dimarts, 28 de novembre del 2006

Alò doctor?

Me suspreni a somriure quand camini per carrièras.
Quand meni la veitura, sembli tota contenta.
A taula, le Jefa e Pomponeta galejan e ieu disi pas res.
Se trufan de ieu e disi pas res.
Ai l'èr perdut, un risolet als pòts.
Pas mai enveja de m'ocupar del blòg ni de passar d'oradas sus l'ordenador.

De qué m'arriba???

dissabte, 25 de novembre del 2006

De la vida rufa d'una femna sola

Quand la Pompeneta cosina de plats estranhs coma akeste:
Ieu fugissi perque akò pudís qu'engarona e me balha lo racavòmit.

Dins aquestes cases, ai la solucion: los plats per solitari.
Alara, ai ensajat akeste còp las lasanhas d'"il tesoro dello chef" que trobèri al Camp, dins lo canton "mangiscla del mond". Èra pas gaire car, genre mens de 3€.

Quand dubrisses lo carton, as akò:
FAguèri de traucs amb mon cotèl dins lo plastic, e 2 minutas dins Chernobil, qu'es lo nom del micro-ondas. Akò caufa plan. Comença d'embocanar la cosina que foguèt JA embocanada per la chocrota. Ara, te cal dubrir la barqueta blanca. Alara, punt negre: dubrir la barqueta blanca es mission impossibla. Totjorn amb mon cotèl, copèri la proteccion per poder manjar, que manjar, èra finalament ma tòca a la debuta.

E me tròbi dabans akò:
Question de la Pomponeta:
- Tu l'as trouvé au rayon chiens?
Non, tòrni dire, akò se tròba a la mangiscla del mond, e non pas a la dels gosses.
Dins la sièta akò fa mens manjar pel gos:
Alara, question cruciala: es bon?
Responsa: bòf.
Ja, sembla pas bon, mas se'n fotèm.
I aviá un rèire gost que m'agradava pas gaire. Agachèri los ingredients e deu èsser una espècia: o la sàlvia o la muscada. Me soveni pas jamai.
Pasmens, me las mangèri las lasanhas qu'aviái talent.

Balanç:
çò negatiu : lo gost, la dubertura del paket
çò positiu: lèu caufat, paket en italian.



Conclusion: auriái melhor fach de me las cosinar las lasanhas, qu'aquelas èran pas tarriblas.




Detalh oblidat: sabi pas faire las lasanhas.

divendres, 24 de novembre del 2006

Pès a Seta

La Jefa e ieu escacalassadas (mas akò se vei pas sus la fòto...)



dijous, 23 de novembre del 2006

Caduna son orientacion

La Jefa es a l'Oest, e ieu cap al Sud...

dimecres, 22 de novembre del 2006

Blòg: pub

Tè, vau faire un pauc de pub per un blòg que ven de crebar l'uòu: lo blòg del Tam Tam.





L'adreiça : http://lou-tam-tam.blogspot.com.

Kò's un blòg negre, amb de fòtos en negre e blanc que li dona una estetica cinematografica d'un autre sègle... Los tèxtes s'anóncian poetics, las fòtos polidas.


Kò's un biais novèl dins la blogosfera occitana.
E esperi que son autor " fada dou negre e dou blanc. " contunharà de faire de fòtos tan polidas e d'escriure e qu'actualizarà son blòg regularament.

Quand òm fa un blòg, çò que fa plaser, es d'aver de comentaris... Alara, es aquí que se passa.

Longamai!!!

Gasconariá melamitosa bis

Auè, a casa, qu'avem minjat de hritas dab de rit.


È? Ben òc, l'histoire se répète... Pas tant finalament, qu'aqueste còp l'ensalada èra de l'òrt e la Pomponeta èra plan orgulhosa de nos la faire tastar.
Es plan bona ton ensalada Pomponeta!
ÒSCA!

Pomponeta es subresexi

D'aver las cauçetas assortidas al pijamà e las pantoflas, ieu disi qu'es un art...

