A l'an que ven

Me'n vau!

A l'an que ven!
E se sèm pas mai,
que siagam pas mens!

.

O disi e o tòrni dire: la tecnologia es una puta

I a un quauqu'un que m'aima e qu'a de sòus d'escampar que m'a fach present d'un IPOD, l'ipòd mai polit dau mond mondial, que i a mon nom marcat dessús e tot (me la peti grèu). Ieu disi qu'aqueste quauqu'un que fa present d'un ipod e ben dau còp l'aimi fòrça, òc, ieu vendi ma maire e mon chin per un ipòd. Mas agachatz l'ipòd, es roge, assortit a ma Cagona e a mas sabatas:
enfin lo meu i a pas akesta fòto poirrida, eh.


Brèu.

La question es:
COSSÍ SE MONTA LO SON , BORDEL DE DIEU????


.

Qu'es aquò?

EDIT: E òc , es de fogassa d'Aigas Mortas, òsca mon Tamonet!
Per los que coneisson pas: es tròp tròp bon. Pas brica estofarèl, mofle, lo pè.

1 an!

Bon aniversari Noneta!

Cançon post nadalenca

6.00 dau matin e ai lo racavòmit.

E tombi sus akesta cançon sus Itunes , una version particulara de la naissença dau Cristo e akò me fa plan rire:

mon blòg en anglés

Mond,

ai presa una granda decision
fau una version en anglés dau blòg
tot lo mond se'n fot? avètz rason.

Perqué? Perque soi una quequeta en anglés e aital me fa practicar un pauc.

So, come on guys, click here to read Melanizetofreinenglish! E se cal pas trufar de mon anglés!

Especiala dedicaça :)

Mela, cala-te

Serada.
Se coneissèm pas.
Nos presentan.
"Adieu Mela" e me fa lo poton. E visa mal e me fot lo nas dins l'uèlh. Non mas cal èsser completament empafat per botar lo nas dins l'uèlh quand li fas lo poton a quauqu'un! Pensatz plan que me poguèri pas calar:
- Aaaaaaaiiiiiiiii! Mas siás con o qué!?! M'as fotut lo nas dins l'uèlh!!
E coma ai totjorn una conariá de dire...:
- Te siás enganat d'extremitat... e de trauc!



I aguèt coma un silenci.


.

Questionament filosofic nadalenc

Es melhor que m'i assete suls cagadors o que demòre quilhada dabans?


.

Bon Nadal :)

0,85€ per que d'alas!

Ma maire crompa Midi Libre cada jorn. Pas per las novas, non, per ako, i a la television. Es per "legir los morts". E comenta
- A , ten i a un mort a Fabregas.
- ...
- "Georges Marti"... Lo coneissèm pas aqueste!
- ...
- Ooooo , benlèu es de la familha dels Martis que demoravan dins la carrièra que monta.
- ...
- Non, i a pas lor nom dins la tièra. Alara, lo coneissèm pas.

Puèi quand a acabat de legir la tièra dels morts e vei que ne coneis pas cap, rondina, decebuda:
- E ben, ieu, me sembla que n'i a pas gaire de morts.


.

Bon Nadal!

Vos desiri a totes un BON NADAL.

e per festejar tot akò, d'akí lo 25 de decembre, vos farai escotar quauques cants de Nadal :)


Començam amb un que m'agrada plan, lo "nadal tindaire":


Una primièra version collectada a Sauvaterra (Roèrgue) per la Talvera, es Monsur Adrien Soulié que canta, e se pòt trobar sul doble Cd Nadals d'Occitània de La Talvera:







e, en corala, akò dona akò:

es cantat per la Corala Nadalenca de Montpelhièr, tirat de son primièr Cd "Noëls d'Occitanie" sortit en 2000.

E coma soi plan brava, vos meti las paraulas:

Anam ausir las aubadas
Que se’n venon de sonar
Sus de trompetas dauradas
Dison qu’un delfin serà.
L’una fa : « Tararà tararèra
Lintampon laderitampon"
E l’autra li fa lo respond:
"Tarara, tararèra
Lintampon laderitampon!"
Novèl vengut, pichòt popon.

Quand dintrarem dins l’estable,
Li tirarem lo capel
Li direm : « Enfant aimable
Sètz polit coma un anèl / Venèm vos cantar Noèl. »
Un farà: « Tarari tararèra
Lintampon laderitampon"
E l’autre farà lo respond .
"Tarari, tararèra
Lintampon laderitampon"
Novèl vengut, pichòt popon.

Sonatz pifres e trompetas,
Timbalas e caramèls,
E vos claras campanetas
Ambe lo còr dels angèls.
Digatz-li: « Tarari tararèra
Lintampon laderitampon!"
E cadun farà lo respond
"Tararà, tararà, tararèra
Lintampon laderitampon"
Sètz benvengut, pichòt popon.

dels intelectuals qu'agachan Plus Belle la Vie

Soi segura que sètz tot plen que, en legir las aventuras malastrosas de la BelaValenta, vos sètz pensat "pfff, kinq mèrda perqué agachan ako lo mond, es nula akesta seria". E la BèlaValenta qu'es quand meme pas colhona, o sap qu'es la vergonha completa d'èsser acro a una seria tant cona alara se tròba d'arguments... genre "parlan de tot", "son politicament correctes", "es plan fach".
Mon vièch, René!

Alara quand vei que sos arguments son garrèls, e ben, confessa la vertat:
- E ben es Luther (vaizi, balança, te direm pas res) que me diguèt que l'agachava. Quand meme Luther, imagina-te, L u t h e r! Alara, l'agachèri per veire, quand meme se lo quite Luther es vengut acrò... E vakí, ara me'n pòdi pas passar. Es plan fach perque acaban totjorn l'episòdi sus un murtre, una desaparicion ... enfin que te cal agachar lo seguent per saber de qué se passa qué. Pfff, Plus Belle La Vie , es la trapèla mega-modèl.



"la trapèla mega model", sètz prevenguts.


.

de la nocion d'urgéncia

La BèlaValenta quand es a agachar PLus Belle la vie e que Dieu li telefona e qu'a vergonha de confessar qu'aima melhor agachar sa seria que de li parlar, ben li fa:
- Bon , Dieu, te pòdi pas parlar qu'ai de lach sul fuòc. Adieu!


.

de la vergonha d'un dissabte a la bibliotèca nacionala de França

LaBèlaValenta es tota orgulhosa perque a enfin un ordenador portable. E la fa la quèca amb son ordenador. Es a descubrir la tecnologia sens cable, lo wifi, lo portable, çò practic qué. Osca per ela.

Dau còp son ordenador portable, te lo rabala de'n pertot. Quitament per trabalhar (me dison dins l'aurelheta que soi la sola persona que se rabala un ordenador de 5kgs sus l'eskina sonque per escotar de musica, que lo monde normal se crompan un ipòd).
E la BelaValenta, coma es una neneta brilhanta, e ben va a la BNF.
E la BNF es a París. Alara quand i va a la BNF la BelaValenta e ben se'n va per una setmana. E l'alberga son amiga que l'apelarem laScientifica. E laScientifica, tota scientifica que siaga, a pas la television nimai internet, es una hippie qué. putan quitament los scientifics venon hippies, mas ont va lo mond, paures de nosautres. Alara pendent una setmana, la BèlaValenta e ben poguèt pas agachar Plus Belle la vie, que i es adicta d'a fons; pièger, poguèt pas agachar los resumits sus internet. Aquò's n'es una de tortura!

