divendres, 6 de juliol de 2018

Tròç de vida 024

Es un drollàs grandàs, tan grandàs coma magre, un despenja-figas vertadièr. 
Risolet als pòts, arriba cap a l'auto e me fa lo poton sul pic. Es simpà aquel dròlle.
Pausa son skate suls sètis de darrièr puèi se plega per s'assetar dins l'auto. 
Es polit coma un astre. A d'uèlhs de filha, de las cilhas longas, coma maquilhadas.
Charra e ponctua sas frasas d'un rire discret coma per se desencusar de parlar.
Va a una fèsta, sap pas tròp ont pròche de Besièrs
Telefona a son collèga per saber ont se tròban a Besièrs. 
Me maini de la complexitat per un adolescent de pausar una question simpla "ont nos trobam?", aquò li prendrà plan cinc minutas. Ne sorisi de sentir l'autre al cap del fial tan clar coma lo qu'es assetat a costat de ieu. 
Una festa de doas chormas d'amics. De foishencs e de besierencs. Sas explicas de las originas de las amistats son foscas foscas.
A benlèu pas 18 ans coma marcat sus son perfil de blablacarreja, lo permés, lo passarà dins dos ans, aprèp lo bac.
Prepara un brevet de mestieral ebenista e s'arregala. Aquí es en estagi e s'arregala. Li agrada de fabricar. Es urós d'aver trobat sa dralha. Son 14 dins sa classa. Dormís a l'internat, son 4 per cambra. S'endevenon plan. Es plan content de son licèu ont lo monde an pas missant esperit.
La rota entre Masamet e Besièrs vira, monta, davala e mai d'un còp, lo jove ditz qu'es una rota bona per i far de skate, soritz, s'i vei ja, coma los tipes que n'agacha las vidèos sus youtube.
Quand sèm a mand d'arribar a la gara, telefona a sos collègas que li fan creire que son partits. Davala de l'auto en dire que lo fan marchar, que devon èsser empr'aquí.
Lo daissi e vesi dins una 306 dos joves qu'an baissat los sètis e que s'amagan jos un lençòl. La vòlon far durar la galejada.
Son simpàs aqueles dròlles ! 

1 comentari:

manjacostel ha dit...

Es un tròc de vida aquela istòria? Fa bèl temps que n'aviai pas legida d'istòria sul web.Un plaser ! Que totes son sus facebook!