divendres, 25 de febrer del 2011

Mar e Montanha




Agachatz e escotatz: myspace.com/maremontanha

ajuda: mon espaci es fosc

Qualqu'un me poiriá explicar cossí far un album-slide (las causas amb las fòtos que desfilan amb d'efièches a dos francs cinquanta) sul Myspace novèl?

(per exemple coma aquí)

Mercés!

dimarts, 22 de febrer del 2011

Corregís que corregiràs

Uèi, es l'aniversari dau Corrector dau blòg. Sabètz plan: lo tipe pas brica susceptible (un insensible? un savi? un sant?) que legís cada pòst 50 cinquanta còps, que consulta son pichon Alibèrt e la pitia de Dèlfas, que me manda un email en me dire las errors, de qué se podriá melhorar, tota la tièra de sinonims e antonims possibles e  que quand tròba pas res e ben es tot malurós.

Bon anniversari MossurLoCorrector! Contunha de me corregir, d'espepissar, de me mandar d'emails tissoses e de me faire enrabiar.
De mon costat, susvelharai las virgulas, escriurai en letras las chifras, susvelharai la diglossia, daissarai de fautas d'aquí d'alai per que te congostes, contunharai de faire de provençalismes que t'emmèrdan grèu e contunharai de te dire que m'emmèrdas. 

LONGAMAI e potonàs!!!!!!!

 

dilluns, 21 de febrer del 2011

Reclama 1ra partida



Dins Mar e Montanha, i a :
- los bodegaires que bufan dins lo cuol d'una cabra mòrta.
- los percussionistas que tustan
- los autbòòòòòòòòòòòòòòòòòòòòòiiiiiiiiiiiiiiiiissss! Quina emocion!!!!

Lo montatge video es estat fach per The Wonderful Mela qu'a aprés soleta a se servir d'un Mac e a abocinar de videos per metre los bocins ensem. Quina emocion!  (parli de ieu a la tresena persona se vòli).
Es pas deman la velha que m'embaucharàn a Dètz TV.

diumenge, 20 de febrer del 2011

Esclopada

A l'escòla, èri nulla nulla a la còrda e a l'elastic, dau còp, jogavi al balon amb los dròlles.
E ara ai plan enveja d'ensajar aquò:



Soi fan.

dimecres, 16 de febrer del 2011

escacalàs del jorn

Pomponeta m'a mandat una video: 




Ai pas agut lo temps d'anar legir sus lor site internet  qué brandan a voler bastir de monastièrs quand i a pas mai de monges mas la video es geniala! 
Puèi se far monge quand ieu ai pas d'amorós per me massar l'esquina, es d'eretgia completa.

Anóncia: 
Se cèrca monge pelut 
per me massar l'esquina 
e me far tindar la campana.

dimarts, 15 de febrer del 2011

Fièra coma un bar-tabat

Cada jorn, me feliciti de ma rengueta d'icònas dels sits que visiti cada jorn sus mon firefòx tant aimat. Agachatz mon e-art:
...de còps que i a, me soveni pas de qué i a darrièr cada dessenhòt....

dilluns, 14 de febrer del 2011

ongan, es parièr.

Ongan, auriái pogut far lo meteis pòst que l'an passat.
Mas se cal renovar de quora en quora.

Primièr, una cançon de Miossec tirada de Baiser.


E, per mos legeires non-francofòns, una cançon de Joaquín Sabina, Calle Melancolia tirada del dirècte Nos sobran los motivos.

dissabte, 12 de febrer del 2011

L'estan l'estan l'estanquet...

Dijòus, anèri veire l'Estanquet al teatre la Vista
Se siás un legeire fenhant o preissat e que vòs pas legir la seguida del pòst, te fau lo resumit: Vai-z-i, te farà de ben, mas passa pel pissador abans de t'assetar dins la sala, riscariás de banhar ton estring de la forra de rire qu'auràs.

La seguida es pel legeire mens fenhant o mens preissat.

