dilluns, 31 de maig del 2010

Una nuèch amb l'òme invisible

L'autbòi e los vesins 4 e fin

Ma tata amb la pas-tranquilla del vilatge:

- Mas qual jòga de trompeta?
- Es pas de trompeta.
- e de qu'es?
- d'autbòi
- e qual ne jòga?
- ma neboda
- ta neboda? e de qual es la filha alara?
- de mon fraire
- e quant a de temps?
- 30 ans
- a, e ont demòra?
- pròche montpelhièr
- e qué fa?
- es professora
- e es maridada?
- non
- e perqué es pas maridada?
Ma tanta que n'aviá son confle de l'interrogatòri:
- perque aital se pòt tirar totes los tipes que vòl sens dever donar de comptes a qual que siá.

E la caluga, moqueta, pausèt pas mai de questions



Mas cossí o sap aquò ma tanta????

diumenge, 30 de maig del 2010

L'autbòi e los vesins 3

Una autra femna arrestèt ma tanta...
Ma tanta qu'aviá vergonha diguèt pas qu'aquò èra d'autbòi lengadocian jogat per sa wonderful neboda... mas la vesina,melomana, diguèt:

 - Remarca, aquò's pas pièger que lo mond que te passan la tondusa!

dissabte, 29 de maig del 2010

L'autbòi e los vesins 2

Ma tanta èra a contar lo dialòg amb lo vesin curiós (enfin, vesin... demòra a 500 metres):

- Diga, i a pas quauqu'un que jòga de trompeta per en cò tieu?
- E ne siás plan segur qu'aquò's de trompeta?
- E solid, que jogava d'aires de corridas!!!

que mon autra tanta que m'aviá ausida jogar diguèt:

- e ben sai pas se i aviá d'aires de corridas, que i soi pas jamai anada ieu a la corrida, mas as jogat " a la font de nimes"... Enfin me sembla, è...

Of. Urosament qu'ai una tatà per me defendre, ten.

divendres, 28 de maig del 2010

L'autbòi e los vesins 1

Anèri en cò de ma tanta, dins lo vilatge de mos avis.

Joguèri d'autbòi sus la terrassa. E l'autbòi, benlèu o sabètz pas, mas es una causa que fa de bruch... e d'una montanha a l'autra, m'ausiguèron coma cal lo mond.

Dins lo vilatge un tipe arrestèt ma tanta que se congosta de prene lo mond per de cons...:

- Diga, i a pas quauqu'un que jòga de trompeta per en cò tieu?
- E ne siás plan segur qu'aquò's de trompeta?
- E solid, que jogava d'aires de corridas!!!


Seriá-ti un signe que me cal melhorar lèu-lèu?

dijous, 27 de maig del 2010

36 37 : ma mameta legís

Ma mameta dins la cosina, per lo gostar:

- E ben soi a legir un libre que dedins, i a un tipe vièlh de 84 ans, qu'una femna jovenòta e sexi decidís de se botar nusa dabans el per que veja una femna nusa  (coma se n'aguèsse pas jamai vista!). E ben lo libre ditz "et devant elle se dressait le sexe de l'homme , bien raide, bien dur, bien nerveux". Pffff, 'bien raide, bien dur, bien nerveux' e ben, aquò se vei que l'autor a pas jamai vist lo robinet d'un vièlh de 84 ans. A 84 ans, es pas sovent bien raide, bien dur, bien nerveux.".


finalament, es benlèu de familha.

dilluns, 24 de maig del 2010

rebat fotografic e forra borra d'una dimenjada solelhosa

Pas lo temps de vos contar, alara vos meti las fòtos e imaginaretz solets :)))
Èra una dimenjada de las que fan de ben :)


Fasiá moment!

Una fòto de pès amb una part dels fantons de pichona seccion:

LaRomegairaTòpModel (es just per la far biscar), LaProvençala, LaquedreicètlocavalperfartombarGiorgioArmani, Austinpowers, Pompomdrolleta, Paderna e ieu! 