Alara, a la BNF, volguèt agachar los resumits... mas de qué se passava al barri del Mistral lo vespre quand ela èra en cò de son amiga hippie qu'a ni la television ni internet? Ne dormissiá pas mai la paura d'ela.
Alara a La BNF, demandèt : "cossí fau per aver internet?". La femna li explica. No soucy Ophely.
S'installa, dins una d'aquestas sallas graaaaaaaaaandas, loooooooooongas. Amb de taulas graaaaandarassas. Amb tot plen de mond concentrats que son a furnar dins de libres o de manescriches precioses, de mond que son a soscar, de mond que son pas venguts agachar Plus Belle La Vie, de tesards, d'universitaris, d'intelectuals famoses. La vesètz aquesta sala granda?
E ben la BèlaValenta s'installa a una cadièra, just dabans un capelan, aital es segura de se faire pas dragar. (dragan grèu a la BNF i vau prene un abonament ieu)
Branca tot coma cal.
"Dubrís internet" (òc, la BelaValenta dubrís internet, dubrís pas lo navegator, pas la pena d'ensajar de la corregir fa d'annadas qu'o ensagi e marcha pas...).
E va sus Plus Belle La Vie.
E aquí dins lo silenci religiós de la BNF, restontisson lo generic de PLus Belle la Vie e la votz de Tomàs, l'omosexual de la seria, que ditz a son amic : "mas non Florian, Nicolas es mòrt per ieu, ara es amb tu que la vòli faire ma vida!"

...
Lo capelan se signa.
Tot lo mond lèva lo cap.
E la BèlaValenta brama un "mas compreni pas, a mon ostal, es pels nauts parlaires que sortís lo son e me cal apuejar sul boton".


La tecnologia es una puta.


.

Lo Dalfin e La talvera a Rabastens

Thierry, Monsur lo president de Cordae la Talvera a botat la video en linha!
Mercéééééééééééés!

D'aquesta serada, ne parlan tanben lo Peiroton e la Lutz.

Pè de blogaire: la granda primièra!

Lo Peiroton, quand arribèri a Tolosa e que m'esperava sul trepador, la primièra causa que me diguèt quand davalèri de l'autò foguèt : "nos cal faire una fòto de pès!".
Bonjorn, va plan, as fach bon viatge, ieu tanben soi contenta de te veire, a ben te vesiái mai grand, mas siás mai vièlh que çò que pensavi, es polit ton barri, e sèm al nòrd o al sud de Tolosa, e de qué fasèm ara e ont es ton ostal. tota una tièra de frasas inutilas que lo Peiroton nos estalvièt amb "nos cal faire una fòto de pès!".
fa moment que fau pas de fòtos de pès.
La darrièra remonta a ... bo, sai pas, me'n soveni pas.
Puèi de pès de blogaires, n'ai pas dins ma colleccion.
Los tres que seguisson me diràn que i a Lou Tam Tam en fòto de pè. Mas Lou Tam Tam per ieu es pas un blogaire, es un amic que lo coneissiái abans qu'internet existiguèsse. (es una declaracion).

Alara, amb lo Peiroton, ne faguèrem de fòtos de pès. E lo tipe èra tot content ( disi pas excitat que lo Quequejaire e una tropelada de malpensats se pensaràn de causas porcassièras).

Anem, aquí sota ne veiretz una, primièra fòto de pès blogaires... e vos daissi admirar coma lo Peiroton a la cauceta assortida a la bralha. A la classa lo tipe! - contrariament a la palhassa de las basquets poiridas e de las bralhas pas alisadas...


Mercés per las fòtos e per las pantas de rire Mossur Joan dau Peiroton!

Akò fa de ben!

A, legeire, mon semblable, mon fraire, te pòs pas imaginar coma lo divendres de ser a Rabastens foguèt genial genial genial.

Te vau contar, asseta-te, que n'i a per un moment.

Anèri a Tolosa que i aviái rendepè amb lo Joan Deu Peiroton, oc, lo Peiroton, the caluc one. e sabètz que? m'i perdèri pas a Tolosa! Soi tras que fòrta (benlèu me caldriá precisar que lo Peiroton, the caluc one, m'explikèt plan lo camin, mas bon, coma me vòli lo merit per ieu tota sola, o dirai pas). Sopèri en cò del Peiroton, amb sa Peirotona e un de sos Peirotonets. Un moment tras que bon! Vos parlarai deman de la desvirtualizacion de la vida. non, pas ara, que sequenon, serem pas colcats e ai sòm ieu.

Pel Peiroton, èra son primièr còp: son primièr concèrt de la Talvera, son primièr concèrt del Dalfin, lo primièr còp que me vesiá e lo primièr còp qu'ensajava de dançar. Alara, Peiroton, coma i fas pas res sus ton blòg, te prepausi de faire una tièra de "mon primièr còp" amb tot akò ;) . E vos o conti pas que a son ostal al Peiroton, ensagèri de li aprene a dançar. ben òc disi plan ensajar, perque èra, es e serà pas ganhat (akò's per me vengar de la "còfa bretona", non mais oh).
Quand meme, abans de partir cap a Rabastens, sopèrem. E lo Peiroton sap que m'agrada la pasta. Alara, lo tipe faguèt de pasta ( o faguèt faire a sa femna puslèu qu'es un mascle) mas, coma es fan de Nadau, i botèt de salmon dins la pasta. Sabiá que m'agrada la pasta, mas sabiá pas que m'agrada pas lo salmon. Mas quina idèa tanben de botar de saumon dins la pasta? Quina eresia! Mas ieu, plan ensenhada, diguèri pas res , "t'agrada lo salmon al mens", "òc, solid, m'agrada tot a ieu" ( la messorga mai gròssa que ieu, soi una rompebalas per manjar) e me mangèri tota la sièta. Òsca per ieu.

E pels curioses que vòlon saber "mas cossí es lo Peiroton?" : sembla que sortís d'un dessenh animat. Ai pas encara trobat quin. - akò's per me venjar de la "còfa bretona", non mais oh. ( de qué ? que me'n soi ja venjada? E ben o tòrni faire. Se per cas! )

Perif de Tolosa (es cagaaaaaaant akeste perif). La BO del viatge: Bramadís lo darrièr de La Talvera.
Autorota, sortida 6.
Bon, fau una elipsi, que se colcarem tard a akeste ritme.

Lo Peiroton l'aviái conflat en li dire que La Talvera es lo grop mai melhor d'Occitània e li fotèri lo cap coma una semau en li dire que "la talvera + lou dalfin lo meteis ser , èra istoric".


E òc, foguèt una serada istorica.

Per tot plen de mond.
- pel Peiroton que veguèt pel primièr còp La Talvera e Lou Dalfin e ieu e que m'ausiguèt quequejar tant e mai... de còps que i a, ai vergonha
- per Lutz que veguèt pel primièr còp La Talvera e Lou Dalfin e ieu e que m'ausiguèt quequejar, tant e mai... de còps que i a, ai vergonha.
e
- per ieu que dancèri una escotisha amb Sergio Berardo, lo cantaire de Lou dalfin

E pas degun prenguèt una fòto.

Vos asiri totes.

D'aquesta serada, ne parlan tanben lo Peiroton e la Lutz.

Aqueste ser

Serai aqueste ser a Rabastens pel concèrt de La TAlvera e del Dalfin.

Putan, LOU DALFIN E LA TALVERA lo meteis vespre.

G E N I A L!

