dilluns, 30 de març del 2009

Dissabte, qu'i serèi




Dissabte que vien, que preni eth tren tàd anar tà Pau entà manifestar pera lengua.
Era crida qu'èi acíu.

Qu'espèri que i seram nombrós...

Nos vedèm acerà? jo que serèi vestida de negue, dab de baskets jaunas jaunas de las jaunas (k òc, jaunas!).

Quequejaire, Joan deu Peiroton, que'ns haram ua foto deus pès? (e que n'i aurà d'autes deu blòg?)

dimecres, 25 de març del 2009

ai comprés!

Lo darrièr còp que veguèri la Talvera èra lo 1er de Genièr de 2009.



Ara, ai comprés perque ai lo moral dins mas caucetas traucadas.
Soi en manca.


Alara sul sit, agachi las datas, e me desespèri.
Me cal esperar lo 9 de mai a Lavaur, país de Pomponeta per los anar veire.

1 mes e mièg, puta de dieu.
Subreviurai?






Me demandan dins l'aurelheta se li disi al Peiroton d'i anar al concèrt o pas... Lo còp passat, ensagèri de li ensenhar a dançar...e ai paur que lo tipe aguèsse doblidat cossí se dançan l'escotisha e lo rondèu... Alara, Peiroton, se te'n sovenes, Lavaur es pas luènh. E pels autres, volètz pas venir dançar amb ieu? Vos pòdi ensenhar l'escotisha se volètz. Aneeeeeeeeeeeeeem!

dilluns, 23 de març del 2009

diumenge, 22 de març del 2009

Kill Bill en una minuta

S'avètz vist Kill Bill, soi segura que pissaretz de rire dabans aquò:





Soi fan.



An fach tanben
Forrest Gump, mas m'agrada pas tant, benlèu perque lo film, lo coneissi pas tant.

dimecres, 18 de març del 2009

del retorn a las valors seguras en temps de crisi


La vendeira d'Orange aviá plan comprés qu'èra un celibatari imatgivòr e telefag.

- Amb mai de 250 cadenas, podretz seguir totes los programas que vos interèssan: cinèma, espòrt, ...
- A non, l'espòrt m'agrada pas. M'agrada mai lo cinèma a ieu. Sabètz, faguèri de cinema dins ma joinessa
(se'n branda lo dardalhon de ta vida la vendeira)
- Doncas, amb aquesta ofèrta, son mai de 110 cadenas de cinèma qu'auretz. De cinèma en VF, en VO, estrangièr, francés, recent, classic. I trobaretz vòstre bonur.
E el de pantaissar, de sas dimenjadas que las passarà escambarlat sus son clicclac que lo sap pas desplegar, en pijama, aqueste pijama blau escur un pauc tacat a l'entrecuèissas, se'n brandam, pas degun per lo veire ni lo sentir.
Espepissar son Telerama setmanièr, e amb son Stabilo, faire de redonds o de croses suls films que vòl pas mancar.
L'orgasm televisual telecomandat.

Lo tecnician li installa tot. Rai, es dins una ciutat internet, mas es mai aisit quand lo tecnician t'o installa tot. 119,50€ que t'o facturan, mas aital, siás segur que marcha!

Lo tecnician se'n va.
S'installa dins son clicclac que lo sap pas desplegar quand quauqu'un ven.

Zapa.
Passa las 253 cadenas.
aquò's long de passar 253 cadenas, en francés, en anglés, en rús, en arab, en chinés, en sap pas de qué, en alemand, en espanhòl, en sap pas de qué, en portugués, en a ten i a pas de son, en polonés, en serbocroat, bon dieu!

253 cadenas.
E pas Canal +.

El voliá sonque Canal + en clar.
253 cadenas e pas Canal + en clar.
La mèrda.

Li podiá pas demandar a la vendeira que voliá Canal + en clar. Aviá vergonha. Que los que vòlon Canal + en clar es pels rescontres dau PSG e pels films pornos, coma dins los Bobos del Renaud qu'aima tant, e el rai, legís Telerama, mas cal pas butar la mameta dins las romecs que manja pas lo Dalai Lama, el n'es pas un de bobo parisenc òu.
Li podiá pas dire aquò a la vendeira.

Dau còp, se trapa amb 253 cadenas que dedins i a quitament pas las informacions regionalas.


Alara, escota France Inter.



253 cadenas Nautissima Definicion, e escota France Inter sus son radio-revelh a 50 francs que sa maire li crompèt 8 ans fa al camion de l'Outilleur Auvergnat.





dimarts, 17 de març del 2009

De las bòças e dels escupits


- Sas, per las romecs dins ton terren, e ben i deuriás metre un lama. Lo lama, es lo solet animal que las manja las romecs.
- Vertat?
- Òc
- Lo lama, a una bòça sus l'esquina, òi?
- mmmm, non, polideta, confondes amb lo camèl.
- Lo camèl... escupís?
- Non, polideta, es lo lama qu'escupís.
- Mas lo camèl escupís pas un pauc de còps que i a?
- A, sai pas, me sembla pas.
- Si! Me sembla qu'o ai legit sai pas ont. Lo camèl escupís. De tot biais, lo camèl e lo lama, akò a lo meteis cap, es parièr, n'i a un qu'es gibós e pas l'autre mas es parièr, te semblan pas a tu que son parièrs?
- Rai, de fach, son cosins.
- Ten , o veses , ai rason, lo camèl escupís. CQCD.