 Mercés Fantons!! :))))

divendres, 21 de maig del 2010

La vida segon Mela (2)

A ieu çò que m'agrada de la prima, son los picanicas de fin d'annada
Akí sota, lo pastisson que faguèt un escolan alsacian.
En mai d'akò, i metèt pas gaire d'alcòl que sap qu'aquò ma'agrada pas gaire, son bravets aqueles pichons.
Remiratz-me aquò:
Èra tròp tròp tròp bon!!!

dijous, 20 de maig del 2010

Istòria urbana

A Seta, i una ostalariá que se la peta grèu sul canal. Ja, lo nom: "le grand hotel", es una ostalariá prot prot qu'una cambra laida te còsta al mens 150€, emai las cortinas siaguèsson afrosas, mas rai.
Just a cost de l' hotel de luxe, i a una botiga que pas degun la vei.
Es una botiga pichona pichona e vièlha vièlha.
Dedins, i a pas degun.
Defòra, i a pas de panèus per dire lo nom de la botiga.
Dins la veirina, i a causas vièlhas blanquidas o cremadas pel solelh: de rasclaires electrics (lo prètz es en franc o en euros?) e de cafetièiras.
E a costat, una molonada de pilas. De redondas, de cilindricas, de cairadas. Totas alinhadas coma cal. Una armada de pilas.
E perqué las pilas son alinhadas sus las laissas?

Lo veire de la veirina e de la pòrta, fa moment que l'an pas vist passar lo toalhon... nimai una man per la butar la pòrta.

Pas de lum dins la botiga, pas de movement.


Una botiga fantauma. La que pas degun vei, mas qu'es aquí pasmens, e lo que la vei e ben aquò lo tarabusta.

Puèi en tornant passar, volguèri far una fòto de la botigueta.

E dins la botiga, entre doas molonadas de pilas, vistalhèri una vièlha pichona de las lunetas espessas qu'èra a s'afanar. Recaptèri mon aparelh abans de l'aver sortit e fugiguèri.
Las trèvas me fan paur.

dimarts, 18 de maig del 2010

me faguèt rire :)



Mercés a Galon que me mandèt lo tub de Regg'lyss!

dilluns, 17 de maig del 2010

Los glacets son acabats

Crompèri recentament un disc de Stefano Valla e Daniele Scurati. Stefano Valla jòga de piffero, un autbòi italian e lo segond jòga de fisarmonica aka d'acordeon cromatic.

Un extrach: una pòlca que me fot lo blues e que lo títol m'agrada.






Mai d'extraches per aquí
.

Mas qu'agachan lo mond?

diumenge, 16 de maig del 2010

Atissa-te sus ton autbòi

D'aquesta passa, m'atissi sul repertòri de las ajustas. Non, vòli pas anar jogar sus la barca, kò's pas brica ma tòca dins la vida. Mas i a de tròces que m'agradan :) 
Aquí sota los avètz dins l'òrdre de "i arribi plan de còps" a "puta de musica d'ajustas de mèrda".  

La valse de Louise:

Aqueste tròç es pas jogat sovent. Se ditz la valsa de las barcas, vos metèri una video muda fa d'annadas de la valsa de las barcas... e ben vaquí, ara avètz lo son :) Es polida, è?


Le Défile Aillaud:

Fa moment que sabi faire la debuta... saurai far la fin dins pas gaire :)


La Valse du Chef de Gare:



Aquel tròç dubrís la Sant-Loís, la fèsta bèla de Seta.

Le Défilé Larose:





Tot aquò's tirat d'un libre bilingue Musica de las ajustas per autbòi e tamborinet La Musique des joutes languedociennes, répertoire pour hautbois et tambour d'Alain Charrié e Philippe Carcassés que s'i tròban: las particions ( autbòi 1, autbòi 2 e tambor),  de fòtos a bodre e de las vièlhas!, una explica per cada musica e lo CD amb los tròces jogats per ALain Charrié, Philippe Carcassés e Jean Louis Zardoni. Es pas de bon trobar, lo podètz comandar al Carcassés o lo podètz manlevar al CIRDOC a Besièrs o al Conservatòri Occitan de Tolosa.