Jòc concors


Ont foguèt presa akela fòto????
(fòto mandada pel Quequejaire, mercés Monsur Bearnés :)

Seta, Seta, akí Seta (8)

Amb la Jefa, se perdèrem sus Sant Clar. Prenguèrem de carrièras pichonas ont i a d'ostals bèls , qu'istoricament, èran de baraquetas, mas que son vengudas las baraquetas de baracassas... Bon, la sociologia setòria, ne parlarem un autre jorn... 2 fòtos:


dimarts, 21 de novembre del 2006

A la mediateca

A Seta, avèm una polida mediateca.
Non, n'i a doas, mas ieu ne vau a una sonque.
Doncas, tòrni prene:
Avèm una polida mediateca, e una mediateca que coneissi pas.
La mediateca polida es al centre. S'apèla "François Mitterand", un pauc bòf coma nom per una mediateca setòria, mas bon, cal èsser realista, o podèm pas tot apelar "Georges Brassens" o "paul valéry"... Mas bon que la mediateca de Seta s'apèle François Mitterand, que lo Collègi de la Peirada s'apèle Simone De Beauvoir, akò me fa mal al cuol o puslèu al còr, e quitament als dos. Ai pas res contra Mitterand e Beauvoir (ai pas encara trobat mon segond sex, kalkun per m'ajudar?), es pas akò lo lagui. Perque prenon totjorn de noms de mond qu'an PAS RES a veire amb lo país?? Lo collègi de la Peirada a 3 ans, es tot nòu. L'aurián pogut apelar "collègi dels moissaus", "collègi del rasim", "collègi de la mòbil" (la mòbil es un dakòs de gasolina qu'emplegava plan de mond a l'epòca a Frontignan... aguèt son importància economica e se veson plan las cistèrnas de gasolina dempuèi lo collègi... ). A Vilanòva de Magalona, lo collègi qu'es un collègi "bio", s'apèla lo collègi dels salins, perque abans, a Vilanòva abans que i agèsse una preson e una peirièra qu'o emposca tot, i aviá de salins e de vinhas.
Mas me desvii de mon prepaus primièr!
Alara a la Mediateca de Seta que ara l'apelarai LA MEDIATECA DE SETA, e los que son pas contents que viren lo cuol al vent! .
Doncas:
A la mediateca de Seta, i vau regularament, preni de libres que legissi pas, preni de CDs qu'escoti pas (mas que dintri dins l'ordenador). E, una de mas especialitats, es de tornar los documents en retard, ben òi, dins la vida, quand òm es una calamitat, òm es una calamitat cada jorn, cada còp, de longa. Es pas ma fauta. Ai un problèma grèu amb lo temps: l'ora, los jorns, lo temps que passa. Es afrós. M'orienti pas. Soi una calamitat espacio-temporala e intergalactica tanben, tè , tant que i sèm!

Ieu ai remarcat, que de còps que i a soi finòta, que los libres, son totjorn de femnas que se'n ocupan. Prenes un libre? Es una femna que te pren la carta e que te registra. Tòrnas un libre? Tornarmai una femna. Es estadistic.
Mas al plan pè, ont i a los Cds e los DVDs, son totjorn d'òmes, akò manca pas!
Ieu, que soi misogina, disi que los òmes an melhor gost en films e musica, que las femnas comprenon pas res al cinèma... (ieu soi una excepcion, aviatz plan comprés!)




Dissabte, vau amb la Pomponeta a la mediateca tornar lo detzenat de CDs qu'aviái e 1 libre pas legit.
I a dos òmes al comptador de l'acuèlh.

Quequegi.
Patetic.
Lo tip pren mos CDs, me soritz (avètz lo drech de pensar que se trufa de mon quequejadís)
Quequegi un "Soi pas en retard?" tot vergonhós
M'agacha amb un somriure bèl e me fa "non, non".
Me'n vau.
E Pomponeta de demandar:
"Mas... cossí se fa qu'aqueste òme siaguèsse al corrent de tas règlas?"




oaf oaf oaf






Bon apètit pel mond que son a taula!


dilluns, 20 de novembre del 2006

Tripòd

Floreta, lo Grand Mèstre Blanc e ieu :))

diumenge, 19 de novembre del 2006

Lo Secret de La Jefa (4)

Ieu sabi de causas sus Mela.
Qué te sabi ieu?


