Gileta (1)

Lo primièr jorn, en plaça de me portar de flors, me portèt cinc plaquetas de chocolat negre crompadas al melhor chocolatièr de la vila.

Rapòrt Mission Gomina dijòus XII-21-17

Montèri dins lo tren de 6h43.
Gardèri una plaça a LaJefa.

Montèron LaJefa e Gomina en gara de Seta.

Davalèrem totes a Montpelhièr. 

Comencèrem de seguir Gomina tre la davalada del tren.
Carrièra de Magalona, LaJefa tira un pauc la pata.
Es que camina lèu aquela puta de Gomina, es magrostèl, sec coma un crostet, fa lo camin cada jorn, t'endralha la carrièra Daurada lèu lèu. 

LaJefa rabala, li fa mal la patèrna.

Me cal causir. 

Seguir Gomina, daissar lo soldat Jefa crebar carrièra daurada e menar al cap la mission o arrestar lo filatge e fracassar dins la mission ? 

Daissam pas un soldat crebar solet. 

Demòri amb LaJefa, perque val mai demorar amb son amiga que seguir un tipe que lo coneissèm pas.

Mission Gomina reportada a 2018.
Tòrni dire Mission Gomina reportada a 2018

signe!

Uèi -stop - Trin de 6h43 - stop - Gomina s es assetat en fàcia de ieu -stop - mission Gomina mantenguda - stop - deman cadun a son pòste stop

Evolucion de relacion

Amb Gomina, passam per totas las tapas de la relacion de parelh : l'òdi e lo mesprètz, lo partatge, l'erotisme. Ara ne sèm a la tapa "mistèri". Me'n pausi de questions sus el. La primièra: ont va? ont trabalha ?
Ai elaborat tot plen de possibilitats, totas condicionadas per sa lectura de Libé e son look. La primièra que me venguèt a l'esperit èra qu'èra un cadre del partit socialista. Mas semblava pas gaire deprimit aprèp las resultas del paure candidat socialista a las presidencialas que degun se soven pas solament de son nom. Aprèp, coma preniá lo camin del Peiron, me diguèri qu'èra benlèu professor de drech amb son look vieille France e son èrsa gominada. Mas sabi pas se los professors de drech legisson Libé.

Ai mes La Jefa sul còp, qu'ela tanben pren lo trin amb el, e lo vei cada jorn. Mas a pas avançat tanpauc. 

Lo còp passat, al sortir de la gara, li faguèri a la Jefa: "I a Gomina aquí davant, avèm pas que de lo seguir! " Mas ela, seriosa, li caliá anar trabalhar e lo voliá pas seguir, que se'n caga de çò que fa o çò que fa pas Gomina. Moè, ditz aquò, mas serà la primièra de me suplicar de li  dire quand aurai descobèrt ont va cada matin a 7h30 lo Gomina. 

Perque lo vau seguir. Pòdi pas esperar mai sens saber. Ja sabi ont va Poutine perque i passi dabans cada jorn .A oè, vos ai pas contat, cada matin, al trin de 6h47 qu'ara es a 6h43 que del còp diluns passat lo manquèri, i a un tipe que sembla Potina. Lo supòrti pas. E me'n cagavi de saber ont trabalha, mas l'asard fa que prenèm lo meteis camin. 
Mentre que Gomina que, el, vòli saber ont va, e ben avèm pas d'informacions. Universitat de drech? Una botiga de luxe de l'avenguda foch ? Avocat? Perruquièr per las vièlhas borgesas del clapàs? Sartre especializat dins las carvatas laidas?

Dijòus que ven que començarai mai tard que de costuma, prendrai lo trin de 6h43 e seguirai Gomina. Ai ja una tacatica : passarai davant el, al nivèl del Macdo de la Comèdia me doblarà e aquí zo lo seguirai.

Dijòus es Operacion Gomina. 

Cadun a son pòste! 

