dijous, 29 de juny del 2017

Lo tipe del TER de 6h47

Fa un pauc mai de tres ans d'aquò, vos faguèri lo torn del mond que crosavi cada diluns de matin dins lo TER. I escupiguèri sens vergonha sus un paure òme jol pretèxt qu'èra gominat e qu'aviá un mantèl en pels de borra de cuol de lapin.

Bon ben a pas cambiat. 

I es totjorn.

Levat qu'es l'estiu.

Se gomina pas mai. Sabi pas s'es per economia, qu'aquò còsta car la gomina, o es perque susa e aquò fa desgulasse amb la gomina o s'a enfin comprés que la gomina, èra a la mòda en 1955, amb l'aiga de colónia e lo Varon Dandy.

E puèi, a pas mai de borra d'animal sus l'esquina. 
Es benlèu vengut vegan.
O es en causa de la calorassa.
O sabèm pas.
E li anam pas demandar.

L'autre jorn, s'assetèt a ma taula. Oè, ieu preni la taula del fons dins lo tren, cada matin. E quand es pas liura, ai las colhas al revers per la jornada, mesfisatz-vos.

Capeja per me saludar, perque es un tipe educat.

Gara del Clapàs. 
Se lèva abans ieu, me lèvi tanben e vesi qu'a oblidat Libé sus la taula. 
- E lo prenètz pas Libé
- Non non
- Lo pòdi prene? 
- Solide. 
- Mas l'avètz legit? 
- Òc.
ok, lo tipe te legís Libé en 25 minutas. E lo daissa dins lo tren. Ieu i tròbi totjorn dins lo tren aquela merdassa de 20 minutas.

Me lo prenguèri son jornal.
- Mas lo poiriatz gardar per lo legir en tornar de vespre?
- Non pas, que cromparai Le Môôôônde, que me fa amb un grand sorire. 

Dempuèi, nos fasèm tot plen de risolets complicis. #amicsdejornal

Del còp, culpabilizi de l'aver tan criticat sul blòg.