Es un imatge, solide.
Soi segura que i aviá un bearnés e un gavach qu'avián pas comprés. Servisson a aquò los bearneses e los gavaches, a te levar tot complèxe intellectual ( e fisic, mas aviam dich qu'atacam pas lo fisic)
L'amorós a un aparelh de fòtos tot nòu.
Fantasmava dessús dempuèi de setmanas.
Crompa-te-lo mon amor, fai-te plaser.
Josentendut : ieu te l'ofrirai pas, que còsta dos meses de salari ton camion de pompièr.
Alara, amb son aparelh tot nòu, fa de fòtos.
Pas de son amorosa nusa, non. Arrestem de fantasmar.
Lo tipe te pren de fotografias de babaus e d'aucèls.
Non, aquò fa pas fantasmar degun, es segur.
(a despart benlèu d'un bearnés o d'un gavach tarat?)
E coma es ben content, lo tipe a fach desvolopar sas fòtos.
"desvolopar" es un mot del sègle XX. Que coma i a pas mai de negatius, i a pas besonh de "revelar" ni de desvolopar.
Lo tipe a fach tirar sas fòtos.
Anèt a Casto crompar de cadres e n'acroquèt de'n pertot dins l'ostal.
De'n pertot ont i aviá de plaça.
Es a dire als comuns.
E dins la cambra.
Ieu t'aviái un guiraudet en fòto de mon costat del lièch.
Siás coma ieu, lo guiraudet, as pas idèa de çò qu'es. Es un aucèl, un bernat. E aquel guiraudet es pas tan crane coma lo bernat pescaire que coneissèm, lo gris, grandàs, magre, del còl en S, que s'envòla lentament. Non pas, aquel, lo guiraudet, es tristàs.
E un jorn diguèri a l'amorós :
- Ne pòdi pas mai d'aquel aucèl, sembla l'enterraire dins Lucky Luke.
Agachatz-lo :
Cada matin, cada ser, ai aquela bèstia que m'emmasca.
Alara, petèri mon cable, "vau cambiar la fòto". L'amorós se'n chautava, tant que las esquinti pas sas fòtos, las pòdi cambiar de plaça tant coma vòli.
Me levèri d'un còp, d'aquel vam decidit qu'an los que vòlon cambiar lo mond.
Mas retombèri sul lièch, qu'es bas e mòl aquela puta de lièch.
Rotlèri sul costat per sortir d'aquesta puta de lièch mòl e bas.
Cambiarai pas lo mond, rai, mas cambiarai la fòto.
Me roncèri dins los comuns, i faguèri mon pisson fòrt del matin e i causiguèri lo remplaçant del guiraudet sinistre.
Causiguèri las parpalhòlas. Pas las que son sul rotlèu, non. Polyommatus icarus de son pichòt nom latin. De parpalhòlas polidas polidas, que mon amorós las aviá trobadas pegadas una a l'autra, çò que mon naturalista d'amorós sona in copula.
Es ben mai inspiranta aquela de fòto !