Qual i veirai?? Seriá l'ora de tornar lançar las fòtos de pès, cresètz pas?

Se n'i aguèsse pas qu'un

tòrni legir per asard un passatge d'un roman, un grand moment de literatura, que me faguèt pissar de rire a l'epòca:

Deviá agachar de darrier lei vitras estent que duerbe sus lo còp. Sospresa. Dòna Bofeti a pas cent ans de dimenches, nonanta nimai. Trenta cinc bessai. Es pas laida e sembla simpatica, amé d’uelhs que petejan, plens de malícia. Empassa mon istòria d’enquista sus la vida dins lo quartier per un reportatge a venir de F.R.3 emission Vaquí e me fa intrar dins lo salon. Marcha davans. Es pas mau, aquela Dòna. Mai pesa au mens cent quilòs. De mai que ieu. Me fa assetar dins lo salon a costat de la fenestra que dona sus la carriera, davans la telé. Pren un fautuelh e comenci mon enquista. Per collaborar, es lesta a collaborar. Confirma leis observacions dau vielhastre, e mai me ditz que n’a vist arribar un autre, vers lei doàs oras, dins una doàs chivaus, un a pauc pres coma ieu, mai pas tan bel òme. Puèi, lo tipe qu’era dins lo minicarri a sortit. Ela, s’es anat faire l’infusion avans lo filme de Canau + e a encara remarcat una veitura, una bela, una BMW pensa, amé doàs siloetas qu’a pas pogut desvistar. Après, es estada pivelada per lo
filme. Tant d’òmes, joines, dins un quartier que l’i a quasiment que de vielhs, e ela, tan
soleta, de lònga, dins aquel ostau, pecaire, a se morfondre.

La conversa, me n’avisi, pren un torn qu’esperavi pas. Dòna Bofeti se clina de mai en mai vers ieu e sa rauba de chambra s’escarta de mai en mai sus son pitre, un pitràs espectaclós. Sei boquetas brilhan, son agach sembla pivelat per un endrech, a autor de... Putan de gòi ! Dins un virat d’uelh compreni qu’es per la giba que fa mon pistolet qu’ai forrat dins la cencha e que deu lo prendre per autra causa. Assagi ben de reprendre la conversa sus un terren mai professionau, mai es plus possible de l’arrestar. Ai pas lo temps de bolegar, de cridar seba, de comprendre coma s’es fach que la rauba a tombat a mitat, que s’es sarrada de ieu, que me tomba sus la codena, me cuerbe, m’agolopa, me chuca, m’envasís. Que me leva lei vèstits tot en se levant çò que resta dei sieus, m’aganta, me chaspa, m’englotís. Me viòla. Coma vos va dieu. Aquela de bicicleta !
Tres còps a-de-reng au mens segon meis estimacions.

Es tirat de E Freud dins Aquò del grandissim mèstre Florian Vernet. Òc, se n'i aguèsse pas qu'un seriá el. L'autor que te dona enveja de legir, que te fa pissar, que quand as lo moral dins las caucetas traucadas, e ben legisses 10 linhas e siás urós. Es indispensable. E cossí fan los que lo coneisson pas?

Alara, telecargatz, estampatz e fasètz virar :)

Aniversari

Uèi, Max Rouquette auriá 100 ans.

http://www.max-rouquette.org

al cinèma

uèi amb MonAmorósMaiContent, sèm anats al cinema veire Madagascar 2

Mòrta de riiiiiiiiiiiiiire. Soi fan.





Dins la sala, eriam los sols qu'acompanhavan pas l'enfant al cinema.

De còps que i a, ai vergonha.

dels pels e de la calor

Aprèp lo còp del lum pulsat que m'aviá daissada un pauc colhona, èra complicat de faire la convèrsa.
Quand, còp sec, me ven la question que se pausam totAs: de qu'es la diferéncia entre la cera cauda e la cera freja? Question que n'amaga una de question pas tant filosofica: perqué se cramar la pèl kand se poiriam depilar amb de cera freja???


Pausi la question a l'esteticiana:

- Quina es la diferéncia entre la cera freja e la cera cauda?
- E ben la cera freja copa lo pel a ras, e la cera cauda caufa lo pòre, lo pòre se dilata e lo pel ven melhor.
- È? Ai pas comprés...
- La cauda es melhora.
- A ok.

Esteticiana 2 - Mela 0.


.

Del lum e de la colha de buòu, où l'on ne parle pas de sabre laser

Una visita a l'esteticiana, e ben o sabètz benlèu pas, mas es un grand moment de cultura scientifica, si si si, vos o prometi!

Fasiá moment que i èri pas anada (ben òc, es la crisi, e quand i a pas de sòus, se'n brandam lo dardalhon d'èsser polida o laida) e dintri e te vesi un anquestre que i èra pas abans. Una mena de còfre fòrt. Pendent la sesilha "vaizi, fai-me mal", li demandi "de qu'es aquel anquestreaquò que i a aquí?".
"Es per la depilacion definitiva".
Sosqui dins mon cap a ieu per dire kikòm d'intelligent, perque m'agrada pas que l'esteticiana aja lo darrièr mot.
E li fau " a òc, es la depilacion al laser."
E me corregís "pas exactament, es pas de laser, es de lum pulsat."
wow! Sabiatz que fasián de fisica las esteticianas?

Esteticiana 1 - Mela 0

Mas aguèri kand meme lo darrièr mot: "de "lum pulsat", maseta! "
Soi segura que vos demandatz totes de qu'es aquò lo lum pulsat? E ben es coma de laser, mas pas tant potent. Pas de qué se copar un ongle qué.


Se ne volètz saber un pauc mai sul lum que beu de red bull e t'assassina lo pèl pas polit, avètz pas que d'agachar sus Google.

lo gir dels 25

Un blòg de mai que seguissi, lo de Marc Serena qu'es partit faire un torn del mond e qu'entrevista de mond de son atge, 25 ans, per veire cossí es sa vida a el dins son país. Es un projècte que m'agrada fòrça, un pauc mediatic, rai, mas deu èsser una polida aventura umana.
Dins son blòg, bota una fòto e un tèxt cortet. Te fa lingueta!
anatz-i faire un torn: lavoltadels25.cat

Jamai sens ta capòta

Uèi es la jornada contra la Sida
Uèi encara e coma cada jorn devèm bicar sens doblidar aquela puta de capòta que capitam pas de botar e que copa tota la magia de l'excitacion del primièr còp. Rai, mas es coma aquò. Aviam pas qué de naisser 70 ans fa. Ara, son tot plen que la meton pas la capòta e la malautiá recuola pas. Lo mond contunhan de crebar e de patir coma cal abans de crebar.
Mai d'informacions:
- World aids campaign
- AIDES

E vos cal pas èsser de marrida fe, se pòt prene son pè amb una capòta, la pròva:

Rei de la capòta

E pels catalans: no us oblideu del condó, per això us ho han escrit al carrer:

Occitània a Pè, lo 6 de decembre, totes ensems en carri

Avètz agachat Viure al País ièr? èra tot consacrat a Occitània a Pè. Tras que bon. Ieu èri tota esmoguda.

Lo podètz veire aquí.
n'i a que capitan de raubar las videos de VAP sus France 3? m'agradariá de la recuperar, se me podètz ajudar!


Ne profechi per vos dire que i a un bus que partís de Carcassona cap a Cuneo per la jornada d'Occitània a Pè lo 6 de decembre.

