divendres, 30 de juny de 2006

Fotbòl, un còp de mai....

Ieu èri per Espanha....
Enfin, non me'n brandi, mas quand Espanha jòga, soi per Espanha, perque i a Casillas, Puyol e Fernando Torres...
Alara lo rescontre Espanha França, èri per Espanha. E faguèri cagar tot lo mond amb akò.
Revenge del mond, que recebèri akò 50 còps:
(de còps que i a lo mond son desagradius...)

Fotbòl... Èra l'ora, non?

Cossí fa quauqu'un qu'a pas la telé per seguir la Copa del Mond?









Lo lògo en verd,
only for my blog :)

Ben fa coma pòt:
1- La seguís pas e se'n branda joiosament
2- Resquilha sos vesins e sos collègas per s'inscrustar
3- Se crompa una tele e puèi tant que i sèm l'abonament a Canal Sat
4- Agacha sus internet totes les renduts comptes de la premsa pas francesa
5- Ensaja d'agachar las videos sus internet
6- Compra una consòla de jòcs e lo jòc Fifa 2006, pren la França, la fa eliminar al primièr torn, e ne parlam pas mai
7- Fa fisança als Daneses e agacha sonque los gòls.
Per çò que me concernís, es 1 e 7. ;)


E ara, una pregariòta per aver en finala Brasil - Portugal.

Sonorizacion

Coma dich dins un comentari, ai fach la sonorizacion del primièr text del blòg.
Akí l'avètz

(es un pauc longàs, 16 minutas!, doncas pas de lagui se tarda per cargar!)
Soi pas brica contenta de la resulta. Lo son es poirit e s'ausís pas la votz del tèxt. Ai pas brica capitat de transcriure los sons e los tons qu'aviái dins lo cap quand l'escriguèri. E se lo meti en linha, es perque i ai passat plan de temps e me fa cagar de l'escampar. :-)))))
E, m'o cal avoar, me soi regalada d'o far. Emai la resulta siaguèsse una merdassa, me regalèri d'o far, alara lo meti en linha.



Pasmens, podètz totjorn escotar las musicas :)

Los extraches:

- Celebration, Kool & the gang
- When a man loves a woman, Percy Sledge
- Sexual Healing, Marvin Gaye
- Saturday Night Fever, Bee Gees
- Baby, one more time, Britney Spears
- Tomber la Chemise, Zebda
- Metele con candela, Daddy Yankke
- Beau dimanche, Amadou e Mariam
- Tchoo Tchoo, Karen Cheryl
- Gigi L'amoroso, Dalida
- Around the world, Daft Punk




Akò demòra doncas un text de legir!
Doncas:

Kool & the Gang comença. I a pas de dobtes, es melhor que Alexandrie. Mas ieu la coneissi pas la coregrafia de Celebration, fa pas res, improvisi, que me pagan per aquò far. Mon primièr ser. Me donèron aqueste vespre lo costum e las sabatas. Çò mai dificil foguèt de gardar l'equilibri suls pilòtis. Sembli una drag-queen. Fa pas res, aquò paga plan. De tot biais, jocada sus una plataforma d'un metre cairat a 1,50 m. del sòl, aquò t'ajuda a trobar l'equilibri necessari. Ara, jògui amb la barra. Fa caud aquí dedins. Lo fum dels fumaires, la susor dels dançaires, la calor umana (res de veire amb Maire Teresa, o cal pas tot confondre). Ieu tanben susi, ai caud. Pegar mon còs a la barra, montar-davalar lo long d'aquesta barra dura me fa de ben, l'acièr es freg.... e dur. Ma lenga. Lequi la barra. A pas cap de sabor. Sabi que m'agachan: los clients, segur, mas tanben los patrons. When a man loves a woman, caldrà faire langorós. La barra, la potonegi, l'alisi, la lequi coma se foguèsse mon amant. Es coma un gòd mas en mai long e sens vibrador. Ara me soi presa al jòc. Mon tapa-pecat ròse es tot banhat. Resulta de la dança o de mon gòd gargantuesc, sai pas. Sexual Healing. Ò, my God, qu'aquò's bon de dançar contra un amant que n'es pas un. M'entortolhi contra ma barra. Quiti lo sosten ròse. Sentissi lo freg de mon amant regde entre mas popas. Un conàs es montat sus ma platafòrma e me ven separar de mon amant d'acièr. Mèrda. An pas lo drech de montar sus la platafòrma. Te l'aganti per la camisa e monti-davali lo long de son còs. Demòri un pauc mai de temps pròche de la bragueta. Aquò se confla, me lèvi, recuoli, e te li foti un còp de pè amb mos pilòtis. Tomba, sos amics lo recepcionan e m'aplaudisson. Saturday Night Fever, l'ai agantada. Soi la reina de la serada, lo public es amb ieu, los òmes me badan e pican de las mans, quitament las femnas me badan. Tòrni a ma barra, que God save the queen, es plan conegut; i tòrni per una dança mai ritmada, fau la Britney Spears, One more time, òc, es aquò, encara un còp. Un tipe m'escampa sa carvata: super accessòri per jogar amb mon Gòd. Las musicas se seguisson, las caras de dejós la platafòrma càmbian. 5 oras del matin, la musica s'arrèsta. Tòrni davalar de mon Paradise Circus. Davali de la platafòrma. Vau al vestiari. Desmaquilhatge. Docha, cauda e longassa. Levis, Adidas, camisòt. Son 6 oras. Aganti lo 1er bus de la jornada. Tot plen de barras d'acièr aquí tanben... Non, soi pas mai sus ma plataforma. Pasmens.... 6.30. Mon lièch plan mofle. 14.00, dubrissi un uèlh. Me lèvi. Escampar l'aiga. Direccion lo frigò. De que i a dedins? Uèi serà iogort a la vanilha amb de cambajon, sens pan que la fornariá es tampada. Dimenge tantòst. Me'n vau al joc cap a 18.00, per me melhor jocar totara.