T'ai lo biais per me ridiculizar primièr puèi aver rason que me deurián pagar per aquò. De còps que i a , m'aimi.


Per los que lo tèma interessa...



Me senhalan dins l'aurelheta que lo Dalai Lama es vegetarian mas manja pas las romecs.


.

dilluns, 16 de març del 2009

Visita al Metge

L'autre jorn, anèri veire lo metge.
LoMetge, me coneis dempuèi totjorn: mos primièrs botons, mon apendicitis, mon aǹsia que me fasiá racar las tripas quand èri drolleta, mon asma, ma primièra capòta demorada dintre, o sap tot de ieu. Enfin, quasi, perque ieu, li còsti pas gaire car a la Secu.
L'autre jorn, me foti un còp de pè al cuol e vau a l'Ostal Medical ont i a mon metge, ma dentista brava que l'aimi mas i vau pas jamai, lo quine, l'ortofonista que benlèu i deuriái anar per mon quequejadís e las infirmièras.
Divendres, 18h30. E, a la dintrada de l'ostal medical, te vesi una placa novèla: "ten, i a un metge de mai". "Ngoc Yen Monina", ò, un chinés amb un nom que fa rire. Ieu èri mòrta de rire dins mon cap e me disiái que se vos o contavi, e ben, me creiriatz pas...

Enfin, ieu, me'n bati, las costumas, las càmbii pas, anarai veire mon metge vièlh a ieu que quand prendrà la retirada sai pas cossí farai. Benlèu que l'anarai veire a son ostal per que m'ausculte dabans sa borgesa de femna que rotla en gròssa berlina alemanda. Es dins mon vilatge o es dins totes los vilatges que las femnas de metge son de borgesas que ne brandan pas una e que vivon del prestigi e del salari de son altruista de marit?

Arribi a la pòrta de la sala d'espèra.
E te vesi que lo chinés e ben s'es associat amb mon metge.
E te legissi que mon metge trabalha lo diluns, dimars e dimècres e que lo chinés trabalha lo dijòus e lo divendres e lo dissabte.
Mèrda. Serà lo chinés que lo coneissi pas.
E te vesi que lo chinés, e ben , es una chinesa.
Mèrda mèrda, ieu soi misogina. M'agradan pas las femnas coma metges, i comprenon pas res, m'agrada pas que me tokèsson, berk berk berk.
Romegavi dins mon cap, a mand de tornar a mon ostal. Mas per un còp, la rason l'emportèt. "Non, te cal consultar, ara que i siás demòra, aquesta femna serà tan competenta coma l'autre. Anem." D'aquò, ne dison lo metòd Coeta (qué? m'engani de nom? lo metòd Coeta es un dakòs porcassièr? ne sètz segurs? ).
Dintri dins la sala d'espèra... que pòrta plan son nom. 4 personas abans ieu. La mèrda. Soi la darrièra.
E se dubrís la pòrta. LaChinesa. Ò qu'es polida! Ieu fau lo morre dins mon canton, perque de còps que i a soi asociala, e ieu aimi pas las salas d'espèra dels metges, coma las farmaciás, i a sonque de mond que van pas plan e ai totjorn paur que m'enguinhèsson aqueste mond malaut.

19h30. Soi la darrièra (qual a dich "coma de costuma?").

- Fa moment que trabalhatz aquí?"
- E ben, dempuèi 2006
- A ouais, fa moment que soi pas venguda alara.
Agacha sus l'ordenador, ritz e ditz "dempuèi genièr de 2005." Quand o vos disi que li còsti pas car a la Secu.
- De qué vos arriba?
- E ben, i a un amic que m'a dich "Siás gròssa, te cal faire d'analisis sanguinas que t'arribarà una colha".
Tòrna rire
- " Es franc vòstre amic"
Bòf, d'akò ieu ne disi d'"emmerdaires de primièra," que t'emmèrdan primièr a tu per pas que los emmèrdes tu a eles. (o sabi, soi campiona del mond!)