Aquí las entressenhas:

Lo 6 de DECEME, CUNEO serà CAPITALA D'OCCITANIA TOTA per ua Jornada Granda, la
Hèsta, la Mani-Fèsta de tots los Occitans, de las VALADAS, de la VATH d'ARAN e
d'OCCITANIA "Granda"...
Vos sovenètz de l'estrambordanta Caminada de 1.300qm "OCCITANIA A PE", que la
CHAMBRA d'OC organizè per menar l'UNESCO a protegir l'OCCITAN coma PATRIMONI
MONDIAU de l'UMANITAT ? E ben, lo dishabte 6 de deceme, a CUNEO/CONI, se harà la
Presentacion Oficiala d'"OCCITANIA a PE" dens l'OSTAU de la PROVINCIA.

Com collaborator afogat de la CAMINADA (1000qm/45 etapas en portar las colors
d'"Occitània granda"), que trobèi necessàri d'organizar ua participacion collectiva
a la Hèsta finau deu 6/12. Atau, que'vs prepausi un desplaçament en autocarri
(despensa redusida-sens fatiga-e dab l'ambient..que cau!) dab las condicions de viatge
e de sejorn seguentas(dab la collaboracion de CHAMBRA d'OC peu sejorn):

*Dishabte 6 : - despart de CARCASSONA : 5oras del matin (prèp Carrièra Trivala)
- estancs a NARBONA, BESIERS, MONTPELHIER, NIMES (autopista)
- arribada a CONI : 2oras del vèspre
- recepcion, activitats e fèsta : 4oras " >tard.....sens precision !
- sopar ofèrt per Chambra d'OC/Conselh Provinciau
- cambra(s) dens ua ostalaria(=40/50€) de CONI

*Dimenge 7 : - despart de CONI : 10oras del..matin
- dinnar (de's pagar a un estanc d'autopista)
- estancs com a l'anar (e benlèu ta's banhar!)
- tornar a CARCASSONA : 7oras del ser.

* Prètz : - Autocarri (55p./1.300qm/2menaires = 2.500€) =45€/50pers.
(Societat Teissier-Carcassona)
- Ostalaria (a CONI,reserv.per CHA.d'OC) = 40/50€ la cambra
(cambra de 2, 3 ...pers. dab p.dejunar)

- doncas per 1 persona : viatge + ostalaria = 70/80€
(shens dinnars deu 6 e deu 7)

NOS I CAU ANAR e.. EN NOMBRE ! Pas solament ua o duas veituras ! Seré LA vergonha!
Es ja un entrainament per la mani-fèsta d'octobre 2009 a ... Carcassona (tè!)
Que'vs domandi de vos afanar :
1- per vos inscriure
2- per informar lo monde un pauc de pertot

** INSCRIPCION DE'M MANDAR
1- lèu-lèu per - internet : jan-peir.miner@orange.fr
- sms : O6 71 47 90 02

Da Ines Cavalcanti - Chambra d'òc

La Chambra d'òc sarè urosa de vos acuelhir a Cuneo dins aquela jornada culturala (vos jonhi l'envitacion).

Es un moment fòrt per continuar un descors sus la lenga e la cultura occitàna, de presentar l'exposicion de Riccardo Carnovalini e de far festa abo Aire de prima, de parlar amassa de l'experiença de l'Occitània a pé e de veire coma continuar dins l'an 2009.

L'ostalaria onte se vai dormir devaria esser a Dronero, pas luenh de Cuneo, s'apela Dragonerium. Ai rdejà un pauc reservat mas seria bon de pas tardar tròp a me far saber se s'arriba a far un pullman de monde de l'Occcitània granda. Las chambras son mai o mens sus lo pretz que a dich Joan Peir. Las personas que van prenotar per lo pullman devon dir a Joan Peir coma se volon sistemar dins la chambra;

a- lor fai pas res de estre abo autres

b- son de coples e donc lor vai ben una chambra matrimoniala

c- volon una chambra tot sol

Aquel auberje fai mai o mens: 40 singla - 60 dobia - 75 tripla (abo la mijnar lo matin)

Remerseji Jean Peir Miner per aver agut la vuelha de se butar a la testa per organizar la vengua.

Lo 22 e 23 de novembre avem ospitat per lo Grinzane Cavour a Ostana una manifestacion per lo Centenari de Max Roquette abo Roqette J. G:- Roland Pecout-Jean Federic Brun, Teatre Gargamela, Souche Georges, la Comp. Mais pas veraiment: La manifestacion s'es fòrça ben passada e pensi que vai far floris carcòza per l'an que ven abo lo Felibrige per lhi 150 ans de l'escritura de Mireio de F. Mistral.

Pensi mai que mai que avem derant de nosautri encà un'occasion estòrica per la nòstra lenga e la nòstra cultura e que aquela occasion la podem cuelhir solament se sabem devenir pan occitan vertadierament. Se sabem passar da las paraulas a factes concrets. Aqueste n'es un.

Vòli encà vos dire que es arribaa lo sostenh oficial de lo President de la Region Midy Pyrenñees, que remerseji. Abo aquel de la Region Languedòc Roussillon avem dejà dui Presidente que sostenon l'apèl Lenga d'òc Patrimòni Mondial de l'Umanitat. Vos demandi de trabalhar abo costança e perseverança per obtenir da Comunas, Comunitat de Comunas, Region, Departement, Ofici dal Turisme, Parc etc....mocion de sostenh.

REFLEXIONS: Sus lo dernier numre de Aquò d'Aquí a l'article Sept marcherus neuf semaines une reussite la seguenta frasa: "....reconneissance de l'occitan par l'Unesco à l'arrivèe?". NO ES PAS DE TOT A L'ARRIVÉE ES QUE A LO COMENÇAMENT. CHAL SE METRE DINS LO CAP QUE SE VOLEM OBTENIR VERTADIERAMENT CARCÒZA CHAL QUE SE LA CONQUISTEM TUCHIS ENSEM. CHAL QUE LHI TRABALHEM DE SOS. CHAL QUE ANEM A PARLAR ABO LHI CONSE, ABO LHI ELEGITS, ABO LA POPOLACION PER EXPLICAR, CHAL QUE VEIEM UNA METODOLOGIA DE TRABALH COMUN....Dins un autre article de Aquò d'Aquì ai lezut un autre enteressant article Pour une loi quelques vérités et de lunité onte se disia que derant de tot siem nosautres que devem creire dins una nòvela possibilitat per la lenga e la cultura d'òc.

En lezent lo darrier numre de La Setmana, Aquò d'Auì e personas que escrivon, en veient la capacitat bela de trabalh de joves coma Alet Clement e Benazech Ros de Fr3 Sud, de Belmond J.P e Eliane Tourtet de Fr3 Medit.....e de Fr3 Aquitania.... e tot aquò que es capitat din la caminada me sembla que devem soscar a una novela maniera de trabalhar ensem.

En car salut a tuchis

Ines Cavalcanti

Bon Aniversari

Es l'aniversari del Joan de Peiroton!

Li podètz anar dire!

Quant a de temps? Bon dieu, es vièlh, es mai pròche de l'ospici que de la maternitat.


BON ANIVERSARI JOAN DEU PEIROTON!

Revelacion

Dimècres, sopèri amb LaJefa e Pomponeta perque dijòus èra l'aniversari de LaJefa.
LaJefa es un pauc una iluminada de l'astrologia. Se petaça cada an per que quauqu'un li faga present de l'astrologia per l'annada seguenta d'elisabeth tessier o autra tabata cash.
E ara, a una passion tota novèla per un dakòs de psicologia qu'a un nom un pauc estranh:l'eneagram. Lo speech: i a nòu modèls de personalitat e cadun sèm un modèl amb d'influéncias d'un autre modèl.