dijous, 29 de juny de 2006

Conhac, encara un còp....

Ai visitat 3 còps las baumas de Conhac. 3 visitas diferentas e complementàrias.
Un apròcha diferenta del sit, una intimitat que comença de nàisser amb la bauma, amb los dessenhs, amb lo freg, amb los ressons....

- 1èra visita: 10 personas, pas coneisseires mas interessats. Mon umor e ma curiositat son aluserpits pel guida. Mon interés pels dessenhs de Conhac comença...
- 2nda visita: al mens 20 personas, pas coneisseires e bidochons'attitud. Coneissi lo sit, enfin, es l'impression qu'ai. Complicitat amb lo guida: risolets e guinhadas.
Crompi L'Art prehistorique dans le Quercy de Michel Lorblanchet per començar de comprene e sentir la preistòria. Legissi lo libròt en un moment. Languissi la visita de doas oras que farai .
- 3ena visita: visita especiala de 2 oras. 4 personas: 3 especialistas del Paleolitic Superior e... ieu.
Una còla internacionala de recerca. Ai las aurelhas de plan dubèrtas. Agachi tot, escoti tot.
Mas de qué fau aquí amb aqueste mond ieu, fin finala? que fau quitament pas la diferéncia entre los periòdes de la preistòria, que sabi finalament pas grand causa. Rai, çò que sabi de la preistòria es çò que veguèri dins la familha Pierrafeu, los Picapiedra, the Flintstones, es dire ma cultura preistorica...
Alara perque i soi a aquesta visita pels VIP de la preistòria???
Perque me regalèri a cada còp e aviái enveja de ne saber mai.
E dins aquesta tresena visita, lo guida nos mostrèt tot plen de causas que mòstra pas de costumas: totas las traças de dets sus las concrecions, las mans, los aviforms, las grifadas d'ors.

Me cal parlar del guida de Conhac, Francis. Es tarrible.
Ja, coma guida es tras que bon. E coma òme es meravilhós.
Quand èra pichon, demorava pròche de Conhac. E quand comencèron de cavar per trobar la bauma, el venía e cavava amb lo mond. E coma èra drollet, qu'aviá 7 o 8 ans, podiá passar dins las galariás estrechas que los adults i podián pas passer eles. Francis èra los uèlhs dels espeològs inventors de la bauma...
Las baumas, los dessenhs preistorics, es tombat dedins quand èra pichon! Es afogat complet. Es plan saberut e o sap far passar. Puèi amb los cercaires, es plan clar. E m'agradèt fòrça son biais de posicionar coma guida: entre lo cercaire e lo public.
Cossí farián los cercaires sens el? la coneisson pas la bauma, sabon pas ont son las marcas de dets sus las concrecions, etc. El dubrís la pòrta e pòrta lo lum....
E los cercaires prepausan d'analisis, d'interpretacion.
Lo guida digerís tot akò e lo prepausa al grand public.
Lo guida es la pòrta de comunicacion entre las esferas universitàrias e lo pòble.
Es a l'encòp un òme normal, del pòble e es a l'encòp una cavilha importanta de la recerca.

