond a qualificat d'"excellent". Lo melhor article de La Setmana dempuèi d'annadas, en tota objectivitat plan segur.

Ara, lo discors, coma per la Palma (la del festenal, pas l'audenca!):

Thank you, oè! My wife I love you 
Plan mercés a totes vosautres legeires, anonims o pas, comentators o muts, istorics qu'eriatz ja aquí en novembre de 2005 o legeires recents, que vòstras visitas regularas m'encoratjan a bloguejar. 
Plan mercés als amics e amigas que me felicitan, que me dison quand aquò truca e que me permeton d'avançar, que siá pel blòg o per la rèsta. 
Aqueste blòg es una peiròta de la preséncia de l'occitan sus la tela, en esperant que venga mai bèla encara. Anem legir, comentar, encoratjar los autres blogaires : lo monta-mametas, l'Andrieu, lo Tam, la Rapieta, lo Joan, la Fadarèla, l'Alan e los autres (cf tièra a drecha). Legiscam en linha e comentem La Setmana, lo Jornalet, Aquò d'Aquí.

E aquí, cadun me fa una standing ovation davant son ordenador.

Cartoon

Lo carton, akò's bon pas que quand es vuèg o pels CDs de Mauresca.





Just per ajudar los incultes a comprene lo pòst precedent e perque aqueste clip m'agrada. Seta mila dieus, WHAT ELSE?