Alara, ieu, segon l'eneagrama, soi lo modèl nº7 , coma los felibres, òc.
Aguèri pas besonh de cercar dins lo libre, que LaJefa e Pomponeta m'o diguèron "ò tu, siás lo nº7 d'a fons". De creire qu'an pas qu'aquò de faire de me trobar mon nº dins l'oroscòp eneagramian! Lo nº7 fa partida dels modèls cerebrals, ieu que sabiái pas s'èri vaginala o clitoridiana, ara, o sabi, soi cerebrala.
Cada modèl es associat a un animal. E lo meu, es la monina.
Tarrible! Soi monina tanben dins l'oroscòp chinés! Coincidéncia o vertat vertadièra?

Podètz legir d'entresenhas sus la personalitat del 7 per aquí. la descripcion que fasián de la monina del nº7 dins lo libre , akò èra ieu a 100%. Alara, lo prenguèri de las mans de LaJefa lo libre e comencèri de legir mon "retrach". Èra tot plan corrècte (levat que disián que los nº7 son esportius... ).
Puèi arribèt LA frasa:


"Son goût pour les plaisirs polymorphes fait de lui un partenaire sexuel très agréable."

Es dich.


.

1000!

3 ans de blòg!


1000 pòsts sul blòg!


Vos granmercegi a totes amics, legeires e comentators! Qu'es mercés a vosautres qu'aquela conariá de blòg existís.


E per l'escasença, e coma serà lèu Nadal, e per festejar los 3 ans, enfin, i a tot plen de rasons qué, ai fach una wishlist sus Amazon. Una Wishlist qu'es aquò? Ben es una tièra de causas que me'n podètz faire present! Es pas polida la vida? Alara, i a un pauc de tot dedins: de causas sexualas (si si), culturalas, de causas utilas, per totes los budgèctes: tot es aquí.

Se vòls pas amazonejar, me pòs faire un present a partir de Macarel, Adishatz, Qu'es aquò, Ideco, La Talvera, Vent Terral o qué que siá, fas la comanda, e lor dises de me mandar un mail que lo mandarai ieu mon nom vertadièr (i a d'inocents lemosins que se pensan que Zetofre es mon nom...) e mon adreiça exacta.
E sabètz qué? Avètz quitament pas besonh d'embalar la causa. Ieu disi VISCA INTERNET!

E se siás un rebèl rebèl, e vòls faire un present mas vòls pas passar per internet e me vòls mandar un kikòm de ton ostal (de paté, un dessenh de ton pichòt, una capòta vièlha - a, non, akò ne vòli pas, lo Cd de ton grop, una fòto dedicaçada de ta persona, un camisòt artesanal, un tricòt tricotat per tos dets, eça ), manda-me un mail.



;)

3 ans de blòg!

Putan 3 ans que lo fau lo blòg!

Tot plen de lectors, tot plen de compliments de mond que me felicitan, que rison, que legisson d'un biais regular.
Ai pas grand causa de levar del tèxt qu'escriguèri l'an passat.

E me disi qu'ai la causida entre tres causas:
- arrestar tot, barrar la pòrta e far petar la barraca. I a un boton sus la platafòrma de Blogger que ditz "suprimir lo blòg", un pauc lo boton roge que fa explosar la planeta...

- contunhar coma ara "d'aise colega, trankila emila"

- arrestar de me censurar, faire petar la sopapa e empifrar los estreches del cuol.

Qué ne pensatz? Meti un sondatge sus la colona de drecha. Aquò vòl pas dire que vos escotarai ;)

ieu disi, 3 ans de blòg , akò se festeja!
Fai petar la blanqueta e Carnaval serà fèsta nacionala!

Occitània a Pè, akò comença!

Mai d'entresenhas aquí

e podètz tanben agachar una video aquí

Normal ... izacion linguistica

il est défendu de cracher par terre...
et de parler patois!

normalizacion linguistica ena val d'aran

Fòtos horra borra dera Val d'Aran

Quauques fòtos de la Val d'Aran jos la nèu...



Lo Campanar de la glèisa de Cazau, dempuèi la fenèstra de nòstra cambra. Dormiguèrem a Cazau, un vilatjòt plan polit, en dessús de Vielha, a la residéncia Casa de pagès Cuny, anatz-i! La femna es adorabla, las cambras son netas, los lièches confortables, i a tot plen de cadenas a la television, e mai que mai 35€ la nuèch amb sala de banh dins la cambara es çò mens car me sembla... Lo telèfon : +34 973 640 139 . Benlèu o sabètz pas, mas los que van en vacanças a la Val d'Aran son totes over rics. T'an totes de 4x4 que una ròda de son tot-terrenh es lo prètz de ma veitura.

Plaça de la glèisa de Salardú

Unha, fòto presa dempuèi Salardú

Lo panèu èra tròp naut per poder faire una fòto de pè :P

L'estacion d'esquí Baquèira Beret
èra pas encara dubèrta (mas se'n fotiam, nosautres fasèm pas d'esquí)
son aquí los ricasses amb los 4x4. Es alai que lo rei d'Espanha va esquiar.
Quand vos disi que la Val d'Aran es pels borgeses :P

La glèisa de Salardú dempuèi lo cementèri d'Unha

Arribada a la Val d'Aran dempuèi lo pòrt de la Bonaigua

L'estacion d'esquí de la Bonaigua

D'autras fòtos aquí:

Quauques fòtos horra borra dera val d'aran

Per partir en vacanças a la Val d'Aran, es aquí: torismearan.org (Lo sit es en version occitana ). mas mèfi a las entressenhas dau sit, son pas totas justas... Es melhor de telefonar abans per aver pas de suspresas!

entath ciutadan en aaran

La Marieta me mandèt aquò: http://www.tv3.cat/videos/829479 Anatz-la veire!
Es poliiiiiiiiiiiit lo tipe!

dissecacion

uèi, ma Boite à Meuh es mòrta.
Una Boite a Meuh es akesta causa que sembla una salièra e quand la capviras fa lo bram de la vaca.
Ben la meuna es mòrta.
E coma voliái pas que la vaca mòrta dedins ma boite à meuh poriguèsse, embocanèsse ma sala de jòcs e balhèsse lo racavòmit a Barbie (ja que Ken s'es tirat, es pas en racant de longa que l trobarai un òme a ma Barbie ieu), ai dubèrt, pas de vaca dedins, e ai ensajat de comprene lo fonccionament. E lo coneissètz vosautres lo fonccionament de la boite à meuh?

E ben, agachatz, Wikipedia o explica! Tarriiiiiiiiiiiiiiiiiiiiiiible

E aprèp m'explicaretz a ieu.

ièr de ser dins mon lièch

Ai agachat Stupeur et tremblements e roncavi al cap de 40 minutas. Es normal o èri plan lassa?






me disiái plan que la VF sonava fals!

et ils sont où? et ils sont où? Et ils sont où les habitués??? lalala la la la laaaaaa

E ont èran??

Occitània a Pè. 7 personas caminan pendent 70 jorns. 1300 km. Un esfòrç fisic dels bèls per traversar un país, lo descubrir, li parlar, per ne faire parlar, e miracle, per lo faire parlar.

Per lo faire reconéisser per l'Unesco.

Un brave projècte.

Nòble.