Es per akò que guida es un mestièr que m'agradariá.




L'òme nafrat
Akò fa kikòm de veire akò...






Mai d'entressenhas:
Lo paleolitic superior sus Wikipedia, en anglés, en español, en francés, en italian.

Sits oficials de las baumas de Carcin vesedoiras:
Baumas de Conhac , pròche de Gordon
Bauma del Puèg Merle, pròche de Caurs
Bauma de las Meravilhas (pròche de Ròc Amador sens Mariam)

Las baumas en França:
http://www.grottes-en-france.com/ que finalament, vesèm que la màger part son en Occitània :-P

dimecres, 28 de juny de 2006

Avenidor

Quand me demandan se farai la professora tota ma vida, disi totjorn de non. Es important de poder cambiar.
Alara de còps que i a, me fau una tièra dels mestièrs que m'agradariá de faire lo jorn que n'aurai mon confle d'ensenhar:
- animatritz dins un ostal de retirada
- animatritz amb de deficients mentals
- jornalista
- guida toristica
- ganhaira al lòto.

Guida toristica...
Vos dòni l'explica deman qu'ai de mond d'anar veire...
Profechi de mos darrièrs jorns dins Carcin!

Mas s'avètz d'autres mestièrs per ieu, podètz totjorn prepausar!


eDiT lo 29 de Junh de 2006.
Apondi a la tièra: DJ d'un discòmobil

dimarts, 27 de juny de 2006

del fuòc o puslèu del non-fuòc...

Seguida de mas aventuras amb lo fuòc...

Los collègas venon per far una barbacoa abans ma partida.
Ièr, ploguèt.
La barbacoa a pres un pauc l'aiga. Pas gaire q'aviái mes una saca de plastic.
Decidissi dins un vam de genialitud de far cremar kikòm... aital akò secarà çò umid o banhat..
Te preni las aluquetas per enfuocar la saca de carbon vuèja.

Lo paket tomba dins la barbacoa. Murphy es mon amic. Tomba del *bon*costat. E te vakí totas las aluquetas amontonadas dins la partida umida de la barbacoa. Ne recapti d'unas e ne daissi un paketon, en me dire " Vas enfuocar lo molonet e akò te secarà akeste tròç" Perque las aluquetas, akò crema, non?

Ben non.

Enfuoqui la saca de carbon akò pren. Akò pren talament que de tròces de papièr cremat volèron.
Ara ai:
- l'ostal plen de trocets de papièr cremat
- la barbacoa totjorn umida...

Sus Wikipedia, aprenem qu'es Homo Erectus que mestrejèt lo fuòc.

Non. Farai pas de jòc de mots akí dessús.







Bonus track:

Johnny Halliday Allumer le feu

"il suffit d'une étincelle pour alluuuuuuuumer le feu", je t'en foutrais moi des étincelles... pfff

dilluns, 26 de juny de 2006

Sus l'autorota de Carcassona...

Per far Salviacapitala-Montpelhièr, i a dos camins possibles:
- passar per l'autorota: Narbona/Tolosa/Caurs
- passar per Millau
Passi totjorn per Millau: es mens car, i a mens de quilometres, lo païsatge es polit que non sai. Passi o per la Sala o per La Vila, segon l'umor. E mai que mai, passi per Millau que supòrti pas lo tròç d'autorota entre Tolosa e Narbona.
Pasmens, prenguèri dimenge lo camin de l'autorota. M'arrestèri al belvedèr davant la Ciutat de Carcassona, perque dins la vida, se cal cultivar...
Fòtos de çò que pòdon veire los toristas:
(clic sus la fòto per poder legir los panèus)











E mai los cagadors son un luòc de cultura:




Vakí! Es plan fach per una autorota pensi!
De regretar que siaguèsse sonque en francés!
Mai d'entressenhas sus la Ciutat de Carca akí

Pès en vacanças

Me disiái que fasiá un brieu que metiái pas de fòtos de pès, akò vos mancava, ne soi segura.. fòtos dels 2 darrièrs jorns...


Mon pè davant la ciutat de Carcassona misnuscula e tota trebola...:








Mon pè davant Dordonha e lo pont de l'A20...






