dissabte, 29 de juliol de 2017

Quand Joan Lassala me paupeja las popas (títol putaclic per un pòst sens interés)

La setmana passada, per lo primièr còp de ma vida, anèri veire un cardiològ. 

Lo metge, lo generalista, lo que sembla Georges Clooney ( oè, mon metge sembla Georges Clooney e aquò èra pas marcat sus las paginas jaunas ont trobèri son numèro!), me diguèt que me caliá anar veire un cardiològ. 

- N'avètz un de cardiològ?
- E ben non, i soi pas jamai anada ieu veire un cardiològ. N'avètz un de me conselhar? 
- Vidal 
- Zo, fai tirar per Vidal ! 
- Sénher o Dòna? 
- A ben l'òme! A se far paupejar, tan val que siá un mascle.

Un mes e mièg pus tard, aquí que m'avètz a esperar dins la sala d'espèra del cabinet de Vidal & Vidala.

Vidal me ven quèrre. 
Es grand. 
Es vièlh.
A lo pel gris e en bròssa. 
E una blòda blanca.
Passa davant. 
Camina sens se preissar.

Li doni la letra que m'a facha lo metge per el.
La legís. 
Coma m'agradariá de saber çò que i a de marcat aquí dedins.
"Fot-li un det dins lo cuol, li farà de ben".
"Fai-li totas las pròvas possiblas que m'emmèrde pas mai."
"Pacienta adorabla, ocupa-te plan d'ela."

Me pausa quatre questions. Li respondi, franca. Aquò li agrada.

Ieu per venir, aviái cargat monshòrt-quaviái-quand-fasiái-defoot, mas baskets nike e un camisòt cort. La tenguda per far d'espòrt. Perque lo cardiològ, aquò te fa far una espròva d'esfòrç. Per veire s'as lo còr que fonciona coma cal. Alara, ieu t'ai cargada la tenguda per far lo test d'esfòrç. E aviái pas gaire manjat, per poder córrer mai d'aise sul tapís de córrer. Oè, sabi coma aquò fonciona ,ai agachat totes los documentaris sus Kilian Jornet ! 

Me fa passar dins una sala. 
I a pas de maquina per córrer.

- Desvestissètz-vos. 

Mèrda, es coma lo ginecològ!
Mèrda, ai cargat lo sosten mai laidàs de ma collecion, lo per far d'espòrt (=lo que meti pas jamai)
Mèrda. Mèrda. Mèrda.

M'asseti ont me ditz de m'assetar e aquí , clicclac, lo tipe me desfa lo sosten laidàs. 

E bim, coma lo ginecològ. 

E aquí, dintra sa secretària e charran. 
Se vos emmèrdi, m'o disètz.

Puèi comença de me metre de causas al còs. 
E agachi. 

Sas maquinas, las crompèt quand s'installèt, i a bèl brieu, al sègle passat, qu'es pas jove lo tipe.
Als ponhets, m'a fotut de pinças. Un pauc coma las de cargar la batariá de l'auto. E los electròds son de ventosas de 1892.
Risi.

El, sembla Joan Lassala, sens la patana en plaça del nas.
Inchalent o canhós.
Alassat o filosòf. 
Segurament los 4 a l'encòp.

Charram.
Tòrna la secretària.
Mas tira-te putassa! 
Per un còp que soi nusa amb un tipe que ganha mai que ieu, daissa-nos! 

Me ditz qu'aprèp aquò, me farà un tocar rectal. 
Coma aquò me fa pas reagir - me reteni de far de galejadas crassosas, que me coneissi!-, n'apond e ditz que serà amb dos dets.
Me reteni de n'apondre, de li dire que benlèu aquò m'agradariá o que "òsca!e aprèp inversam?"
Maduri. Amb l'atge, ai quitat de dire totas las salopariás que me passan pel cap. Ne disi pas que la mitat.
M'agradan sas galejadas. 
E mai el i crei pas mai. 
Que las deu far a totes sos pacients sas galejadas.
E la galejada, aquò's pas coma l'adòba : rescaufada, val pas un pet ! 

Me desbranca e me fa "viratz-vos sus la patèrna esquèrra". 
M'a calgut un temps per trobar l'esquèrra.

Me viri e aquí me faguèt una ecocardiografia. O quicòm coma aquò. 
Es coma una ecografia per verificar lo sèxe del nenon mas al còr. 

Lo problèma, es que èri virada d'esquina a l'ecran e podiái pas veire çò que s'i passava ni se mon còr aviá una quèca o una rega.

E o sabètz vosautres que lo còr fa de bruch? 
A despart del tifa-tafa que coneissèm !

Perque ieu li pausavi tot plen de questions. 
A oè, me vòs far de galejadas? E ben ieu te vau far de questions, vas veire! 
E ieu soi una usina a questions. Pòdi far mai de questions que çò que ma boca es capabla de prononciar e lo cardiològ ne foguèt victima.

Doncas, aprenguèri que lo còr fa d'ultrasons. 
Que sa maquina transforma en son que podèm ausir. 
E ben, aquò's pas polit polit lo bruch del còr, o vos disi.
E del còp, los chins, que los ausisson los ultrasons, benlèu l'ausisson lo rambalh que te foton nòstres organs ! 
Enfin, vos conti pas totes los rasonaments que faguèrem amb JoanLassale del temps que me quichava ma paura popa esquèrra amb son doppler plen de lubrificant. 

E puèi tot aquò arribèt a la fin. 
Çò qu'èra ben daumatge perque charraviam plan. 
Ont descubrissèm que me geina pas de parlar a mitat nusa del temps qu'un tipe me paupeja.
A ben non, me dison dins l'aurelheta qu'es pas una descubèrta, que totes mos amants o sabián ja.

Me fa m'assetar, pren de papièr e m'eissuga doçament, lentament e fòrt lo lubrificant sus la popa. 
A òoooooooc, vai-ziiiiiiiii, ne demòra encara tot pleeeeen.

E aquí, dintrèt sa femna.

E charra que charraràs la Vidala amb lo Vidal qu'èra a m'eissugar la popa e ieu desesperada. 
Seriá possible un pauc d'intimitat? 
Puta, lo còp que ven, i portarai un papieron "do not disturb, es a me paupar las popas".

Enfin, non, que i aurà pas mai besonh d'i tornar al cardiològ. #santat