Èra important per ieu d'anar a la fin d'aquesta caminada. D'anar dire als caminaires “òsca”.

Òc, èra a Vièlha. Òc, èra luènh. Òc, èra un divendres.

E soi en colèra.

Bravament en colèra.

I aviá de mond.

Rai.

Mas ont èran los tòca manetas?
Ont èran los que vòlon una reconeissença de l'occitan per l'estat francés?
Ont èran los Barceloneses que fan de l'occitan sa lucha?
Ont èran los "que vòlon que ..." ?
Ont èran los que vesèm de'n pertot que braman e bracejan?
Ont èran los que se sègan sus una Occitània “botatz l'adjectiu que volètz”?
Ont èran los teoricians de la causa?
Ont èran los patriòtas e autres pantaissaires de lor Occitània virtuala que ne pantalhan per email?

Sai pas ont èran. En tot cas, lo divendres 7 de novembre, i èran pas a l'arribada d'Occitània a Pè.

E perqué i èran pas???

Benlèu perque faire 300 km en veitura aquò còsta. Rai. Los italians acaban just de ne faire 1300, e a pè.

Benlèu perque lo divendres 7 de novembre trabalhavan e que conéisser la data dempuèi un an permet pas de s'adobar al trabalh.

Benlèu perque èra pas son idèa a eles, e se desplaçan sonque se son protagonistas, entrevistats, fotografiats, saludats, remirats.

Benlèu perque pensavan que fariá pas avançar la causa dins sa dralha a eles, benlèu que los interessava pas, benlèu qu'èran pas d'acòrdi amb lo projècte. Mas puta de dieu, es brave çò qu'an fach, e “los grands de l'occitanisme”, sètz pas estats fotuts d'anar a l'arribada d'Occitània a pè.

O benlèu es perque i aviá pas lo cuol de lipar per aver la subvencion l'an que ven?

Andòlfis...

.

L'arribada d'Occitània a Pè

Divendres 7 de novembre, èra la fin de la caminada bèla de Vinai a Vièlha, la fin d'Occitània a Pè.

Un moment dels braves. Una standing ovation per Inès Cavalcanti "l'anima mater" del projècte coma diguèt Mari Vergés la cap de politica linguistica del Conselh General d'Aran.

Un Conselh General d'Aran tròp pichòt per aculhir lo mond vengut per l'escasença.

Un discors remirable dau magnific Paco Boya.


De fòtos, ne metrai mai tre que n'aurai un pauc lo temps.

La plaça abans l'arribada, amb lo monument per la lenga occitana:
(soi la sola de trobar que sembla una pèira tombala?)

L'arribada sus la plaça:
DArio Anghilante entrevistat per France 3:

E, plan segur, mon pè amb los pès de Dario Anghilante, un dels 7 caminaires...e un bocin de la bandièra aranesa:

Ò S C A !!!

aviam besonh d'una bona novèla....

Lo primièr còp que co-lògui

Lo Camel me demandèt de contar lo primièr còp qu'arribèri a l'ostal en colocacion amb LaJefa e la Pomponeta. Aquò l'interèssa perque lo Camel cologuèt amb la mitat de las estudiantas de la facultat. Tanben, faguèt una colocacion de tres mascles, e , saique, aquò embocanava sota la masqueta de Dark Vador.



Primièr, es un pauc l'estrés per respondre a aquò, perque la Jefa, l'autre jorn, te prenguèt l'aire missant e faguèt "poirai legir abans que metèsses en linha?". D'aquò, ne dison "question retorica", perque , de fach, èra pas brica una question, èra un "fai-me legir abans de metre en linha" o "mèfi a çò que dises", "vas veire!" e autras menaças que vos las passi. Precisi, per Camel, que la Jefa diguèt : "emmèrda lo Camèl, podiá pas pausar una autra question?" , te fas d'enemics mon Camelon.
E perqué tantas menaças? Ieu me disi qu'a pas la consciéncia tranquilla. Aguèsse pas res de se reprochar, me fariá pas de lobbying censurièr, sètz d'acòrdi amb ieu, he?

E ben vos o vau dire ieu.

LaJefa s'enanèt viure dins un ostal grandaràs. E LaJefa e ben...cossí dire... sap faire lo tajina, .... sap explicar tot plen de causas... mas... ben.. vaquí... es tot.
Alara, recrutèt de monde.
La legigueriatz pas vosautres l'anóncia?!?! Cal dire que i caliá passar davant: una a la librariá e l'autra al mercand de tièlas, ben òc, cadun a sos centres d'interès, cal pas jutjar.

L'anóncia disiá:

"JF activa (o putan, començava coma una anóncia sexuala e aviái pas res vist!!!) cèrca JF activa (kò vòl dire que voliá pas una fenhantassa que fa pas lo netitge) per ocupar una cambra granda e solelhosa e moblada (segur, se met qu'es una cava, lo mond i van pas) dins un ostal grand, solelhós e agradiu. (Versalhas a costat es una tuta)
Condicions (of course, de k cresiatz?):
- bricolaira
- inteligenta
- filosòfa
- ortalhièra
- occitanofòna
- cosinièra
- simpatica
- cultivada
- nimportanawakaira
- practica
- amb una polida autò
- que fume pas
Animals non acceptats.

Se presentèron tot pleeeeeeeeen de monde. Semblava lo casting de la Star'Ac la coa dabans l'ostal de LaJefa. normal, coma aviá pas marcat lo prètz, e ben lo mond se pensavan qu'èra a gratis. Son cons lo mond. LaJefa, foguèsse una ONG, aquò se saupriá!!

Puèi, coma a Star'Ac, en finala, eriam doas.
Pomponeta e ieu. Mandatz un SMS per ieu. Mercé. Las referéncias a Star'Ac son per que la Jefa riga un pauc - òc, LaJefa agacha staracademy, e òc, quand vos o disiái qu'aviá de causas de pas dire La Jefa dins sa vida....

Per ne causir una, LaJefa nos faguèt tot plen de questions. Genre "prendrai la melhora".
Es una interessada... vos o disi.
Perqué nos prenguèt a totas doas??? e ben vos o vau dire ieu, perque aviá besonh de las doas, perque akò èra l'equilibri perfièch. Demostracion:
- Pomponeta cosina plan e ieu acabi totes los plats, pas de pèrda, tot es profiechat
- Pomponeta fa l'òrt, ieu ajudi
- Pomponeta fa lo bricolatge, ieu ai totes los espleches (e vai-te'n faire de bricolatge s'as pas lo material)
- Conti una conariá cada còp que dubrissi ma boqueta sensuala, E akò, a la Jefa, la fa rire
- Pomponeta ditz tot plen de causas intelligentas e te pausa de questions sus de causas que te pausas pas jamai de questions dessús. E a la Jefa, las questions complidacado-existencialas, akò li agrada.
E totas doas eriam activas (non, Quequejaire, parli pas de sexe!), bricolairas, intelligentas, cultivadas, occitanofònas, simpaticas, cosinièras (mas siiiiiiiii, la fau la cosina!!! e ma paella, he???) e occitanofònas (o ai dich dos còps, o sabi). Per resumir, Pomponeta e ieu sèm perfièchas. Al nòstre biais.



Mas ieu, la vertat vertadièra, la coneissi.
Perqué laJefa me prenguèt a son ostal?


E ben aquò èra per caçar LAS RATAS


Cossí o sabi?
E ben l'autre jorn, i anèri e me demandèt, amb lagremas e votz que tremola, "voldriás pas tornar? me sembla que las ratas son tornadas dins lo trast".