Mon pè que prega a la glèisa de las Arcas:






Ròc Amador sens Mariam mas amb mos pès:







Avètz lo drech de dire que mos pès cargan totjorn las meteissas basquets...

dissabte, 24 de juny de 2006

Ròc Amador.... mas ont es Mariam?

Ièr, visita de Ròc Amador amb la maire.
Li disi "agacha Ròc Amador, mas i a pas MAriam".
Òc la sortissi a cada frasa ont i a "Ròc Amador", soi pesugassa, es aital.
La maire ritz pas. Bon, es normal , compren pas jamai mon umor...
Alara començan las explicas:
- Coneisses pas Amadou e Mariam?
Responsa:
- Perqué? Demòran a Ròc Amador?



pffffffffffff





E çò pièger es que soi segura que n'i a tot plen que lo comprenon pas mon jòc de mots... (poiriái tanben pensar que lo comprenon mas que los fau pas rire, mas aqueste 2nda explica me conven pas brica)

Doncas Ròc Amador s'apèla coma aquò perque i trobèron lo còs de SAnt Amador, la pròva akí:



Alara perqué Ròc Amador sens Mariam?Perque Amadou e Mariam, son dos cècs senegaleses malians inseparables que fan de cançons e dempuèi que Manu Chao s'es mes dins son business, an plan de succés.
Cantan akò:



Vakí, ara quand dirai Ròc Amador sens Mariam, auretz la diplomacia de rire, ok?


:-DDDD

divendres, 23 de juny de 2006

Inspecteur des travaux finis


Plaser de la vida professorala...

Fèsta del collègi.
Festassa.
Bon èime.

W. m''aviá dich, de matin, que me donariá una letra.
Arriba amb 2 o 3 amigas.

W. es una dròlla plan genta, totjorn lo risolet als pòts, en 6ena, mai granda que ieu, m'agacha totjorn amb tot plen de gentilesa. W. es dislexica, W a pas de bons resultats a l'escòla. W. trabalha, W. ensaja. W. a tot plen de qualitats, mas son pas de qualitats de l'escòla.

Arriba amb 2 o 3 amigas.
Soi a far las fòtos per la festa.

Pòrta un paqueton.

Dins lo paqueton, una letra.
Un fuèlh blanc.
Pour Madame**** amb una crotz occitana, plan facha, al gredon, puèi los mots:
coucou j'espère que vous allez bien car les cours en ocitan avec vous c'est super on samuse on rigole en aprenant est s'est plus facile d'aprendre et je suis que vous serais prof tutulaire.
car si je fais de locitan Jaimerais bien que vous soyer ma prof.
et ci vous nête pas la la né prochéne saché que je ne vous oublires jamais car un prof comme vous on ne peu pas oublié.
Je vous adore
est adieu.

vous me donnerais votre adrésse silvouplais sa sera pour vous écrire pendans les vacance.

N'èri tota esmoguda.
Sabi çò qu'aquò representa d'escriure una letra per aquesta pichona qu'èra tan discreta al fons de la classa, un esfòrç gròs.

Vakí. Parli pas gaire de ma vida intima-privada-professionala-a-ieu, mas akí, val lo còp d'o dire.

A, dins lo paketon , i aviá una esculptura d'argila... Sai pas tròp de qué representava, benlèu un cendrièr? (fumi pas...), enfin, pauc importa çò que representa, me faguèt PLASER que non sai.
Plorèri pas...


Mas quasi.

dijous, 22 de juny de 2006

de la comunicacion anglesa...

Conhac.
Visita de las baumas
Tras qu'interessant.
6 angleses nos acompanhan.
Son majoritaris, compreni pas perque lo guida contunha de parlar sonque francés e tant pauc anglés.
Fin de la visita.

A la sortida, disi a mos amics "I want to go to the cagador", so i went to the cagador.

Los comuns son mai nauts, cal montar un pauc, es un ostalet polidet.
Ausissi d'aiga que tomba... "Tè, la cadèna perd d'aiga".
Me sarri.
Ai la man que se lèva per dubrir.
Ausissi siular.
Coneissi pas aqueste aire.

Dubrissi la pòrta.
I a un anglés qu'es en trin de pissar.
Ops.

Tòrni barrar la pòrta.




Quand nosautres rondinam un "ocupat", los Angleses siulan.




Ara, o sabrem...



O sabi, soi fina...

dimecres, 21 de juny de 2006

hey teachers...