M'ausculta.
E ieu li pausi de questions perque i a pas de rasons que ne pausèsse pas, òu.! Me va escotar lo còr, me fotre un lum dins l'uèlh, me fotre un baston desgulassa sus la lenga e me tocar las popas, li pòdi plan pausar un parelh de questions, mèrda, sèm intimas ara.
- E d'ont sètz?
- D'origina o d'ont soi?
E aquí, ai coma l'impression qu'aquela question, li fan 50 còps per jorn dempuèi que sap parlar la paura d'ela, e ai vergonha de ma non-originalitat... mas bon, es per faire la convèrsa.
- Las doas causas.
- Ben, mos parents son de Vietnam e soi nascuda au Clapàs.
E ieu qu'ai d'idèas conas plen lo cap, luchavi contra ma boca per pas demandar se sos parents avián un restaurant. De còps que i a, ai vergonha.
Bon, e charram, que m'es simpatica. Perque de mond a l'encòp nascuts au Clapàs, crescuts au Clapàs e diplomats de medecina au Clapàs, e ben n'i a pas gaire. Se i apondetz en mai d'akò qu'es chinesa, e ben!
Charram.
La fau rire.
Me disi totjorn que foguèsse un òme, dragariái grèu e me bicariái totas las femnas dau mond mondial de tant que las fau rire. En plaça d'akò, la sola bica que coneissi es la cabra de la vesina que se ditz Blanqueta e qu'es cona que vira que manja los rosièrs aquela puta de bèstia. Oups, je m'égare.

Alara, coma la fòrma, l'ai pas gaire, me fa 4 ordonàncias, m'explica un molonàs de causas, me fa una quantitat de recomandacions e de "se". "Se va pas, cambiarem. " Coma se ieu aguèsse la memòria per reténer tot akò. Enfin. MonMetge vièlh, el, o sap que soi una calamitat, e m'explica pas tot aquò, que sap que, un còp qu'ai passada la pòrta, ai doblidat perque èri venguda.

Puèi o marca tot sus son ordenador qu'es jos Linux, perque son pas cons los metges.

Marca las 4 ordonàncias sus l'ordenador. Normalament lo client pacient deu pas veire l'ordenador, mas ieu ai d'uèlhs de cameleon e un còl de girafa... (e una pachòla d'elefant, soi la jungla tota a ieu soleta). Escriu tot amb de sigles estranhs que sonque de ne veire la tierassa, me disi que deuriái anar en suènhs de fin de vida directament e ne parlam pas mai.


E a la fin fin, marca: "va plan".

- Vertat, vau plan?
- Ben anatz plan, non?
- Rai.
- E ben vaquí.



I tornarai, la veire, a aquela chinesa.



.

dilluns, 9 de març del 2009

Cançon que me'n lassi pas

Escotatz-me aquò:



L'ai raubat sul MySpace dau grand Joan Francés Tisnèr.
E li ai demandat al Tisnèr se se pòt/podrà trobar sus un CD e m'a respondut:
Adiu l'Amètla
Solide dens lo digipack per viéner de Denís Frossard "Vrenhadas" per paréisher lèu e dab tot plen de cantas d'aqueste estille.


Las datas e los disques dau tipe son sul sit das Menestrèrs Gascons. e pensi que Vrenhadas s'i trobarà lèu. Vos teni al fial ;)

diumenge, 8 de març del 2009

Suicidi social

Fa una setmana, me raubèron.
Dins la frasa "me raubèron", me es un pronom COD.

Me raubèron los papièrs
Me raubèron l'ordenador.
Me raubèron ieu.

Los papièrs, la carta d'identitat, la sola causa que te dona existéncia dins aquela societat.
L'ordenador, que i aviá ma vida dedins, qu'èra mon instrument de trabalh, lo prolongament de mas cervèlas e de mas mans.

Pas mai d'identitat. Soi degun.
Pas mai mon otís de trabalh.
Soi pas mai degun.

Pensèri un moment de partir.
De desaparéisser de la societat.
De me suicidar socialament.

Ai pas mai de nom,
pòdi pas mai trabalhar,
soi pas degun, existissi pas mai.
Alara, me'n vau,
amb mon chin,
per òrtas e caminòls,
en me dire que los raubaires que m'avián raubada ma vida e ben m'avián donada l'oportunitat de ne causir una autra de vida.
Una vida que i seriái pas degun.

Suicidi social.


N'aguèri pas las colhas.



Daumatge.




.

dijous, 5 de març del 2009

Los òmes son de pòrcs e las femnas son bravament conas

Fan pas la diferéncia entre de dentela, de coton o de seda, los agachan pas quand vòlon bicar, perque "ço que los interessa es ço que i a dedins", perqué s'escagassam e se roinam a metre de sostens e de bralhas sexys?

dimarts, 3 de març del 2009

Los òmes son de pòrcs, la 5ena

Moment de sexe intensiu.
Dabans lo lièch pel sol, amontonats, son eslip e la culota de sa femna, negres totes dos.
Lo mascle se vòl tornar vestir. Pren son eslip. L'esnifa per saber se lo pòt tornar metre.
Puèi ditz "ten? es ton eslip aquò!".

Perqué fan pas la diferéncia au tocar entre de seda o de lin o dentela e de coton dim?

dilluns, 2 de març del 2009

Los òmes son de pòrcs, la 4ena








Eslip cada 4 jorns, camisa e pantalon cada setmana.
Mas perqué càmbian de caucetas cada jorn?!?!?


.

diumenge, 1 de març del 2009

Los òmes son de pòrcs, la 3ena

Un dissabte de ser sus la tèrra...


- Te vols pas dochar, mon amor?
- Ieu? Perqué? Me dochèri ja dimars passat!
- Justament, mon amor, justament...