Mela es associabla. Òc, me podètz creire. Avètz pas ensajat de viure amb ela. De còps, parla pas. S'embarra dins la cambra. Of, pas la meuna. Al cap de 6 oradas, ne sortís sociabla. De qué i fa dins la cambra? De qué te sabi ieu....

dissabte, 18 de novembre del 2006

Les dessous de Montpellier

Benlèu que n'avètz vòstre confle de veire de fòtos de pès e de Seta... ALara ai decidit amb l'ajuda del Zarbinon de vos mostrar lo Clapàs, mas las tripas del Clapàs.
Zarbinon passa sa vida a reparar lo Clapàs. Se passeja dins las tripas del Clapàs, agacha los tudèls, agacha los comptadors, los tòca tanben, e fa que tot çò qu'es aiga al Clapàs marchèsse. Es que ieu coneissi de mond importants...
Lo Zarbinon, que legís mon blòg, me mandèt aquestas fòtos. Es la plaça de la Comedia.
Enfin, es JOS la plaça de la Comedia.
Mai precisament, jos las tres gràcias.
Es lo local tecnic que gerís las 3 gràcias.








N'aprenèm de causas sus akeste blòg!
Ieu sabiái kitament pas que i aviá un local tecnic jol cuol de las Tres Gràcias! Bon, d'un autre costat, m'èri pas jamai pausada la kestion!

Alara, ieu li pausi de questions a mon Zarbinon, del genre: e cossí se dintra al local de las Tres Gràcias? È? O sabètz pas vosautres akò!
Ben, ieu me pensavi que s'i dintrava pel parking!
BEN NON!
I a una dintrada secreta sus la plaça de la Comedia...
Un pauc coma dins Harry Potter que pren lo tren dins una gara vertadièra mas degun vei pas lo trin :)))
(s'es pas una referéncia culturala akò...)

divendres, 17 de novembre del 2006

Lo Secret de La Jefa (3)

Ieu sabi de causas sus Mela.
Qué te sabi ieu?

Mela se lava. Los vestits solide. Mas es pas colha-colha. Los espandís sus un daquòs que lo pòdes sortir coma vòls segon lo temps que fa. Mas me copa totas las espinglas....

dijous, 16 de novembre del 2006

Cerca Google del jorn

Estadisticas:

20h59 Google.com : a vida da melani
Quitament los Gallegos venon legir mon blòg...

Sabiái ja que i aviá tot plen d'espanhòls:
Google Espagne : ma vida a ieu

Bueno, chavales, a ver si, ya que os interesa tanto mi vida, me dejais algun comentario :)))

A la mediateca de Seta

A Seta, a la mediateca, i a una mòstra sus la Crosada dels Albigeses



Es plan interessanta, completa, plan documentada... mas un pauc indigesta.

Anatz-la veire, mas despachatz-vos que i es cap a la fin de la setmana!

Fòto erotica

Fòto de pè?
Estring?

Mos pès en estring:

Starring la Galina del Velhardon



Lo Velhardon a una galina. Una, pas doas. Enfin n'aviá doas, mas n'i a una que moriguèt paura d'ela.
La galina que demòra, vos l'anam presentar (abans que moriguèsse), perque akò li fa plaser al Velhardon e ieu, akò me fa plaser de li faire plaser al Velhardon.
Akeste blòg vira eskyblòg, ne soi concienta oaf oaf oaf

Alara la galina del Velhardon, en fòto:
E lo gat? De qu'es akeste gat?
Sai pas! Mas la galina te fa un aire...


La galina roja, ai pas comprés ieu tampauc
perque me mandèt akò le Velhardon...


Romeo e Julieta

Lo Velhardon parla de longa de sa galina, lo mot "pan" , dins la boca del Velhardon, se pòt pas concebre sens una seguida qu'es totjorn "per ma galina". "Pan per ma galina". Ieu lo vòli pas contrariar, alara li demandi de novèlas de sa galina e li diguèri se me mandas una fòto de ta galina, la meti sul blòg (t'ai d'idèas ieu de còps que i a...) e lo tipe me'n mandèt 3. Rai, es polida la galina.
E coma lo Velhardon es un fan del blòg (exagerar? ieu? pas jamai de la vida! ), prenguèt lo dakòs al seriós e faguèt un film amb sa galina e sa gossa, akí l'avètz:



Question que vos pausatz totes: cossí s'apèla la Galina del Velhardon?
Alara li demandèri. E ben lo tipe, que parla de sa galina tota la jornada, li a pas donat de nom!!!
Ieu aceptèri pas aquela injustícia facha a la paura bèstia, e lo Velhardon m'expliquèt que se donas un nom a un animal, aprèp quand morís, te sentisses obligat de l'enterrar. E alara?
Alara m'expliquèt que totes sos amics vivon dins d'apartaments, qu'es lo solet d'aver un òrt, e que quand lo cat d'un o lo peissonet roge de l'autre creba, lo venon enterrar dins son òrt, e que doncas a pas de plaça per sa galina a el quand crebarà.