Fèsta del collègi.
4 dròlles an fach un grop de ròck, venon cantar 3 cançons.
doas cançons de Dutronc
e



Pink Floyd, The Wall

Es tarrible d'ausir a la fèsta del collègi, ont i a tot plen de professors "Hey, Teacher, leave them kids alone "
"We don't need no education
We don't need no thought control
No dark sarcasm in the classroom
Teachers leave them kids alone
Hey, Teacher, leave them kids alone !"



Los professors se desmontèron pas. Avián previst de cantar e cantèron plan davant una fola en deliri...






Ieu aviái prepausat de cantar akò:

Mas coma ja, capitàvem pas de prononciar correctament
Ils viennent du bout du monde apportant avec eux
Des idées vagabondes aux reflets de ciels bleus , de mirages

Traînant un parfum poivré de pays inconnus
Et d'éternels étés où l'on vit presque nus, sur les plages

Ben, daissèrem tombar l'idèa de cantar una cançon que siaguèsse pas en francés.

Oaf oaf oaf

Pascal Comelade

Vist uèi sus Vilaweb TV una entrevista de Pascal Comelade.

Extrach de concert akí

Un pauc de musica:


Pascal Comelade & PJ Harvey, Love too soon





Pascal Comelade, Sardana dels desemparats (pas completa)




Pascal Comelade, Maruxiña

François, Marcel e los autres...

Quand Bayrou e Amont son en cò de Drucker, akò dona akò:



La video es akí

Viscan los arquius de l'INA!


Una video de mai d'Amont lo bearnés akí

Remembre de dimenjada entre collègas

Sograte, K, Notrami e ieu :-)

perque de còps que i a AI TANBEN una vida sociala...

dimarts, 20 de juny de 2006

Als coneisseires de veituras: SOS

De qu'es aquesta veitura?



La qu'es davant *MA* toingogogoalllezallezallez....
Ensagèri de legir quicòm que poiriá semblar una marca e veguèri sonque "Monte Carlo"...

EDIT lo 26 de Junh de 2006:

Mai de fòtos!


dilluns, 19 de juny de 2006

diumenge, 18 de juny de 2006

Musèu Zadkine a las Arcas



Las Arcas.
Un vilatge pichoneton.
I auriá pas de panèus indicators se un jorn Ossip Zadkine aguèsse pas decidit de s'i installar...
Dins lo país, se veson plan de panèus "Les Arques - Musée Zadkine". Urosament que venguèron un rus, d'unes Olandeses e plan d'Angleses per far comprene al mond qu'aqueste país val lo còp...



Musèu Zadkine, o volguèrem visitar ja en novembre amb lo-General-que-s'apèla-pas-mai-lo-General-mas-Sograte mas èra en òbras. (t'ai un astre ieu...)




E aquesta dimenjada, yopí, anèrem visitar lo musèu Zadkine.

Abans d'arribar al musèu, i a una plaça davant la glèisa amb d'estatuas d'esculpturas de Zadkine. Aki l'Arlekin:
Akí lo messatgièr:


Tot akò es de bronze.
(es una impression o lo nivèl cultural d'aqueste blòg monta?? )

Doncas, faguèrem un pauc fòrça las colhas amb las estatuas esculpturas, la pròva en imatge:

Es dins aquesta posicion que me favorisa pas gaire qu'ausiguèri un "bonjour"masculin.
pfffff encara un que li aurai fach paur.
Amb Sograte risèm e se desmontam pas, contunham de faire de fòtos coma aquò, pendent... mièja-oreta...
Dintram ENFIN per visitar lo musèu.
Mèrda, lo qu'es a la caissa es l'òme que se riguèt de nos veire far las colhas amb las estatuas esculpturas.

2 entradas.

Suls bilhets: "entrée gratuite".
????
Alara, ieu qu'ai las cervèlas de còps que i a que van lèu, me fau mon film:
lo faguèri rire... me coneis d'endacòm e es the tecnica per me dragar... E Sograte que compren pas e que vei pas los films que passan dins mon sicap a ieu demanda. E lo tip de respondre en m'agachant:
" Pos vezem de novel florir
Pratz, e vergiers reverdezir,
Rius e fontanas esclarzir,
Auras e vens,
Ben deu chascus lo joi jauzir
Don es jauzens. (G.IX)" quand òm sap coma foguèt long l'ivèrn ongan per Carcin...

Non, akò's mon film....