Coma o disiá un filosòf creòl, lo teatre, es bon per lo moral. L'estanquet es de teatre. L'estanquet es bon per lo moral. 
Fasiá moment qu'èri pas anada al teatre, e vertat es, l'espectacle viu, aquò te manda un buf que te requinquilha dins ta morositat ivernala. 
L'Estanquet, aquò's cinc istòrias diferentas, cinc scènas ont se parla de sèxe. D'istòrias d'adultèris, de còrnas, d'istòrias de cuol a te far petar de rire. Rises de la debuta a la fin e de l'ora e mièja que dura l'espectacle, te fas pas cagar una minuta e aquò's lo luxe ultim.
Ja, t'assetas que lo decòr te met de bona umor: un estanquet de fusta sul costat de l'empont e al mitan de l'empont, pas res o una taula que ven cambiar l'ambient. M'agradèt fòrça tota la creacion musicala: tant la musica que sortís de las maquinas coma las prestacions vocalas dels actors. Ò 'fant, los actors! Las istòrias te fan rire, rai, mas la mesa en scèna e lo jòc dels actors te fan la diferéncia. Te botan una energia aquí dedins, ne prenes plen lo morre, te prenon a tu e te remandan un sai pas qué que t'embriaga. 
E aquí, òsca òsca òsca òsca a l'Isabèla François qu'es tot simpletament perfiècha, e que se merita un Cesar, un Oscar e mai un Ben. Dins una de las scènas, fa un numèro de clown que i es genialissima. Tanben te jòga la sexi de la pèça e aquò, o fa tras que plan. Òsca a ela e mercés per tota aquela energia. Puèi, o cal plan dire t'a un cuol e un parelh de popas a te far venir lesbiana.


Fins a dimenge a La Vista puèi de susvelhar per la virada all around Occitània. I pòs anar amb ta femna, ton marit, ton amant, ta mestressa, tos parents,ta dròlla que met de mocadors dins son sosten, ton dròlle que se sèga dins la cambra tot lo sant clame dau jorn o ta tanta Nina. La pèça es en occitan de cap a cima amb los jos titols en francés. E tot lo mond se regala e ritz. Qué demandar de mai?



divendres, 11 de febrer del 2011

rrrrrrrrrrrrrrrr

Dins la prononciacion del portugués, i a un parelh de causas que me fan problèma.
Primièr, las nasalas, perque las nasalas, las sabi pas faire, ni en francés, ni en portugués. Aital, es decidit, parlarai portugués coma parli francés: amb l'accent occitan! E los que son pas contents, que viren lo cuol al vent.

Lo segond problèma, aquò's la "r":


Rotlada, pas rotlada, un pauc una r francesa, mas pas completament, pas una jota espanhòla tanpauc... Serà benlèu complicat de la trobar per ma lenga dins la boca, mas capitarai. Fau un coaching intensiu amb lo cèl de la boca e las dents. Son totes plan motivats per capitar.

dijous, 10 de febrer del 2011

ANATZ-I!

Mon internet marcha coma la dinamo d'una bicicleta "a empujones" coma dison los espanhòls... Just 3 linhas per vos dire d'anar veire l'Estanquet se sètz pas luènh del Clapàs.
Es a l'aficha de la Vista fins a dimenge.

Me soi RE GA LA DA.

Uèi, las chifras!

O vos ai dich que per me far d'immersion en portugués, escoti la ràdio en portugués? L'escoti en portugués perque lo brasilièr es de melhor comprene que lo portugués e me disi que se soi balesa en portugués e ben serai encara mai balesa en brasilièr (soi finòta, è?). 
Doncas, quand soi sus l'ordenador, escoti la ràdio en portugués. E la dimenjada, aquò manca pas, i a las resultas esportivas!!!
E ben, sabètz qué? Los clubs, los coneissi pas encara, mas las resultas esportivas aquò te fa trabalhar las chifras!!
Escotatz coma dison "un"... me fa morir de rire (ròòòòò, es pas plan de se trufar de las autras lengas!)



I ai comprés tanben qu'es pas la meteissa ora aquí que al Portugal. Aquò me va destorbar quand i anarai, ne soi segura. O putan, ai pas encara trabalhat l'ora en portugués! Question del jorn:auràn un sistèma tan bastard coma lo sistèma catalan?

dimecres, 9 de febrer del 2011

Passejada

Profechèri que la corba de ma temperatura èra l'invèrsa de la corba de las temperaturas donadas a la Meteo per anar far un torn defòra aprèp 4 jorns d'embarrament forçat.
Nòta per los qu'aurián pas comprés: fasiá solelh e caud e aviái pas mai de fèbre.

En mai de passejar la chinalha,  faguèri de fòtos de... ben devinatz! :

Non, vesètz pas? Alai dins lo fons a esquèrra!

