Sine Die - Jorn 30 - Del grand revenge sus l'injonccion sociala

Jorn 30. 

Coma es una chifra redonda, anam profechar per far lo punt, ok ? 

Egoïstament, vivi plan la causa.

La sola causa que me pesa dempuèi la debuta, e encara, aquò va plan, es la privacion de libertat, de pas poder anar passejar coma vòli. Per la rèsta, ai pas fotut un pè dins una botiga dempuèi mai d'un mes, ai pas vist degun in real life a despart de mon amorós dempuèi tres setmanas, e aquò me va plan.

Me fau un pauc de lagui per mon ostal e de còps, m'agradariá d'èsser a cò mieu, dins mon bordèl a ieu, mos libres a ieu, mos DVDs a ieu. Mas me pòdi pas plànher, l'ostal de l'amorós es confortable e a un òrt agradiu, e d'aquò ieu a Besièrs, n'ai pas. 

Fin finala, lo sol problèma qu'ai, es que i a pas mai de tencha dins l'estampadoira. 

Es sabes çò que fas quand i a pas mai de tencha dins l'estampadoira? E ben estampas pas ! 

Tre mon arribada, diguèri a l'Amorós de comandar de tencha, çò que faguèt lo tipe, mas lo paquet es pas encara arribat... E ben estampi pas! 

Puèi dins aquelas setmanas d'embarrament, i a de causas que me regaudisson : 

ES LO GRAND REVENGE ! 

Enfin ! 

Totas aquelas annadas a dever respondre a l'injonccion de far d'enfants, a pensar que non, aver d'enfants te fa pas mai urós, a dire qu'a ma vida, non, li manca pas res.

Vos l'empegatz ben ara vòstre bonur d'enfant ! 

Tota la jornada, cada jorn a lo dever ocupar. 

Tota la jornada, cada jorn, sens aver una ora per te contemplar l'emboliga.

Tota la jornada, cada jorn, li dire e tornar dire las meteissas causas : de se levar, de se vestir, de metre la taula, de t'ajudar, de patin, de cofin. 

Tota la jornada, cada jorn, aquelas putas de devers de continuitat pedagogica que ton dròlle i compren pas res perque n'as fach un abestit e que ton adolescent lo fa pas perque es un fenhantàs insolent e ingrat.

A ma vida, li manca pas res. 

Mas tu, paure parent, as pas l'impression que te li sòbra quicòm a la tieuna de vida ? 

Ieu quand los parents començan de contar sa misèria de parents confinats, preni los pòpcòrns e me chali, me regali, me congosti d'aqueste grand moment de jubilacion.

REVENGE !