Passejada a Seta per ImageSingulieres

Dissabte, coma deguèri anular ma wonderdimenjadagascona, m'anèri passejar a Seta tota la tantossada. E , saique, caminèri! FAguèri lo torn d'ImageSingulières, rescontre fotigrafic a Seta. E èri pas la sola d'aver agut l'idèa. I aviá de mond a Seta, e tot plen de fotografs amb d'aparelhs grossasses :)

Daissèri l'autò dabans lo CRAC, que i a totjorn de plaças. 
Lo CRAC, akò's un bastiment laid, luènh de tot, un ancian frigo ont servavan lo peis e ara n'an fach un Centre Regional d'Art Contemporanèu. Concession facha als intelectuals montpelhierencs diràn d'unes... Lo Setòri que se respecta i a pas jamai fotut los pès. Sabon pas que i pudís pas mai lo peis


I veguèri doas mòstras una de Mickael Ackerman que sas fòtos m'agradèron pas gaire.

E una autra que m'agradèt fòrça! "Portraits d'une PME" de Rajak Ohanian.Son de retraches en pè dels emplegats d'un PME, amb lo nom del mond e sa fonccion dins l'entrepresa. Lo biais de se tenir, los vestits, los noms arabs poloneses e portugueses... amb 3 o 4 familhas dins l'entrepresa. I passèri de temps sus aquela de mòstra! Finalament, me pensi que la fotografia sociala, aquò m'agrada :)

Puèi, anèri a la Galariá Docks de Sud, sul meteis cai que lo CRAC. Passèri lo pont, endralhèri lo CAnal e anèri al MIAM. Bòf. Puèi contunhèri cap al Decòr, un luòc novèl amb un restaurant que nòti dins mon quasernet de restaurants ont me cal anar. Pas d'orgasmes fotografics per ieu.  Mas , fa pas res, akò m'agrada de passejar per Seta, d'agachar las fòtos e d'ensajar de comprene la volontat de l'autor e de legir los vejaires dels critics que se segan aquí dessús.

Puèi, caminèri pel Quartièr Naut per arribar a la Capèla que sabiái que i aviá una Capèla alai. E ben es una capèla desafactada, un pauc roots, o cal dire, e aquò m'estona del Conse de drecha. E aquí dedins una mòstra d'un Danés Jacob Holdt encara mai roots que laCapela que trevèt America dins las annadas 70, a l'epòca, èra ja un hippie, M'agradèt aquela, podètz veire de fòtos per aquí


Del Quartièr Naut davalèri cap al Teatre de la Mar, faguèri plan d'i anar a pè, que i aviá un tap enòrme d'autòs plenas de toristas.
Dins la sala Tabouriech i aviá de fòtos de Juliana beasley una americana qu'aguèt coma mission de faire un retrach fotografic de Seta. E ben, la resulta de son trabalh/sejorn de 5 setmanas m'agradèt!
Puèi tornèri a pè cap al Crac, notèri un restaurant de mai dins mon quasernet de restaurants ont cal anar, pròche de la Criée.

Prenguèri l'autò e anèri a l'ancian collègi Victòr Hugo ont veguèri 3 mòstras.
Una que m'agradèt èra diferenta de las autras de mòstra, èra pas l'òbra d'un fotograf; èra una seleccion de fòtos amb las legendas dins la premsa regionala. Me faguèt riiiiiiire. "Les Belles images de T & G" la presse quotidienne régionale passée au crible de l'absurde par Taroop et Glabel, soi fan.


Dins la cort del collègi, i aviá una mòstra amb de retraches de carbonièrs d'uèi de la mina ont trabalhava Stakonhov. De fòtos de Gleb Kosorukov que podètz veire sus son sit internet. M'agrada!
L'escalàs de la jornada foguèt per akò:

Puèi, tornèri prene l'autò per anar als Chais Skalli ont i aviá doas mòstras. Una de fòtos d'androgins e l'autra titolada "Histoires de France 1958-2009". Los Chais Skalli de Seta son pas mai utilizats coma chais. Es un espaci bèl desafectat que Skalli presta a la comuna e a l'associacion Cetavoir per ImageSingulieres. M'agradan aqueles espacis bèls qu'an una istòria e que, quand marchan pas mai, son desvirats de son utilizacion primièra mas que i veses encara lo material , l'organizacion o las odors de sas activitats passadas.