O aquí sota sus la ròca:

Non, vesètz pas de qu'es?



Bon, zomat, aquò dona aquò:

Aquò's un ragondin, una bèstia laida importada das Estats Units per la pèl (o los pels, sai pas...) que nada dins las robinas, es un desastre qu'a pas de predators a despart de las autòs e de quauques caçaires que los aiman pas gaire qu'aquò te pòt tuar lo chin!
Aquò se pòt manjar, mas ai pas jamai tastat.  
Un mechoi de ragondin, aquò vos ditz?

dimarts, 8 de febrer del 2011

De l'òme que caminava dins la palun

L'an passat, un jorn de fin d'ivèrn-debuta de prima,  per mas paluns, te veguèri un tipe que caminava. "De qu'es aquel conàs dins la palun?". Ben òc, cal èsser con per caminar dins una palun: es fangós, quand es pas fangós es plen d'aiga, e quand es ni fangós ni plen d'aiga, i a de moissaus, sens parlar de la salicòrna seca que t'escarraunha las cambas. Doncas, ieu, quand vesi un tipe que camina dins la palun en agachant pel sòl, me disi que lo tipe deu pas virar redond. 
E aquí, coratjosa, li fau de ma votz de professora autoritària:
- Bonjorn Sénher (pas jamai mancar de respècte als calucs, primièra leiçon del manual de subrevida per l'infirmièr en espital psiquiatric).
- Bonjorn
- Qué fasètz per aquí? (jos entendut: nèci que siás!)
- E ben, agachi se i a d'uòus de moissaus.
- Vertat? e cossí fasètz? (jos entendut: te creses qu'arribi d'Agde per la plaja?)
- E ben s'aquò bolèga, es que i a d'uòus, e se bolèga pas, e ben es que n'i a pas.
- Mas son benlèu amagats entre las plantas. (segonda leiçon del manual precitat: seguir lo deliri del caluc per li mostrar son incoeréncia). Mas perqué fasètz aquò?
- Trabalhi a la Companhia Litorala Anti Moissaus.
Mèrda, es pas un caluc. E ben caliá començar per aquò, conàs.
 - E coma avèm tractat, ben vòli veire s'aquò a foncionat, e s'aquò a pas foncionat tornarem passar. 
E aquí, me tèni drecha, dintri lo ventre, ensenhi las popas, perque òm sap pas jamai, sus un malentendut poiriá foncionar, ai totjorn somiat de far l'amor dins las paluns entre fanga, salicòrna e moissaus.
- Son los avions que passan es aquò?
E lo tipe de m'explicar: 
- Òc, escampan lo produch, es un produch ecologic amb una bacteria dedins, la larva de moissau la manja e aquò la tuga de l'interior. Aital, vos faretz pas fissar! 
N'aprenèm de causas , è! (los saberuts, ne podètz explicar mai e melhor dins los comentaris!)

E ben figuratz-vos que l'autre jorn, lo veguèri l'avion qu'escampa lo produch! Es un avion de pas res del tot, que fa plan paur que passa al ras del sòl qu'as l'impression que se va espotir dins las canas. 
Coma èra lo primièr còp que lo vesiái e que pensi de longa a vosautres legeires tant aimats, ne vos faguèri una videoneta, amb la risca que l'avioneta me gisclèsse dessús son produch ecologic que tuga las larvas de moissaus e que sabèm pas quinas consequéncias auriá agudas sus la paura de ieu, ne sètz conscients de las riscas que preni per vosautres? È?
Bon, aquí l'avètz: 




Tu que siás jos una pluèja tolosana, limotjauda, paulina o parisenca, as las bolas?

dilluns, 7 de febrer del 2011

Dels accents...

En portugués, los accents... cossí dire? E ben, son pas coma en occitan.

Dins ma gramatica de segonda man que me faguèt crompar l'Andrieu, legissi que:

- l'accent agut indica que la vocala es dubèrta e tonica.

- l'accent circonflèx indica que la vocala es barrada e tonica

- l'accent grèu indica que la vocala es dubèrta, mas pas tonica.


Resumit:
Vocala dubèrta: accent  agut o grèu
Vocala barrada: circonflèx.
E quand es grèu, es pas tonic.

