Cantalàs a Hautes Terres

blogariá escricha amb LaMarieta

Fòtos de LaMarieta

Çò melhor de hautes Terres, a despart del rescontre amb Kepa Junkera, foguèt l'espectacle de la Companhia CANTALÀS: La Mau Maridada.

Cantalàs, akò's una còla de dancaires amators que se recampan per faire d'espectacles que la basa n'es la(s) dança(s) del país.

A Sant Flor l'espectacle èra al mercat cobèrt (la Halle aux bleds en francés) que, de fach, es pas un mercat cobèrt, ni un fieiral, es una polida glèisa.

Lo mond, aviam pas lo drech de dintrar dins la glèisa desafectada abans l'espectacle e eriam totes amontonats defòra al solelh. Mas i aviá una rason artistica a akò.

Vos expliki: es l'istòria de doas familhas, e coma o aviatz comprés amb lo títol, i a una istòria de maridatge. E defòra, davant la glèisa, de cada costat, arribavan las doas familhas e i aviá un part pichoneta de l'espectacle que se fasiá defòra, LaMarieta ne faguèt d'unas fòtos:

Puèi dintrèrem totes, public e dançaires.

Per malastre, eriam pas plan plaçadas o benlèu es la configuracion de la sala-glèisa que permetiá pas de se congostar. Alara, a la debuta, comprenguèrem pas tot, perque vesiam pas tot. T'aviam doas auvernhatas dabans e vos o cal saber, las auvernhatas an lo cap gròs; ne veses pas lo solelh, e encara mens un espectacle.

Puèi, ensukèrem las auvernhatassas e i veguèrem e çò que veguèrem èra ... èra... ten, ben avèm pas de mots de tant qu'èra bon!

L'energia que sortissiá de l'espectacle te transportava e i èras talament dedins qu'aviás enveja de montar sus l'empont per èsser dins l'istòria e dançar amb eles.

Es tot plen de sensualitat, e daissatz-nos vos dire que lo Patrici Sauret quand dança es sensual sensual... E la borrèia a tres, la nòvia e los dos òmes , es d'antologia.

Per las doas representacions fachas a Sant Flor , la glèisa èra tròp pichòta per aculhir tot lo mond vengut veire Cantalàs!!

S'avètz mancat l'espectacle,

lo podretz veire a Rodés

lo dissabte 26 de Julh a la MJC a 16h.

Manquèssetz pas la nòça!!