Puèi caminèri cap a l'espaci nòu modèrn que pudís la dardena de Promeo per la mòstra de Dominique Delpoux. Dominique Delpoux... lo coneissi! Es lo fotograf de la Talvera!!! Coneissiái pas son trabalh en defòra de las fòtos per la TAlvera, e ben , agachatz son sit e veiretz tot çò que fa, reverta pas brica sas fòtos amb La Talvera! A sa mòstra , i anèri just abans lo vernissatge e gausèri pas de l'anar saludar. Quana cona que soi!

Tornèri a l'autò qu'èran 6 oras, aviái passada la tantossada a caminar per Seta, a veire tot plen de fòtos e a dintrar dins de luòcs que coneissiái pas. Çò que m'agrada de las mòstras fotograficas, en mai de las fòtòs, segur :) es l'organizacion de l'espaci. Cossí una sala es valorizada per las fòtos, cossí las fòtos son organizadas dins l'espaci, patin cofin. Me regalèri :)
I a tanben una mòstra en mar que veguèri pas sul brise-lames (cossí se ditz en lenga d'òc? brisa-ondada? brisa-ola? cassac-ol(h)a?) perque caliá prene lo batèu, pagar 10 euros, e aviái pas enveja d'o far, regreti un pauc :P
Agachatz coma sembla polit:




ImageSingulières, fins al 30 de mai a Seta, a gratis.

Tout fout le camp ma pauvre Lucette

Abans, lo mond sortissián sa cadièra plegabla, s'installavan e agachavan passar lo mond.

Ara, i a pas mai de cadièras plegablas:

Còrdas

Pas mai besonh d'anar a Decatlon per crompar de còrdas, ai trobat çò que cal a Seta:

dissabte, 15 de maig del 2010

pas benvenguts...

Panèu vièlh vist sus un ostal de Montanhac:

dijous, 13 de maig del 2010

Coma qué, quand òm vòl, òm pòt...

Anèri al licèu d'Aurenja. 
Lo licèu d'Aurenja a totes los panèus de totes los bastiments bilingues.
Òsca al professor de lenga d'òc e al mond que sostenguèron lo projècte :)

Mòstra un còp de mai que la senhaletica bilingua, akò còsta pas car, basta d'o voler. 

Fa de ben de veire la normalitat de còps.












dimecres, 12 de maig del 2010

Terapia culturala

Coma lo qu'èra monAmoróspertotjorn m'abandonèt sabèm pas tròp perqué - a si, o sabèm perque la vida es una puta ... qual a dich "e el un conàs XXL"?,  me cal tornar trobar lo gost.
Qué melhor que l'estiu e totes sos festivals, sos rius e sos campings per doblidar los malastres e las penas del primièr semèstre de 2010? E ben, la vau far caufar l'agenda, o vos disi!!


L'estiu comença deman amb lo Festenal TradEnvie que i vau 4 jorns per faire un estagi de clarin amb lo Pèire Rouch, lo clarin aquò's un autbòi pichonet plan mai somari que l'autbòi lengadocian (aquò se vei que soi de Lengadòc Bas?).
Anarai tanben als concèrts e balètis prepausats que la programacion es bèla mas vòli veire mai que mai Savaty Orkestra que çò escotat sul myspace m'agrada bravament! Partissi dijòus de matin e tòrni dimenge dins la jornada, i a de plaça dins l'autò per los que ne vòlon profechar. Farai de camping, pareis que dormirai sul pelenc de l'estadi de Pàvia, e akò marcarà plan sus mon CV. Serà l'escasença de descubrir Gèrs e sas bastidas... e sai pas qué mai encara. Me languissi de partir!



La dimenjada seguenta, los 21, 22 e 23 de mai, m'agradariá d'anar al 13en festival de Joutes Musicales de Printemps a Correns dins Var que la programacion aquí tanben es d'una granda qualitat musicala, amb tres noms que bastan per ieu: Marc Perrone, la Chemirani family e La Talvera


Aquò's organizat per Le chantier que prepausa totjorn de causas interessantas e que recebi sa reclama sovent e que me fa plan sovent lingueta mas Var es luènh... D'aquí lo "m'agradariá" de la debuta de la frasa... Se de mond vòlon venir, coma abans, i a de plaça dins l'autò. Serà tanben l'escasença de descubrir Var.

