10000 passes palhasses bearneses

Profechèrem de las temperaturas bonas, ni caudas, ni frejas per anar passejar pròche de Pau. Sul sit de l'ofici de torisme, te prepausan un fum de passejadas, totes los itineraris son telecargables a gratis e pòs causir segon çò que vòles : los païsatges, la distància, la dificultat. P e r f i è c h. 

Aquò m'a fach conéisser lo sit ont pòs trapar un fum de passejadas telecargablas : Cirkwi. L'aplicacion sus mon telefonet marcha mal - per pas dire que marcha pas, mas sul sit me regali. Un fum de passejadas , las prepausan los oficis de torisme, sus de passejadas balisadas, aquò m'agrada, aital me pòdi pas perdre. 

Causiguèri la passejada palhassar, que lo nom me plaguèt.

Pròche del parking just abans la còsta regda, i a aquela reclama-termomètre manjada per la platana. La reclama per la tronçonusa manjada per l'arbre, la simbolica m'agrada.

A la plaja

Quand as los melhors amics del mond que vivon sus una iscla, e ben los vas veire, perque los aimas. 

Quand cada estiu as costuma de veire tos amics e que lo mes d'agost avança e los as pas encara vistes e que començan de te mancar grèu, e ben los vas veire, perque los aimas e que son los melhors amics del mond.

Quand as un amorós a temps plen, te tròbas un trauquet de dos jorns dins l'agenda per anar veire los amics qu'aimas e que te mancan tant. 

E lo trauquet, finòta que siás, te lo trapas per lo 15 d'agost. 

E anatz picanicar a la plaja.

E aquí, dobla pena ! 

15 d'agost: un fum de toristas coma cada jorn

15 d'agost : un fum d'autoctòns que profièchan del jorn caumat per anar a la plaja.

Ò fant de lop ! Vaquí a de qué semblava la plaja de S'amarador a Mondragó : 

 Rai, aquò's polit ! 

La bona suspresa :

Te vendon pas de salopariás "chouchoubeignet" mas un tròç de melon, de pasteca o de coco ! #5fruchaselegumsperjorn #santat

10000 passes jol bèth cèu de Pau

I èri anada un parelh de còps a Pau e n'aviái pas servat lo sovenir d'una vila polida de veire... e compreni pas perqué! 

Prenguèrem una mapa a l'ofici de torisme e nos empeguèrem tot lo circuit marcat de las causas de veire. E ben, aquò's plan polit Pau ! 

Puèi, i a un molon de librariás independentas !

E lo dimenge de matin (o lo dissabte, me soveni pas mai!), i a un mercat païsan plan bon e plan bon mercat que me fariá regretar de pas viure a Pau. Non, galegi, cal pas desconar, òu. 

O vos tòrni dire : anatz a Hestiv'òc l'an que ven ! Aquò serà del 23 al 25 d'agost. 

10000 passes pel tertre breton en seguissent un rossinholet

10000 passes, aquò's fòrça per un rossinholet, e mai per un de valent. Alara a un moment, lo rossinholet te fa "me pòrtas?".

(H)estiv(ada)'Oc a Pau

Anètz pas mai a Rodés al mes de julhet, anatz puslèu a Pau al mes d'agost pel festenal Hestiv'Òc! Es mon conselh de l'annada! 

Ongan, la programacion musicala èra chanuda! De l'auçada de çò que poguèt èsser Estivada dins sas annadas bèlas. E puta, que s'i manja plan! 

Aquí dejós

- fòto del concert d'Aqueles, perque Gileta n'es subrefan - a bon gost lo tipe! a la plaça del quiòsque. Quin chale! 

- Lo Bal del Lop amb l'incontornable Guillaume Lopez, istòria de dançar una escotisha amb Gileta e de se ridiculizar en ensajar los sauts bearneses jos las consignas de l'Audenca Exiliada, mercés a ela!!!  

- lo boys band talentuós : lo Còr de la Plana, fasiá moment que los aviái pas vistes e soi totjorn tan fan !

Faguèri pas de fòtos, mas i èri, lo concèrt de Mauresca , lo podètz veire sus Octele. 


Respect a la Police Occitane de Proximitat per sa presa de paraula pendent lo Bal del Lop. 

Vegèri pas tot, luènh d'aquí e de fach e malurosament, i passèrem pas gaire de temps a Hestiv'Òc...  E benlèu ben qu'i tornarai l'an que ven...

Es un succès popular, lo public es mai que mai de mond del país. E es ben agradiu de se passar dins un festenal etiquetat occitan sens i conéisser pas degun. 



 

Caroba

Aguèsse de far un classament dels arbres que m'agradan, lo carobièr seriá dins lo Top 3.

Collecion - Arle

10000 passes per la preistòria

S'Hospitalet Vell 
Aquò's dubèrt, es a gratis, e es un luòc ben agradiu...

10000 passes al Beny Bocage (Calvadòs)

La darrièra passejada normanda, la faguèrem lo 1èr de setembre al Beny Bocage, e aquò èra una passejada de las cranas, la que caliá per acabar las vacanças ! Tot lo percors èra per camins, pas de rota quitranada. La màger part dels camins èran a l'ombra, çò que deu èsser complicat quand la fas l'auton o l'ivèrn la passejada, mas per aquela fin d'estiu sec, eriam plan contents d'èsser a l'ombra de longa.

Dins las causas exoticas que m'agradan de Normandia, i a los bòsques, los arbres grands - benlèu ne metrai de fòtos en linha, veirem ben se n'aurai temps- e los camins : "les chemins creux". Sabiái pas cossí se ditz en occitan, ai cercat, lo diccionari de Rapin me dona "camin enclotat", "camin cau", "camin prigond". Son de camins entre doas randals d'arbres, d'arbres diferents, s'i recaptan las bestiòtas... Çò daumatge es que veses pas gaire lo païsatge, mas çò que veses davant es tan polit...

Lo vilatge es agradiu, beguèrem un panachat al bar-espicariá-estacionservici-pmu-tabat ont i a, graal, un babyfoot. 
Perdèri.
Mas faguèri tant rire la practica del bar a bramar, escridassar, sautar, qu'es tota una victòria. Oè, vertat, me consòli coma pòdi.

10000 passes a las 9 fonts (Lanas)

Parentèsi fòra temps dins lo bòsc de las nòu fonts. Degun a despart d'un pauc d'aiga e de doas tartugas que se solelhavan.