PS: se lo blòg desapareis deman, es un còp de la CIA, Fidel Castro, lo govèrn chinés La Jefa

Sankokai

Quand aviái 6 ans, lo dimenge de vespre, agachavi Cat's Eyes sus la 3.
Catsaiza, son tres sòrres que, incognito, fan de mission a la James Bond.


Son tres, son joves, son intelligentas, son polidas, son de longa a susar e a faire tot plen de movements ambson còs, se li veson las popas, son vestidas de vinil.
Compreni ara perque mon paire venia agachar Cat's Eyes amb ieu, ten!

la tele e ieu

Ieu quand èri pichòta, a 5 oras aprèp l'escòla,preniái ma merenda dabans la television.
Per merendar, aviái de lach amb de lèscas amb de burre (dons ton cuol las 5 fruchas per jorn, mas a l'epòca lo govèrn o disiá pas). E agachavi la 5. A l'epòca, la 5 èra pas una cadena intelectuala-bobo-alemanda, non, èra una cadena... sai pas, èra una cadena que i aviá de jòcs e los dessenhs animats. Ben òc, es lo sovenir que n'ai, d'un autre costat, aviái 7 ans, m'anatz pas faire un flanbi una foaça. E agachavi los dessenhs animats. E n'i aviá dos que mancavi pas.
Los dos dessenhs animats mai dramatics dau mond mondial: Princesse Sarah e Rémi Sans Famille.
Princessa Sarah.
Ja lo títol, marca mal.
Princessa Sarah, es l'istòria d'una drolleta qu'a una votz nhanhà que son paire ric ric ric li paga una escòla subreborgesa e quand lo paire creba (al 2nd episòdi), e ben la paura dròlla ven l'esclava de l'escòla. E pendent 40 episòdis, veses coma te maltractan la paura Sarah (dins son cuol la principautat), coma te li fan faire lo netitge, coma la daissan crebar de fam, coma se regalan de l'umiliar, coma lo mond son missants amb ela.
Ieu soi segura qu'es dempuèi Princessa Sarah que soi brava amb tot lo mond e que me mesfisi dau mond qu'an un minimum de poder. Òc, Princesse Sarah, es un pauc l'escòla de la vida finalament.

non, seriós, agachatz aquò:
(remarcaretz las voses nhanhan...)


La fasián pas jamai manjar pauròta.
E ieu manjavi totjorn dabans Princesse Sarah, es pas de sadisme aquò???


"je suis sans famille et je m'appelle Rémi, et je me ballade, avec tous mes amis. Ma famille à moi c¡est celle que j'ai choisie...". Putan, quasi 30 ans e te pòdi cantar lo generic de Rémi SAns Famille. De còps que i a, ai vergonha.


De qu'es l'istòria? E ben, me'n ramenti pas tant coma Princessa Sarah... Es l'istòria d'un drollet, Rémi, que sa maire lo dona a Vitalis qu'es pas un cocha vestit mas ne manca pas gaire, qu'es un artista barrutlaire, que fa d'espectacle amb son monard e sos gosses, es un SDF artista qué. E Rémi fa los espectacles amb el. Me soveni pas brica de las aventuras.
Me soveni just que lo monardon Jolicoeur, morís a un moment e que ieu ploravi ploravi ploravi dins mon bòl de lach, e aquò salava lo lach e èra desgulasse. Tròp tròp triste quand morís l'animalon. Puèi morís a cada redifusion e ieu plori a cada redifusion.
òc, plori al present, perque soi segura que passèsse ara Rémi sans Famille, e ben plorariái quand morís.
Ja que plori quand agachi 30 millions d'Amis.





Ligams:
- un sit internet sus Princessa Sarah (wow, i a de monde que fan de sits sus aquò, alucini)

Jorn das Mòrts

Mon paire, lo darrièr còp que l'ausiguèri rire, mas rire rire, s'escacalassar a se n'escanar, èra quand dins son pòste poirrit de son forgon, la caisseta que metèri cantava aquò:




Clicar per legir las paraulas:

un dissabte de ser dins mon lièch

Ai agachat Pride and Prejudice. Quinas poliiiiiiiiidas istòooooooorias d'amooooooooor, acaaaaaaaba plaaaan.
Aviái l'impression de veire un remake del dessen animat Les 4 filles du Docteur

Aire de Prima

Comprèri a una tapa d'Occitània a Pè lo cd del grop Aire de Prima.E o regreti pas! E un buf de jòia e de bona umor... La primièra cançon es leugièra, gaujosa...me'n lassi pas! Es una cançon de Masino Anghilante, cançonièr de las Valadas que vos ne parlarai un jorn. Sas cançons registradas son raras, e aquí n'avèm una que vos farà doblidar lo freg que gela lo país d'aquesta passa. Escotatz-la, vos meti la paraula en bas del pòst.

Aire de Prima, anti deprima (èra aisida, o sabi). Cantan plan, lo piano es limit rag time, lo violon e l'acordeon petan plan... un plaser! E sabètz que ? I a una cançon tradicionala de La Gàrdia!
Una autra cançon que te fa bolegar sus ta cadièra..., un aire tradicional, e de paraulas de Diego Anghilante (lo filh de Masino Anghilante)


Languissi de los veire divendres 7 de novembre que faràn un concert per la fin d'Occitània a pè. E òc, i serai! E amb Mon celebrissim AmorósMaiContent.
See you alai!


Sèm mai de prima - Masino Anghilante
Chanta l’arsinhòl lo matin grí
amont s’la rama e n’estís pus luenh
na canarina enamoraa respond
e lo solelh qu’esponcha aut
nos eschauda lhi còrs
e ‘n pauc nos fai ‘sperar
al novèl temp
que portarè a tuchi nos
lo ben, la patz.

La neu, si ponchas vai fondent,
l’erbeta verda vai creissent,
la ceresiera s’es vestia
di primas fuelhas e primas flors,
la fontaneta chanta mai,
après l’uvèrn bo tot siu gel,
sem mai de prima e tuchi nos
chantem, chantem contents.

L'escòla, que la barran!

La posicion del Govèrn italian sus lhi contenguts de la reforma de l’escòla:

“Degun trucharè las pichotas escòlas de montanha, fòra que aquelas ambe menc de 50 escolars”.

La posicion de Lido Riba, President de L’UNCEM Piemont (Union Comunitats de Montanha dal Piemont):

“Lhi a 41 escòlas de montanha ambe menc de 12 escolars, que serèn destinaas a despareisser!!”

La posicion de Mercede Bresso (Presidènta Region Piemont) e de l’Assessora Regionala a l’istruccion Gianna Pentenero:

“Dins lo periòde brèu las escòlas de montanha serèn resparmiaa, mas après, ambe l’aplicacion del plan operatiu complèt, lhi aurè 180 Comunas piemontesas de montanha que perderen l’escòla maternala o elementara”

Fin finala, l’operacion portaré a la clausura de 220 escòlas de montanha sus las 260 que existon ara.

L’atac de la ministra Gelmini a l’escòla publica e, en particolar, a l’escòla de montanha es ben grèu. En aquest moment dificil per tota l’escòla italiana, mas sobretot per l’escòlas occitanas de las Valadas, chal far auvir nòstra vòutz, , per defendre la cultura e la civiltat alpina.

Lo 30 d’otobre tuchi a Coni a 9 oras dal matin en Plaça Europa ambe cartèls en lenga nòstra, nòstras bandieras e nòstra musica!!