Lo dimenge 30 de mai, jògui d'autbòi a Agde, sai pas ont ni a quina ora.
Lo dissabte 5 de Junh, jògui d'autbòi a Seta, sai pas ont ni a quina ora.



E lo mes de Junh es lo mes de Total Festum , la fèsta bèla ideada e subvencionada per la Region Lengadòc Rosselhon. Lo principi: de fèstas dins totes los vilatges per promòure las lengas e culturas occitanas e catalanas, fèstas organizadas per d'associacions localas amb de subvencions de la region, es un festenal que en 2 ans, s'es plan installat. E lo programa es tras qu'interessant... amb lo problèma dels cavalcaments de serada... mas bon :) Lo programa detalhat es aquí: laregion.fr
First of all, serai lo dissabte 12 de Junh a Carcassona per la jornada d'inauguracion o sai pas tròp qué, mas i serai, ja, per montar e desmontar l'estand de la FELCO :). Serai contenta d'aver de veire las catalanadas: castells, grallers, e la còbla Millenària amb DJ rAlph que me sembla que veguèri un reportatge dessús sus Viure al País en catalan e aquò me semblèt interessant.  I aurà tanben d'autbòis, ieu i jògui pas dedins, mas me regalarai de los escotar :)

Lo dimenge 13 de Junh, a Ginhac, pas luènh de l'ostal, i a un concèrt de Wonder Laurent Cavalie e d'Hum Trio, plan possible que i ane :)

Lo divendres 18 de Junh, jògui d'autbòi a Seta e i a una serada sai pas de qué.
Lo divendres 23 de Junh jògui d'autbòi a Narbona :)





Lo 25, 26, 27 de Junh, me'n vau en Auvernhe al festenal Hautes Terres a Sant-Flor, coma plan sovent mercés a l'amiga WelcomeToMarijuana :). Ongan, i a tot plend e causas interessantas, que, aquí tanben, la programacion es itneressanta, e parli pas de Nadau nimai d'I Muvrini, d'eles me'n foti. Le band, Duo Artense, Une Anche Passe, La Talvera, e plan maites, mas amb aqueles quatre, la dimenjada s'anóncia excelenta :) 
Hautes Terres, i anèri tot plen de còps e ne vos parlèri, clicatz!


Debuta de Julh, i a lo festenal Samba al País a Montalban Negrepelisse.Sai pas se i vau o pas. Aquò vos ditz?


Lo Dissabte 10 de Julh, VIRABALÈTIS a Bosigas, very important!!! Amb una mòstra e de conferéncias sus l'autbòi, e big balèti los pès dins l'aiga amb Biscam Pas e les Souffleurs de Reves, e sai pas qual mai encara. DE PAS MANCAR.


Lo dimars 13 de Julh, i a Mauresca Fracas Dub e les Souffleurs de Reves a Saurat en Arièja ddins l'encastre de Festen'Oc mas sai pas se i anarai.

aprèp i a dilema:

Al meteis temps i a CAmins de Crabas a Mazamet (16-18 de Julh) e lo rescontre a Saint chartier (15-18 de Julh) ont i aurà tot plen de lutièrs. Las finanças decidiràn.


Del 26 al 31 de Julh, serà Estivada a Rodés, que lo programa es pas encara publicat, que son nècis, mas sabi que i a La Talvera :)  e dormirai a Layoule.
Lo dissabte 7 d'agost, jògui sai pas ont.



Del 19 al 22 d'Agost, serai a Pau pel festenal Hestiv'Òc amb mos amics la Marieta e lo Pèire de la Sauma que m'auràn ja suportada quauques jorns abans a son ostal del Pireneu :) que, de tot l'estiu, es çò que me triga lo mai :)

Dins tot aquò, me cal plaçar: una dimenjada e de jorns de passejada amb mon amiga americana CelinaDion, una escorreguda en bicicleta de 4 jorns amb Pomponeta, una escorreguda sai pas cossí amb mon amiga CelineMorientes e un pichon torn dins un canton d'Occitània lonhdan: Valadas d'Itàlia, Val d'aran o Lemosin o alara en Itàlia :)


Las vacanças s'acabaràn per ieu lo 23 d'agost e se, amb aquel programàs, la doblidi pas mon istòria garrèla d'amor impossible, e ben, anarai a Decatlon, qu'an de còrdas de bona qualitat.

dilluns, 10 de maig del 2010

Burèu de las reclamacions , bonjorn!