Cercatz l'error.


Dessenh de Kukuxumusu

dimecres, 15 de novembre del 2006

Reclamas!

Agachi pas la television. E quand l'agachi, demòri sovent bocabadada, o mòrta de rire, o en colèra, enfin, i soi pas jamai indiferenta. Totara, la Jefa l'agachava, m'asseti, èran las reclamas. Las reclamas , es çò que m'agrada mai a la television. E n'i a una que comença, un personatge d'animacion que sembla un gremlins en pièger comença de parlar e la Jefa zapa lèu en cridant "aaaaaaaa, non, pas akeeeeeeesta". Ieu li cridi "tòrna la metre que la coneissi pas".
E akí, vesi akò:


Aviá rason La Jefa, te balha lo vòmit e te passan akò a l'ora de sopar! Mas ieu èri mòrta de rire...
Me soveni quand èri dròlla, pel dinnar, o pel sopar, te passavan de longa la reclama del papièr igienic qu'èra un nenet qu'anava cagar sus son quèli, que te desrotlava tot lo papièr, e que fasiá a la fin de la reclama "et ouiiiiiiiii". Es que soi una victima de la pub, las de mon epòca me las sabi totas, que l'agachavi la television, mila dieus "si ju va bien c'est juvamine", "on se lève tous pour Danette" (la disi encara quand passi dabans los iaorts al Camp), "reviens leon j'ai les mêmes à la maison", "l'ami du petit dejeuner, l'ami ricorééééé". Bon arresti akí, que començatz de m'agachar coma m'agachan la Jefa e la Pomponeta quand començi mos deliris...
Vakí, èri una victima de la television e de la societat de consomacion...



En furgant per trobar la pub del Gremlins-del-pè, trobèri quauques publicitats per Chupachups, que me faguèron plan rire

Lo plaser de chucar...


Los òmes e son sexe descentralizat:



Una en español plan polideta que me faguèt plan rire


Las reclamas espanhòlas per la Primitiva m'agradan en regla generala:



Una que, se la vesi 50 còps, me fa rire 50 còps:


Pels òmes:


N' i a una que me fa escacalassar, es la suls problèmas d'ereccion dels òmes que la femna lor ditz d'anar consultar lo metge amb un guinhet. Se qualqu'un la tròba, que faguèsse petar l'adreiça :)

Gasconariá melamitosa

Auè, a casa, qu'avem minjat de hritas dab de rit.

Receta tarnagassa, pel Velhardon

Los cruvelets


Per far de curbelets :
ingredients : farina, uòus, sucre, vanilha, ròm, lait e armanhac, aparelh a curbelets e chimenèia que fonciona

Mesclar tot alevat lo lait. Apondre puèi lo lait sens arrestar de bolegar per tal d’obténer una pasta sens coquèls (mai espessa que pels pescajons).

Aquí çò mai complicat : cal trobar un aparelh pels curbelets (doas placas religadas per un margue que pòt anar al fuòc). Basta puèi d’espandir la pasta entre las doas placas, de sarrar lo tot e de metre dirèctament sul fuòc dins la chimenèia. Virar e revirar. Sortir la pasta cuècha e la rotlar tant qu’es cauda.
Basta d’esperar que siá pas mai cauda per tastar.










Mercés Velhardon!!




Velhardon, ai trobada una fòto d'aparelh pels curbelets:

ABCDari. letra H

Armas sensiblas e joves de mens de 18 ans, arrestatz akí la lectura. L'autora d'akeste blòg es pas responsabla de çò que pòt provocar la lectura de l'ABCdari... Sètz prevenguts.



H


A l'iniciala, existís sonque en gascon.
Exemples:
Hilh de puta!
A Hum de calhau!
Hormatge!
A hum e a huèc!
Horra-borra!



2
- Nosautras coneissèm una polida cançon:
Lo hasan cauhèva lo horn
las guitas qu'en.hornèvan
e lo polòi au mièi del sòl
s'estofleva d'arríder
(cresi que mon gascon es pas gaire correct akeste còp,
Quequejaire, compti sus tu per corregir
- un autre gascon farà l'afar sekenon, oaf oaf-
Bon... la sabèm cantar, es ja akò...)

