10000 passes al Beny Bocage (Calvadòs)

La darrièra passejada normanda, la faguèrem lo 1èr de setembre al Beny Bocage, e aquò èra una passejada de las cranas, la que caliá per acabar las vacanças ! Tot lo percors èra per camins, pas de rota quitranada. La màger part dels camins èran a l'ombra, çò que deu èsser complicat quand la fas l'auton o l'ivèrn la passejada, mas per aquela fin d'estiu sec, eriam plan contents d'èsser a l'ombra de longa.

Dins las causas exoticas que m'agradan de Normandia, i a los bòsques, los arbres grands - benlèu ne metrai de fòtos en linha, veirem ben se n'aurai temps- e los camins : "les chemins creux". Sabiái pas cossí se ditz en occitan, ai cercat, lo diccionari de Rapin me dona "camin enclotat", "camin cau", "camin prigond". Son de camins entre doas randals d'arbres, d'arbres diferents, s'i recaptan las bestiòtas... Çò daumatge es que veses pas gaire lo païsatge, mas çò que veses davant es tan polit...

Lo vilatge es agradiu, beguèrem un panachat al bar-espicariá-estacionservici-pmu-tabat ont i a, graal, un babyfoot. 
Perdèri.
Mas faguèri tant rire la practica del bar a bramar, escridassar, sautar, qu'es tota una victòria. Oè, vertat, me consòli coma pòdi.

10000 passes a las 9 fonts (Lanas)

Parentèsi fòra temps dins lo bòsc de las nòu fonts. Degun a despart d'un pauc d'aiga e de doas tartugas que se solelhavan.  

10000 passes a Sant Justin (Pardiac)

Es pas vertat, ne faguèri pas 10000 de passes a Sant Justin, mas fa pas res ! Coma es un vilatge plan polit e que foguèt una suspresa, ne vos meti tres fòtos. 

La del mitan, se vei mal, mas aquò èra una exposicion de material agricòl amb de panèus amb lo nom en gascon dessús. 

Nos arrestèrem a Sant Justin per asard. Podètz manjar e dormir al Cadet de Gasconha : lo sopar es requist, lo vin es bon e la cambra tras que confortabla. 

Colleccion - Santa Fe la Granda (Dordonha i passa)

Païsatge normand estival

Se te passejas l'estiu per Normandia, te trapas de camps de milh e de camps d'una causa seca pel sòl. Aquò's lo lin que fan roire. #unautremonde.

Val mai se passejar al mes de mai, qu'a aquel moment lo lin es en flor e te fa de camps d'èrsas blavas, e es bravament polit. Mas plan segur, ne faguèri pas de fòtos.

Per ne saber mai sul lin que fan roire e per comprene lo perque de la causa, pòs legir aquò, ieu o te vau pas explicar, soi tròp colha e tròp canhosa.

10000 passes arrestats per una vaca

Colleccion - Carentan

10000 passes dins lo Pargue Natural del Cotentin

 Darrièr l'ostal del Pargue Natural del Cotentin, i a una passejada de far dins la palun des Ponts d'Ouve. Aquò's bravament polit e plan fach. Aquò èra un pauc exotic per ieu que sembla pas brica las nòstras paluns. 
Los observatòris de fusta per espiar l'aucelum son plan capitats.
De notar que lo camin es accessible als endecats.
De regretar: la dintrada es paganta. 

Sus las fòtos : lo païsatge,las esclapraduras de fèrre de l'òrt e per indicar lo camin e de panèus en normand.

Gileta, mal agusat (1)

Gileta a totjorn lo gèste lent e precís.
Es pas un poèta bracejaire. 
A lo gèste lent e precís.
Cada gèste correspond a quicòm.
Aquò deu venir de sa formacion scientifica.
E aquò me càmbia, perque dins mon còs a ieu, ai las mans qu'an montat una republica independenta e al dintre de las mans, ai los dets qu'an margat una confederacion anarquista.

Figuratz-vos que, ara, acusan mon còs de subversion del còs amic.

Tot comencèt de matin : la cafetièra de l'ostal de vacanças, la coneissiá pas. Èra una d'aquelas que semblan las professionalas del bar. La metèt en marcha en dire que quand èra jove aviá trabalhat dins un bar. Mas lo cafè, la mitat se vogèt a costat.

A miègjorn, al restaurant, lo servicial èra a mand de nos daissar la sieta sus la taula, te vaquí lo Gileta que te  faguèt tombar son veire de vin, e aquò me ragèt dessús, sul camisòt, sul denim, la totala. E lo servicial nos las donèt pas las sietas que li caliá netejar lo vin vojat sus la taula e pel sòl. Gileta, que voliá ajudar, ne faguèt tombar la banasta de pan. Ieu mòrta de rire, demandèri las sietas, i a de prioritats dins la vida.

De ser, per agachar lo balon de la copa del mond, se dubriguèt una cervesa. La cervesa petèt, se vogèt per tot per la taula del salon e pel sòl. 

Quita enfin d'èsser perfièch.
Aquò pega e aquò m'agrada.

Tròç de vida 024

Es un drollàs grandàs, tan grandàs coma magre, un despenja-figas vertadièr. 
Risolet als pòts, arriba cap a l'auto e me fa lo poton sul pic. Es simpà aquel dròlle.
Pausa son skate suls sètis de darrièr puèi se plega per s'assetar dins l'auto. 
Es polit coma un astre. A d'uèlhs de filha, de las cilhas longas, coma maquilhadas.
Charra e ponctua sas frasas d'un rire discret coma per se desencusar de parlar.
Va a una fèsta, sap pas tròp ont pròche de Besièrs
Telefona a son collèga per saber ont se tròban a Besièrs. 
Me maini de la complexitat per un adolescent de pausar una question simpla "ont nos trobam?", aquò li prendrà plan cinc minutas. Ne sorisi de sentir l'autre al cap del fial tan clar coma lo qu'es assetat a costat de ieu. 

Una festa de doas chormas d'amics. De foishencs e de besierencs. Sas explicas de las originas de las amistats son foscas foscas.

A benlèu pas 18 ans coma marcat sus son perfil de blablacarreja, lo permés, lo passarà dins dos ans, aprèp lo bac.

Prepara un brevet de mestieral ebenista e s'arregala. Aquí es en estagi e s'arregala. Li agrada de fabricar. Es urós d'aver trobat sa dralha. Son 14 dins sa classa. Dormís a l'internat, son 4 per cambra. S'endevenon plan. Es plan content de son licèu ont lo monde an pas missant esperit.

La rota entre Masamet e Besièrs vira, monta, davala e mai d'un còp, lo jove ditz qu'es una rota bona per i far de skate, soritz, s'i vei ja, coma los tipes que n'agacha las vidèos sus youtube.

Quand sèm a mand d'arribar a la gara, telefona a sos collègas que li fan creire que son partits. Davala de l'auto en dire que lo fan marchar, que devon èsser empr'aquí.

Lo daissi e vesi dins una 306 dos joves qu'an baissat los sètis e que s'amagan jos un lençòl. La vòlon far durar la galejada.

Son simpàs aqueles dròlles !