Abans que LaJefa nos faguèsse un caca nerviós, o vos disi: cantèt plan.
De tot biais, èran una molonada, auriá cantat mal se seriá pas ausit, mas chuuuut, li cal pas dire.
E volètz totes una pròva???

E ben , l'avètz aquí sota. Soi tan bona amiga que filmèri lo primièr tròç . Bon, akò bolega un pauc, mas sèm a Seta, es per vos acostumar.





Podèm jogar a Where is Charlie? Alara, ont es LaJefa? una indica: es pas lo tipe de la vesta blanca.

Mai seriosament, valiá bravament lo còp de l'anar escotar LaJefa :)

Tantossada classica al teatre... o benvenguts dins ma vida

L'autre dimenge, anèri al teatre bèl de Seta per escotar un concèrt de musica classica. E ben òc, escoti de musica classica ieu. E mai, vau a de concèrts de musica classica dins los teatres classics. E i vau encara mai quand lo bilhet, me lo dona Lajefa perque es ela que fa l'espectacle. 
L'espectacle, èra en doas partidas: un concerto per piano de Mozart amb piano e còrdas e la segonda, una messa d'Haydn qu'es aquí dedins que laJefa cantava.

Arribèri que laJefa m'esperava dabans lo teatre de Seta. Mas arribèt al meteis temps que ieu una femna que d'ara endabans, la direm "laboleta", auriái tanben pogut dire laColha, mas non.
E segur, laBoleta s'assetèt amb nosautras. E comencèt de parlar. E estrambordada: "Veni de legir Twilight! Es g e n i a l!" Aquí, as Melania que fa glop, que se vira cap a ela per verificar qu'aviá pas agut una alucinacion sonòra e ela de contunhar "pasmens, o sabes e que me coneisses, soi pas fleurbleue ieu, mas akela istòòòòòòòòòòòòòòria, e akel vampiiiiiiiiiiiiiiiiiiiiri.... pfiiioooooo, ne seriái plan amorosa ieu tanbeeeen". Boleta, recapta tas ormònas que la musica va començar.


E la musica comencèt. 40 minutas sens ausir las conariás de laBoleta, akò te fa venir meloman.
Fin de la primièra partida del concèrt, LaJefa se leva e nos ditz "bon, ben i vau que me cal anar cantar , vos daissi". E aquí l'agachas ton amiga e te dises "li ai fach un còp de puta e me'n soveni pas?" que m'empeguèri LaBoleta pendent una ora.  Es d'antologia la nòstraBoleta, anatz veire!
Crosa doas vièlhas que devián cantar amb LaJefa
- E ben cantatz pas??? (de dire la boca plan duberta en se tustant lo front)
- E ben non! Figura te que sèm arribadas dissabte, qu'eriam blocadas una setmana a Los Angeles
- Vertat?!?!?! Maaaas perquéééééé eriatz blocadas?!?!?!?!? 

Jingle campiona del mond! mercés!



Pendent tot lo concèrt, m'explicava: "aquò son las sopranos, los tenòrs, las altos, e aquela d'aquí es lo primièr violon". Òc, segur, Boletona, mas o sabi, sas? E lo violon gròs, akò se ditz un violoncèla, e lo violon encara mai gròs, es bravament gròs aquel d'akí, e ben es una contrabassa. Vertat, o sabes? mas cossí o sabes?
Subrerealista. 


Lo concèrt s'acaba. Picament de las mans. Bis.
Se meton en plaça. E LaBoleta, per me mostrar que sabiá legir suls pòts del polit cap d'orquèstre me ditz amb tot son seriós culte: "Van tornar cantar l'Anus Dei".

Prenètz e manjatz-ne totes, aquò's mon cuol ofèrt per vosautres.

Dieu es sodomit e o sabiái pas.

La vida segon Mela

diumenge, 9 de maig del 2010