Eissam

dimarts, 14 de novembre del 2006

De la mangiscla al país dels Tarnagasses...




E vos conti pas de qué i aviá dins l'ola.... (mas se me suplicatz vos o disi...)
Jòc concors: what's the tarnagàs name of the yellow thing for the dessert???

dilluns, 13 de novembre del 2006

Lo culhièr

Lo culhièr voliá una tireta,
la tireta una taula,
la taula un canton,
lo canton un ostal,
l'ostal un vilatge,
lo vilatge una parròquia,
la parròquia un país,
lo país una lenga,
una lenga per lecar lo culhièr.


aforisme de Jan Dau Melhau, trobat dins l'album de Trio Bilingue







EDIT: akest aforisme es estat citat dins lo blòg de La Trappola.

Se trobam al mercat!

diumenge, 12 de novembre del 2006

La Talvera a LaVaur: fòtos e comentaris...

"Tu siás especiala, quand venèm a costat de ton ostal, te vesèm pas! E te vesèm akí!" me faguèt la cantaira de La Talvera...
Ben òc, èri tant decebuda de los aver mancats a Lodeva, qu'anèri a LaVaur! Soi aital ieu!
Arribèrem que començava la primièra cançonPaguèri los 5 èuros lèu fach, dintrèri en corrent dins la sala en oblidant completament la Jefa e la Pomponeta. Perque ieu quand i a La Talvera, començi de somriure coma una nècia e soi pivelada, agachi la scèna, somrisi, e a d m i r i.

Quand mas cervèlas tornèron fonccionar, pensèri sul pic a faire una fòto de pè pel blòg:


Puèi dançèri! Alara , de qué dancèri? Perqué dempuèi mon exilh dins Òlt , sabi dançar!
Alara, dançèri: un rondèu que venguèt una farandòla, lo chiborlin amb un grandàs, lo brisa-pè (qu'aviái ja fach dançar 2 còps dins la jornada a mos escolans), la calha, una borrèia ariegesa que puta ne dançarai pas mai, la Valentinon amb la vinhairona estelara que me l'expliquèt, lo branlon (fau lo mascle dins lo branlon, sabi pas faire la femna mdrrrr), una pòlca endiablada e mòrta de rire amb la Jefa, una ronda, una debuta de mazurka amb la Jefa que vòl absoludament m'ensenhar, ppfffff , dins Òlt pendent un an , ensagèri, akò dintra pas, es aital. Conclusion: es una dança de borgés, e ieu dançi pas las danças de borgeses. Faguèri pas la giga perque soi fenhanta, nimai las escotishas qu'aviái pas de cavalièr (es que soi una timida ieu).
UNA SERADA TARRIIIIIIIIIIBLA.

La Talvera, los aimi.

A la fin del concert, anèri faire lo poton al grop tot. Perque me coneisson a La Talvera, soi la caluga de servici, la que sauta de'n pertot quand es en forma e que coneis las paraulas (mas que canta fals). E plan segur, faguèri de fòtos:

Amb Celina Ricard la cantaira: A de polidas cauçaduras , trobatz pas?

Soi fan ;)

Amb Daniel Loddo:


Aprèp la Talvera, son los Golamas'K que montèron sus l'empont. T'an una energia akestes!!!
E aprèp, La Talvera montèt sus l'empont amb Goulamas'K!
Fòtos! :







Quand LA Talvera rescontra Goulasm'K, akò dona akò (s'agachatz plan, benlèu que me veiretz...)

(es una de las cançons qu'aimi mai en concert! )

Per la video, cal granmercejar lo polit T, que en mai d'èsser un dançaire dels bons, en mai d'èsser pacient per ensenhar al mond, en mai d'èsser polit que non sai, met de videos de La Talvera sus YouTube!
Del còp, vos lo presenti en imatge:

Vakí, èra una serada tarribla que fa de ben al moral!!

Ne soi tornada amb lo disc novèl de la Talvera, Cants e musicas del país de Lodeva , dedicaçats per lo grop tot. Soi a l'escotar... Vos en parlarai lèu plan segur!