Tacatica ferroviària

S'assetar a costat d'un papet e lofar en se disent que lo mond acusaràn lo papet, seriá pas un pauc puta? 

De còps, ai vergonha, mas urosament, aquò me dura pas. 

Idòla

Soi fan fan fan









Soi fan fan fan, es geniala, me fa pissar de rire ! 

Purgatòri ferroviari

Los uèlhs clucats, ausissi lo jornal.

Lo papièr cracineja.

Es a lo plegar per poder legir.

Ausissi lo reliscar teune de sos dets sul papièr.

Ausissi lo fretar de sa vèsta contra lo papièr.

Ausissi son agach sus las linhas de Libé.

Profièchi d’aquesta intimitat sonòra amb Gomina que s’es assetat juste darrièr.

L’ai pas vist, mas sabi qu’es el. Al biais que lo plega son jornal. A la rapiditat que las vira las paginas.

Los uèlhs clucats, profièchi de nòstra intimitat, que o sap solament pas el que lo partatjam pas aquel moment.

Puèi, lo cracinejar del papièr es cubèrt per una convèrsa.

Arriba un conàs que s’asseta davant ieu. Es a parlar al telefòn a 7h15 del matin dins lo tren, es a far sos negòcis, es a parlar amb sa secretària o sa sòcia, Liliana, salòpa, perqué as respondut?, dins lo tren, al cap del tren, dins lo canton tranquillon ont lo mond i venon dormir, respecta pas res aquela putarassa. Li fau mon agach negre que pòt pas veire. A la caraca, te lo maudissi, invòqui totes los mals e totes los diables, que lo tròn de dieu lo cure, que lo cuol li pete, que la puta ronha lo rosegue. Que crèbe !!!

10000 passes a Morjon (Cantal)

 Amb Mar e Montanha, anèrem jogar a la fièira de la castanha que fa quasi trenta ans que la fan aquela fièira. Lo país es plan polit. Aquí quauques fòtos ! 

Ensenha del bochièr.

 Panèu a la Maison de la Châtaigne ont l'occitan, o vesètz, es plan valorizat.

 Vacas de Salers <3 i="" nbsp="">

Aviái pas mon autbòi quand las anèri veire, pecat, que m'agrada de jogar d'autbòi a las vacas.

Sabián viure lo mond : lo banc, al solelh, a l'abric del vent e davant lo païsatge, 

i auriái poscut passar la dimenjada! 

A costat d'un vilatge vesin, pròche de Calvinet, aqueste polit ostal estonant qu'es arredondit : 

es juste pila en fàcia del castèl de Lamothe: 

Ieu disiái qu'èra l'ostal de la mestressa del castelan, que l'arredondit, aquò's un pauc coma de braces que t'aculhisson. 
Mas internet te fa petar romantisme e imaginacion. Segon un parelh de sits que se devon copiars uns als autres, aquò èra lo granièr del castèl. 

Pfff! 

Quand serai rica, lo cromparai, l'adobarai e ne farai ma garçonièra.

Espital episòdi 2

Lo mètge me conselhèt d'anar veire un psicològa.

E ben al prètz d'una consultacion de la psicològa, l'anarà veire sa mameta, òu.

Es pres en carga. Tòrni dire: es pres en carga. 

De qué? Es a gratis? 

Ben ok, zo, fai tirar, i anam!

Ieu fau coma los vièlhs : 

Es a gratis? Zo, i anam! 

Es a gratis? Pren-ne cinc! 

Nos agrada pas? Fa pas res, es a gratis! 

N'avèm pas de besonh? Fa pas res, es a gratis, ne farem ben quicòm ! 

Doncas, la psicològa, li telefonèri, èra doblament a gratis qu'ai un forfach ilimitat. 

Per prene rendètz-vos. 

Me respondèt una secretària de la votz jove e cagòla. 

Aquò èra pas la secretària. Èra la psicològa. 

Aquí lo seriós de la causa ne prenguèt un còp.

