dilluns, 6 d’abril del 2020

Sine die - Jorn 25 - De l'espinchatge de la vesinalha

Passèri ma joinessa al campèstre, dins la palunalha.
Sens vesins. 
Sens ostals pròches. 
Luènh de tot e de totes. 
Un encastre ideal per començar l'autbòi.
Un encastre ideal per venir associala 
Un encastre ideal per suportar lo confinament.

Aquí, en cò de l'AmorósPecaire, sèm dins un lotejament a la con, un de mai, coma ne construsiguèron tantes dins las annadas 80 e coma contunhan de ne bastir en plaça de las vinhas. 

E ieu, m'o cal confessar, me regali de los espinchar los vesins.

E aquí, dins aquel país nordic, es lo paradís per los espinchaires coma ieu : lo mond t'an de fenèstras bèlas e te barran pas los contravents ni los ridèus. Es lo cinèma a gratis tota la jornada e tota la serada. 
E aquí dins los lotejaments, los ostals son quasi totes parièrs mas pas exactament, e me regali de los comparar.
M'agrada d'agachar al dintre dels ostals, l'organizacion dels espacis, lo mond que i a dedins, la tele, de qu'agachan a la telé, los ridèus, la color de las parets. Quants son? Qual arriba, qual se'n va? Ten, i èra pas aquesta veitura. Ten, a de visita aquel, pauròt. Mongeta a sos felens. An dinnat defòra. 

Lo lotejament es una sola carrièra que fa una mena de bocla amb un parelh de travèrsas.   E per arribar a 10000 passes cada jorn, la carrièra, vos la fau dins totes los sens e mai d'un còp. 
Coneissi TOTES los ostals. 
Susvelhi TOT lo monde. 
Ai de fichas sus CADUN. 

E ai fach de classaments : 
I a lo tòp dels conasses. 
I a lo tòp dels pecaires.

E ara, figuratz-vos qu'amb las mesuras de securitat patincofin, los pobelaires passan pas qu'una setmana sus doas. 
La setmana passada devián amassar las sacas jaunas, las del reciclatge, las sacas transparentas que veses dedins çò que lo monde i an escampat. 

PI VE LAT GE

Èri partida sus un grand projècte sociologicoartistic sul vesinatge.
L'idèa èra de far de fòtos de las sacas jaunas sul trepador, e a partir d'aquí, escriure un pòst pel blòg. A partir d'una fòto un pauc estilizada, sabètz.
L'idèa de la setmana.
Ne parlèri, estrambordada a ma mòda, a l'AmorósPecaire que sortiguèt un "òc, se vòles"  pauc convençut. Es totjorn mièg-pivelat, mièg-espaurugat, pecaire.

Aviái de dobtes : fa pas un pauc psicopata de fotografiar las pobèlas dels autres? 
"Ben si".
Bon, daissèri tombar l'idèa del sègle.

Mas aviái JA fach quauques fòtos de sacas jaunas. 

Uèi es diluns, e aquò èra lo teaser de la setmana ! 






Cap comentari:

Publica un comentari a l'entrada

Mercé :)