- Lo sit de la Talvera: TALVERA.ORG, que i podètz crompar en linha los CDs e libres

- Lo sit de Goulamas'K : GOULAMAS-K.COM

- Las videos de La Talvera sus Youtube

divendres, 10 de novembre del 2006

Soi pas akí

Partissèm dins Tarn uèi e deman.
Perqué?
PER ANAR VEIRE LA TALVERA!!! que soi fan fan fan
Akeste ser, son en concert a La Vaur, amb goulamas'K

Los comentaris son pas moderats per akestes dos jorns, siaguessiatz bravets!

Vos daissi meditar sul camin octuple....

Lo camin del mièg

La Pomponeta, l'autre jorn, parlèt de bodism. Ieu, akò m'interessa, alara, pausi de kestions...
Alara, ieu demandèri de k'èra lo nòble camin octuple. Vos expliki lèu fach çò qu'ai compres:
I a 4 vertats: que (1) la vida es patiment, que (2) la causa d'akeste patiment es lo desir, e per arrestar keste patiment (3)cal arrestar lo desir, e per arrestar lo desir (4) cal seguir lo camin octuple. Lo camin octuple, qu'es akò? Es la compreneson justa, la pensada justa, la paraula justa, l'accion justa, lo mejan d'existéncia just, l'esfòrç just, l'atencion justa, la concentracion justa. Las vertats del camin ocutple son divididas entre l'etica (3 vertats), la saviesa (2 vertats) e kikòm mai, mas ai doblidat...


Vakí un tèxt que me donèt qu'ai revirat a la lesta lesta:

Boda a descubert lo camin del mièg que dona la vision, la coneissença, que mena a la patz, a la saviesa, a l'evelh e al nirvana.
E quin es akeste camin? Es lo nòble camin octuple, a saber:
- la compreneson justa
- la pensada justa
- la paraula justa
- l'accion justa
- lo mejan d'existéncia just
- l'esfòrç just
- l'atencion justa
- la concentracion justa.

Vakí la nòbla vertat sul patiment.
Nàisser es patiment,
vielhir es patiment,
a malautiá es patiment,
la mòrt es patiment,
èsser unit a ço qu'aimam pas es patiment,
èsser separat de çò qu'aimam es patiment,
aver pas çò que desiram es patiment;
en resumit; los 5 agregats d'estacaments son patiment.

Vakí la nòbla vertat sus la causa del patiment. Es lo desir que produtz la reexisténcia e lo redevenir, qu'es ligat a una aviditat passionada e que tròba una joissença novèla, d'aquí d'alai, es a dire la set dels plasers dels sens, la set de l'existéncia e del devenir, e la set de la non-existéncia.

Vakí la nòbla vertat sus la cessacion del patiment. Es l'arrèst complet d'aquesta set, la daissar, i renonciar, se'n liberar, se'n destacar.

Vakí la nòbla vertat sul camin que mena a la cessacion del patiment.
Es lo nòble camin octuple, a saber:
la compreneson justa, la pensada justa, la paraula justa, l'accion justa, lo mejan d'existéncia just, l'esfòrç just, l'atencion justa, la concentracion justa.

dijous, 9 de novembre del 2006

Conariás de femnas: Astrologia azteca

La jefa a un libre sus l'astrologia azteca...

E coma soi curiosa , ai agachat çò que soi e çò que son los autres:
- ieu, nascuda lo 6 de septembre, soi crocodila (berk)
- Pomponeta es Conilh (mòrta de rire)
- La Jefa es Silex (mèfi, a lo fuòc...)
- L'òme que s'aimaviam es Ostal (ben òc, es un casanièr, bolega pas de son ostal)
- Figura de Gòbi es Flor (tè, li dirai, lo farà pas rire oaf oaf oaf)

Dins l'oroscòp de Femna Actuala, soi Verge, pels Chineses soi monina, e pels Aztecas soi una Crocodila o Caiman. E mon ascendent aztec es lo mes de la Tèrra Maire. Akò m'agrada.

Ara, apelatz-me PachaMamá!

ABCDari. letra G

Armas sensiblas e joves de mens de 18 ans, arrestatz akí la lectura. L'autora d'akeste blòg es pas responsabla de çò que pòt provocar la lectura de l'ABCdari... Sètz prevenguts.



G

galina:
1- bèsta colha de la polalha.
Viu al galinièr, amb lo gal e tot plen d'autras galinas.
Acepta la poligalinia.