M'anavi far psicologar lo cap e los budèls per una cagòla en balarina, una franja pels uèlhs, un leggin leopard e una saca en bandolièra!

Ai de principis ieu, e aquò, o podiái pas tolerar. Pas las balarinas, pas lo leggin, pas la saca per me sondar al mai dintre. Non pas! 

Vertat, mas, es a gratis.

Rai. 

Preni rendètz-vos.

E fau coma los vièlhs : 

"- Es ben a gratis?" 

que se caldriá pas trapar amb una factura de reglar a la fin, un pauc coma lo mecanician que te repara quicòm que li aviás pas demandat. Perque l'espital, es un pauc coma lo garatge, i coneisses pas res, mas i pòs pas escapar e sas pas jamai quina factura te tombarà pel suc. 

Las doas setmanas entre ma telefonada e lo rendètz-vos, i pensèri tant e mai qu'aviái una psicològa cagòla a balarinas que pudís dels pès. Mas i vau quand meme, qu'es a gratis. Coma los autres mètges e coma la rèsta de la vida, m'agrada mai quand es un mascle, e del còp m'auriá mai agradat un psicològ. Auriam pogut far un transfert de sai pas qué e bicar. Manca d'astre, çò qu'es a gratis, es amb una femna. Rai, es a gratis.

Jorn J.

Ai rendètz-vos a 15h15, arribi al secretariat a 15h14. 

- Ai rendètz amb Dòna ...

Mèrda, ai oblidat son nom. 

Girgonegi un nom qu'acaba en -és, s'apèla Martinez o Rodriguez o sai pas qué de sai pas ont. 

- Esperatz-la dins la sala d'espèra, vos va venir quèrre. 

Rai, soi arribada lèu per pas èsser tardièra, mas de sala d'espèra, n'ai pas vista. 

- Ont es? 

- Aquí davant.

- Los tres sètis aquí? 

- Òc, es aquò.

OK. Doncas aquò s'apèla un corredor d'espèra. 

Del temps qu'espèri dins mon corredor d'espèra, agachi lo radiator qu'a mai de tudèls que de radiator e risi. 

Un metge grand e polit passa.

Legissi lo nom dels servicis d'aqueste estanci, son totes espaurugants. Aquò parla de budèls, de càncers, de salopariás que te fan venir lo racavòmit. Me demandi s'es una tecnica per far fugir lo mond e los empachar de venir profechar de la psicològa a gratis. 

E aquí l'imagini ma psicològa, es a mand d'arribar e cal totjorn imaginar lo scenari, tecnica de subrevida.

E me meti un desfís : se carga de balarinas, i vau pas dins son cabinet. Non, non, non, nani, nani, nani, vau pas parlar a de balarinas que pudisson.

E me la fau ja la replica, simpla e eficaça : "- Dòna Zetofrè? - Non, non!" e me lèvi e me tiri d'aquí lèu fach.

Ahahaha, mon plan es   p e r f i è c h. 

I anarai pas a la psicagòla! 

Ai tastat... lo chocolat negre 100%

E ben o vos disi ieu, çò bon dins lo chocolat negre qu'aviái costuma de manjar, aquò èra las avelanas, aquò èra lo gengibre, aquò èra las granas de sesam e de quinoa, aquò èra las ametlas.

Que, o vos disi ieu, lo chocolat negre a 100% es tant amar qu'as l'impression de t'engolir l'amarum del mond tot. 

Ai ben ensajat d'abastardir mon chocolat negre 100% en cruscant un bocin de gengibre... aquò m'enfuoquèt la maissa! Lo sesam e la quinoa, es tròp pichonèl mon paure, se pòt pas cruscar dedins! Ne manjar amb d'avelanas, mas n'as vist lo prètz de las avelanas? 

O vos disi ieu, çò bon dins lo chocolat negre qu'aviái costuma de manjar, aquò èra la puta de sucre que i aviá dedins.