Lo Quequejaire me manda un mp3 . "l'escòla qu'ei barrada" que podètz escotar e legir las paraulas çai-sota.

"l'escòla qu'ei barrada"
escrichaa per Bourguinat
cantada per Bourguinat e Poychicot au Hestau de Siròs de 1985
tirada del CD 40 ans deu Hestau de Siròs

L’ escòla qu’ei barrada


Arrepic :
- L’ escòla qu’ei barrada ;
On vau anar mamà ?
- Ne te’n hès pas, mainada !
Doman que s’aubrirà.

Mainadeta, abans dia,
Qu’atenderés lo car.
E lo ser, quina vita,
Tornarés hèra tard !
Montanhas shens mainatges
Qu’ei com un pòt shens flors.
Que haràn los vilatges
Shens las vòstas gaujors ?

Centralisme de mèrda,
Adara que n’i a pro.
Qu’èm pescuts com la gèrba
Dinc a la darrèra flor.
Au lòc d’aidar la vita
A s’estar aquiu-haut,
Per totas las combinas
Que la’n vòlen tirar.

Que cau aidar las montanhas
Que cau aidar los paisans.
Tot aquò son promessas ;
Que nse’n tractan com cans.
Puish a que taus har créder,
Que’us cau har drin lo mus,
Adar’ que ns’i van véder :
Avisatz-v’i monsurs

A Hauze1 barrèn l’escòla
Mes que caló aubrir
Sinon lhèu tots los bascos
Que’s serén esmalits.
A noste que n’i a de braves
Que n’i a tanben de hardits.
Per Bion non son pas ladres,
Vòlen pas aubedir.

mercés al Quequejaire per lo mp3

Soi a Sant Affrica pel collòqui de la Flarep.


A lèu!

Intoxicacion alimentària

Ièr mangèri un paket de M&M's. Los M&M's aquò se manja d'un biais compulsiu, un tras l'autre.
Levat que ne mangèri un qu'aviá pas bon gost, èra poirit o dins lo genre. Coma i aviá de monde, lo volguèri pas escupir e per far passar lo gost, ne mangèri lèu lèu tres o quatre de mai.
De vespre, rakèri mas tripas. Ai dormit de 20h10 a 07h00 e ara soi malauta.
VDM.

E lo mai polit es ....

Un jorn vos parlarai de cossí se rescontrèrem amb l'AmorósMaiContent. Per resumir anam dire que se pesquèrem un l'autre amb "Occitània". Ieu li mandèri de fòtos que lo dorsièr se disiá "aqueste país es lo mai polit". Rai, entre Catalonha e Occitània, Occitània ganha la palma dau país mai polit (pas complicat me diretz...). Non , seriós, quantes cantons i a de polits en catalonha? e quantes n'i a en Occitània? e ben vaquí, ganham. Puèi i a totjorn un catalan que te dirà "i la Vall d'aran? Això sí que és bonic" e tu li dises "Segur qu'es polida la Val d'Aran, normal, es occitana". Afar reglat.
Mas vòli pas parlar dau país, uèi parlarem linguistica. Òc.
Anam faire un défilé linguistic.
Mas vau resumir.
Mon tòp 3 dels parlars mai polits de la lenga d'òc:
- lo cevenòl
- lo brageiragués
- lo roergat
(tòrni prene los noms donats dins la mapa de la Gramatica d'Alibèrt)

me pensi qu'es rapòrt a mon istòria personala:
- lo cevenòl es lo parlar de la familha, mièg provençal, mièg lengadocian. Cevenas es tèrra de rebelion, emai en linguistica es rebèla :)
- lo brageiragués perque me lo calguèt faire meu per ensenhar alai. me regalavi d'escotar lo mond parlar.
- lo roergat, perque passèri totas mas vacanças alai, sul segalar, dins una bòria que tot lo mond i parlava occitan. (e òc, èra alai lo famós Rieupeirós...)

Escotatz un pauc... lo primièr extrach es una femna del vilatge de Joan Bodon, Ida Cròs, que demòra a Rodés e lo segond es un papet qu'ai doblidat son nom e que parla sus un DVD sus la castanha que podètz crompar al musèu de las Cevenas de Sant Joan de Gard. Pel parlar de Peiregòrd, n'ai pas sus aqueste ordenador, alara anatz escotar lo Verdier dins Meitat Chen Meitat Pòrc.


Se n'i a qu'aquò interessa, podètz ausir de roergats dins los 4 DVDs de collectatge prepausats per l'Institut Occitan d'Avairon o dins los collectatges de La Talvera. Ne podètz ausir tanben s'anatz dins lo país, qu'es encara çò melhor :)
Per Cevenas, pas gaire de collectatge de bon trobar, podètz anar veire mon papet se volètz ( o un autre papet, vos en voldrai pas) :)
Pel parlar de Peiregòrd, podètz anar rescontrar de mond a Sarlat, entre los toristas, i a de mond que parlan occitan!


Alara, la question del million, i a-ti un parlar que m'agrada pas? Òc. N'i a un que tròbi pas polit, laidàs, berk berk berk .Quin? Ben vos o dirai pas, que se vos o disi, vau perdre una part de mon lectorat (es que en mai d'aver un parlar pas polit, son susceptibles...) :P

Putan, uei ai fach de chauvinisme, marcatz-lo sul calendièr, akò m'arriba pas gaire!;)

Meitat Chen Meitat Porc , la cançon de Peiraguda

Vos parlavi l'autre jorn de l'emission en occitan de France Bleu Peiregòrd.
Lo títol, es una cançon de Peiraguda, aquí l'avètz:



Peiraguda, es un grop mai vièlh que ieu. Es de totes los vièlhs (Nadau, Marti, Patric, and co), son los melhors.
Urosament que me mandèron dins lo Far West, akò me permetèt de conéisser Peiraguda.

"lo camin es long que monta a nòstre ostal, dempuèi lo vent de mai al solelh d'abrial, si fasèm çò que cal, i farem carnaval, tut tu ttutuut tu tuututututututuuuuuuuuuuuuu"es una autra cançon... que m'agrada fòòòòòòòòòòrça

MonAmorósMaiContent

clica per escotar la musica pendent la lectura


Los catalans son los josieus de la romanitat (quand serai mòrta e famosa, n'auretz tot plen de citacions meunas de plaçar dins las dissertacions).
E MonAmorósMaiContent es un pauc josieu.
(L'avantatge amb el es que legís pas lo blòg, alara pòdi dire qué que siá, vos poiriái dire qu'a la quequeta tòrta que se n'avisariá pas.)
MonAmorósMaiContent es un pauc josieu. M'expliqui. Quand li pausi una question, me respond per una autra question e akò, o supòrti pas. I a lo classic
"- Quina ora es?
- Perqué? As pas de relòtge?"

(e precisi qu'a pas la quequeta tòrta)

E n'ai a bodre d'exemples...
- Dins quina carrièra es la librariá?
- Ara, ont siás?
- Sus la plaça del mercat
- Mas dabans lo mercat o d'esquina al mercat?
- DINS QUINA CARRiÈRA ES LA LIBRARIÁ , Macarèl!!!

(de tot biais, la quequeta de monamorósmaicontent vos interessa pas, lo primièr o la primièra que s'interessa a la quequeta de monamorósmaicontent es fòrabandit del blòg)

L'autre jorn:

- M'agradariá arribar als 1000 messatges pels 3 ans del blòg.
E sa replica:
- Ne fas mai de 300 per an.

De còps que i a, l'asiri.
.