Dormís sul joc
Mela, quand va dormir ditz "Me'n vau al joc"


2- Fa d'uòus. O es l'uòu que fa la galina?
Los saberuts se demandan encara qual es primièr l'uòu o la galina?

Urasament, Cristóbal Colón l'a quilhat solet perque se fasiá cagar sus son batèu. Jogava amb un uòu, e coma sul batèu i aviá sonque de patatas per manjar, e coma dins sos ensages de quilhar l'uòu ne copèt tot plen d'uòus, inventèt la "tortilla de patatas"!!
Biais de viure:
Aprèp la sopa, s'anèron jaire coma las galinas a solelh colc.

3
- Clocar , clocar, la clocada es arribada!!

4
- Mimologism.
En occitan, avèm tot plen de mimologismes, e per la galina n'avèm a bodre! Akí d'unes:
- Pon pon pon ponde per Jacme!
- Pa pa pa pause la vèsta!
- Cacaracaquesta! Ponde un uòu per lo mèstre, lo mèstre!
- Cadís Cadís cadasca! Farai mon uòu per Pascas!
- Ió qu'ai tant pondut, qu'ai tant trabalhat, aurai pas de soliers per Pascas! Per Pascas!
akestes 5 mimologismes, los avèm trobats
dins Çò que disen las bèstias, de Micheu Chapduelh
Novelum, numero especiau 74 bis, IEO 24

- Ai fach un uòu per lo mèstre , per lo mèstre!
- Qu'es aquò que m'es tombat del cuol?
Que pòt èsser? Que pòt èsser?

Tot plen de mimologismes akí

5- Cançon
Nosautras coneissèm una polida cançon:

La galina a perdut lo bèc
Coquina de galina
La galina a perdut lo bèc
Coquina de galina
Perdut lo bec
Quora cantaràs dins l'ola

Akò's pas qu'una estròfa, La Mal Coiffée la cantan en entièr ;)


De pas confondre :
- galgallina: òme que li agradan los òmes.
dins lo Tresòr dóu Felibrige, trobam:
Gau-galin, Gau-galet, Jau-Jalin (a.), Jau-Geli (d.):
Poule qui imite le chant du coq, coq qui glousse comme une poule; hermaphrodit; bélier nouvellement châtré; homme incertain, efféminé, faible, v. femeto; pavot hybride, espèce de coquelicot, ainsi nommé parce que les enfants, avant d'en entr'ouvrir les boutons, se demandent si la fleur sera rouge ou violette, s'es un gau o'no galino
"homme incertain", aaaa, lo sègle 19 e sas polidas expressions....

- galineta:
1- Personatge de la literatura panholesca que tua lo paire de la femna qu'aimarà e que fa d'ulhets.
2- insecte rotge amb de punts negres que li cantam de cançons, mas que se'n fot perque li agradan pas las cançons e que se tira tre que pòt per escotar pas mai las cançons que li cantam.









la fòto foguèt presa a Montpelhièr, al bèl mièg d'un tap.... La vida es plena de suspresa...

dimecres, 8 de novembre del 2006

Starring la Cagona

Avètz remarcat qu'avèm un sòci novèl dins nòstras aventuras setòrias: La Cagona.
La Cagona m'acompanharà dins totes mos viatges.... Al camping, a l'estrangièr, al trabalh, per camins e rotas...

Alara, la Cagona, es ela:
Al cuol de la Cagona, i a dos collègas de pegats:
La Cagona es una bomba. Dins 6 meses, me kitan lo permés de menar.


Pichon plaser de la vida: los que dessenhèron la Cagona pensèron a ieu:
An pensat al trauc pel botelhon de CòcaCòla... Los aimi. Acabada l'epòca de la caneta entre las cuèissas, pausadas suls tablèu de bòrd e que tomba... Bonjorn, botelhon plan fixat dins son trauc...

An tanben pensat a mos enfants que devon poder beure, dessenhar e agachar de DVDs:
Lo problèma es qu'ai pas d'enfants... (e d'akí que ne faguèsse, aurai plan cambiat de veitura!)
Fa pas res, farem dessenhar la Pomponeta o la Jefa...



Figura de Gòbi qu'aima de se trufar de ieu ditz qu'es una veitura de plombièr.



E PERQUÉ QUAND PRENGUÈRI LA VEITURA,
RE*NAULT ME DONÈRON PAS LO PLOMBIÈR?????