Los vesins qu'espinchi mai son los d'en fàcia.
Normal, es çò mai aisit.
Ai d'excusas normalas per aquò far : dubrir, tancar los contravents, netejar los carrèus, sortir e far qu'agachi las flors dins lo jardin davant l'ostal, anar quèrre lo corrièr en sabent que lo factor passarà pas qu'un còp en fin de setmana, anar a l'auto, dubrir la fenèstra, la tancar, o tot simpletament, espinchar per la fenèstra francament.
Mas se los espinchi los vesins d'en fàcia, es pas perque es mai aisit, non pas, es que son los mai... intrigants!
Figuratz-vos que los vesins d'en fàcia son lo QG, lo grand bòsso, lo place to be, la referéncia dels testimònis de DjobiJeoba de la vila, del departament, de la region, que té sabi mai encara!
E ieu aquò, vos podètz pas imaginar coma me'n pausi de questions dessús !
Los espinchi de longa.
E lo dissabte, es jorn de fèsta !
Çò que vesi ieu es lor pòrta de dintrada e totes los anar-venir e un bocin de lor salon.
E de qué i a dins lor salon? PAS RES !
I a pas res.
Lo vuèg intersideral.
Mas lo dissabte de matin, aquò s'emplena de cadièras, sabètz, d'aquelas cadièras de plastic marronàs que s'apilan? sai pas d'ont las sortisson ni ont las apilan los autres jorns.
Perque lo dissabte de matin, fan una mena de mèssa e i a totes los DjobiDjeoba qu'arriban, prenon totas las plaças del quartièr amb las autòs, son pas ecologistas los DjobiDjeoba, prenon pas lo bus!
E me demandi ieu se los vesins son los patrons de DjobiDjeoba o se son los paures colhons que prèstan son ostal, perque aquò fa partida del contracte quand dintras dins la sècta : Ton ostal es mon ostal e farem los acamps, la mèssa e los sacrificis de las chatas lo dissabte a mièjanuèch dins vòstre salon.
E me demandi ieu se los vesins la fan la mèssa o i assistisson solament.
Son los papas de DjobiDjeoba o pas?
M'agradariá d'o saber s'avèm coma vesins de grands gorós o de paures cons victimas d'una sècta. Es pas lo meteis standing, où.
L'AmorósPecaire me diguèt qu'èra DjobiDjeoba que lor pagava l'ostal.
Cossí a l'informacion lo tipe? O sabèm pas.
Sabèm qu'un païsatgista se ven entrevar de l'òrt. E sabèm qu'aquò còsta un ronhon.
Sabèm que lor òrt es plan mai polit que lo nòstre.
Oè, mas Dieu es dins lor equipa.
Los vesins grandsgorós DjobiDjeoba son dos vièlhs, una mameta e un papeta, que devon aver quicòm coma 80 ans.
Lo vesètz arribar lo film dels dos vièlhs proprets, bravets, aimables que te tenon tot lo mond per las colhas amb sa sècta?
Perque, òc, son proprets, bravets e aimables.
Enfin, mai que mai, ela. Que me fa totjorn un signe de la man quand nos crosam quand dubrissèm los contravents.
E el, lo vesi pas sovent, e el me vei pas jamai, es avugle, pecaire.
E l'autre jorn, de qué te vegèri pas ?
La mameta, pendent la messa dau dissabte, èra tranquillon Milon a la fenèstra de l'estatge, coma una adolescenta que se fumariá son espinèl en plaça d'anar en cors !
Manquèri de li dire "E ben, de qué fotes aquí la vièlha a la fenèstra ? Vai-te'n escotar l'endoctrinament! Mescresenta!
Alara, o es una rebèlla de DjobiDjeoba, o es ela que fa la prèira e l'esperavan per dire la messa e se fasiá desirar al biais superstar, o alara es la subrepatrona que s'abaissa pas a assistir a aquelas causas.
Vos o disi sulpic : la responsa, l'ai pas.
E aquò m'emmèrda bravament.
Un jorn, i vau anar, vau tindar, vau dintrar e bramar "ME CAL SABER".
Cada jorn, per nòu oras, arriban dos, tres o quatre DjobiDjeoba, dintran sens picar a la pòrta, prenon dins lo garatge lo material per tapinar e se'n van amb lo vièlh. Sabètz aqueles carretons qu'an los DjobiDjeoba ont i a marcat de frasas a la con per agantar la practica. La dimenjada son mai nombroses, se repartisson dins las autòs e se'n van tapinar en vila o dins los vilatges a l'entorn. Prenon pas lo bús perque devon coveiturar e carrejar lo carreton de las frasas JesúsT'Aima, es pas una question ecologica, es una question practica.
La vièlha demòra totjorn a l'ostal.
Benlèu fa de teleDjobiDjeoba? Manda de spams djobiDjeoba?
L'autre jorn, lo vegèrem lo vièlh, èra pas a tapinar DjobiDjeoba, èra a beure un còp en terrassa en vila. A bona esquina lo recrutament, ten.
Ara, amb lo confinament, e ben los DjobiDjeoba venon pas mai lo dissabte.
Ara, amb lo confinament, los jorns se semblan totes.
Ara, amb lo confinament, se'n van pas mai tapinar amb son carreton DequétepòrtalaBiblia suls trepadors de la vila.
Ara, amb lo confinament, se passa pas res pus dins l'ostal dels DjobiDjeoba.
Ara, amb lo confinament, son los vesins mens interessants de la carrièra.
Cap comentari:
Publica un comentari a l'entrada
Mercé :)