Fau diversion: vos soveniatz de mon explica sus l'accentuacion catalana?

dissabte, 5 de febrer del 2011

Seria canina

Rottweiler dins la bauca


 Curiós coma un rottweiler


Dos chins sus un empont


Aquò's pas un chin


La potinga per intelligents

Lo mètge m'a marcat una potinga suedesa. Dempuèi Ikea, me disi que los Suedeses son de mond plen de bon sens. E ben, aquela potinga, o vos pòdi dire, aquò's pas un engenhaire d'Ikea que l'a inventada.
O Mila Dieus! Ja la notícia es un papièr long de trenta-cinc centimètres sus un vintenat d'ample escrich en polissa 2.5. E ben las instruccions per utilizar la causa me las calguèt legir quatre còps abans de començar de poder comprene. 
La potinga es un inalator, que, dins ma gripa, ai de problèmas per respirar. E coma, adolescenta, en mai dels botons, faguèri d'asma, ai los paumonets de delicats (non, fumi pas...)
La potinga sembla un chivronet de plastic per la forma suggestiva mas tanben per la moleta en bas. Levat que i a pas de pilas. Doncas, ara ai comprés cossí fonciona: te cal virar la moleta en bas, aquò carga l'inalator, te lo metes dins la boca, inspiras fòrt e i a una posca que se ven fotre dins los paumons.
Coma sabi que me cresètz pas, vos ai fach una videoneta amb la notícia, l'inalator e tot e tot. Video facha dins lo lièch, akò explica lo plan estranh... Soi contenta de veire que respiri pas mai coma Dark Vadòr.




(vertat, d'èsser malauta, aquò me melhora pas...)

la nuèch dins los musèus...

Lo Mèstre del Mond a fach quicòm mai encara: Google Art Project per visitar virtualament los musèus. M'agraaaaaaaaada.

divendres, 4 de febrer del 2011

D'umor romegaira...

Uèi, ensagi un concèpte tot nòu: blogar dins lo lièch. 
E ben es pas practic, que quand tossissi (es nul aquel vèrb), l'ordenador sauta, e tossissi sovent, ai un ordenador sautaire....
Lo mètge a dich qu'ai la gripa, la dels pòrcs, la dels aucèls, la de las vacas, l'h1n1, sabi pas quina e se'n fotèm. Repaus e paracetamòl per tornar del bon costat de la Fòrça. Enfin, de paracetamòl ne preni pas gaire, perque m'agrada de saber cossí evoluís mon còs e vòli saber s'aquò recuola o pas. Aquò fa que soi un pauc ensucada perque ai lo cap coma una semau.
Dimècres, anèri pas a l'escòla e lo mètge m'a arrestada tres jorns.
E de dijòus a dimenge, èra previst que gardèsse ma neboda. E me cal dire la vertat, aquò me pesava grèu de la gardar. Perque quatre jorns, aquò's long e los enfants, los aimi de luènh. Mas bon, aviái dich de òc, me caliá assumir ma conariá. Alara vos disi pas coma èri un pauc contenta quand lo mètge me diguèt qu'aquò èra una gripa e que non non non podiái pas gardar la neboda.

Lo problèma de la gripa, en mai d'èsser malauta, en mai d'aver de corbaturas a d'endreches desconeguts de mon còs  (especiala dedicaça a mos muscles intercostals), en mai de mancar l'escòla, e ben es que pòdi pas anar a l'autbòi. 
E aquesta setmana, èra una setmana pesuga per l'autbòi. Ièr, manquèri lo cors. Uèi, aqueste ser, i a una repeticion bèla super importanta que la vau mancar tanben.  Dissabte, i a una sortida a Pesenàs per carrièras (-15 ºC per carrièras a Pesenàs...) E dimenge, i a una animacion a miègjorn pels Restos du Cœur. Lo mètge a dich que en fin de setmana deuriái anar melhor. Me vau pas anar gelar a Pesenàs, soi pas masoquista. Mas poiriái anar dimenge als Restos du Coeur.
Aital, en mai d'èsser paures, auràn la gripa....

dimarts, 1 de febrer del 2011

Automedicacion

Ai raubat dins la cava de mon fraire la pocion salvatritz en dire "a! ben vaquí çò que me cal. Te preni aquel botelhon, ok?" :
"Ce médicament est un fluidifiant des sécrétions bronchiques et facilite ainsi leur évacuation par la toux. Il est indiqué chez l'adulte en cas d'affection respiratoire récente avec difficulté d'expectoration (difficulté à rejeter en crachant les sécrétions bronchiques)." 
 
Bon apetís!