Dins la vida vidanta del dissabte de matin, expliquèt que coma aviái la meteissa passion que l'Aurelheta, ben vakí, akò èra gratis. E lo tip, qu'èra tot timidonet, disiá akò quasi en s'excusant.
Akò fa plaser quand meme. Aqueste òme tant timid m'aviá reconeguda e me fasiá un present.
Soi over-VIP dins Òlt, que siaguèsse dich e plan clar!
( mercés a l'Aurelheta quand meme :-P )

Bon, tot akò per dire finalament que me congostèri de descubrir l'òbra de Zadkine en compania de Sograte, que la video vièlha tirada de l'INA que nos passèt lo Timidon èra plan interessanta, amb Zadkine que parlava de son òbra e de Carcin e filmada a la Hitchcock...
Puèi dintrèrem dins la glèisa e demorèrem la boca dubèrta dabans akò:
... la fòto es pas bona...
Es de veire.
E vos parli pas de la glèisa de las Arcas nimai del Crist esculptat per Zadkine.

Se sabètz pas de qué faire pendent las vacanças venètz visitar las Arcas.

dissabte, 17 de juny de 2006

La verge barbuda

Escaisses

Vos parlèri del General akí e akí

E Lo General, en bon general, me bramèt dessús...
"Perqué m'apelas lo General sus ton blòg? "

Òm pòt pas mai donar l'escais qu'òm vòl ara... pfffffffff

Lo General s'apela lo General perque cada còp que parla, nos cal obeir, e al cap d'un brieu, totes los que son a son entorn començan de dire "**** a dich que...".
Bon, OK, quand òm sap l'amor que pòrti a l'Armada, i a de qué se far de lagui... Mas non, aqueste General d'aquí a tota mon amistat.

Alara, per se far pas apelar lo General, me prepausa d'escaisses: son segond pichon nom, d'escaisses sortits de sas cervèlas tant productivas.
Mas non.

Non! Los escaisses, akò's pas l'escaissat que los decidís!

Mas ont van las nòstras tradicions???? ÒU!
E los escaisses del meu blòg, los decidissi ieu...

Doncas, lo General demorarà lo General fins a una novèla produccion de mas cervèlas que elas son pas gaire productivas...

Pasmens se me volètz ajudar, lo General, en mai d'èsser un pauc general, es una persona:
- inteligenta
- intelectuala
- comica (a un umor un pauc estranh, rai mas l'aimam è)
- filosòfa
Avètz lo drech de demandar de qué fa una persona d'aquesta qualitat amb ieu. Ieu tanben m'o demandi...

Alara, m'anatz ajudar per li trobar un escais??


O pensatz coma ieu, que çò que vòl es montar de grad e passar colonel???

divendres, 16 de juny de 2006

L'AFP fariá un omenatge a Devos?

AFP 14.06.2006 - 12:16

Zinédine Zidane vient d'acheter une propriété proche d'Evian (Haute-Savoie) afin d'y passer son imminente retraite de footballeur, selon le quotidien suisse La Tribune de Genève, publié mercredi.

Zidane, 33 ans, a acheté une maison dans la commune de Publier, toute proche du lac Léman entre Evian et Thonon, rapporte le journal, qui ne cite pas ses sources.

dijous, 15 de juny de 2006

Ont tornam a la religiositat del blòg...

Quand vau en cò d'un collèga a Tolosa, vakí ont soi.....


dimarts, 13 de juny de 2006

il Caimano de Nanni Moretti







Coneissiái pas Nanni Moretti.
Prenguèri lo Caiman dins lo morre.
Un leiçon de cinema. Òsca
Sens parlar de la leiçon d'istòria sus Berlús... (emai i siaguèsse pas anada per akò)

I descubriguèri tanben l'actor Silvio Orlando (akí, sus l'aficha). Quin actoràs!
Vakí soi amorosa!

Akí, sabèm pas grand-causa de la vida italiana ( enfin, me sembla.... soi benlèu ieu que m'entressenhi pas pro ). O sabiatz qu'en Itàlia existisson los prèmis David di Donatello? (non, es pas lo nom d'una tortuga ninja.... ). Doncas Nanni Moretti amb aqueste film ganhèt lo prèmi del melhor film, Silvio Orlando aguèt lo prèmi del melhor actor masculin (o veguèri ieu qu'èra un bon actor, en mai de bèl òme... ). Il Caimano foguèt premiat ongan per maitas seccions, per o veire es akí. I veiretz tanben que Romanzo Criminale i foguèt tanben premiat.

Òsca a Nanni Moretti que me faguèt passar un bon moment de cinema.

Granmercés al General que me conselhèt aqueste film!

dilluns, 12 de juny de 2006

que volètz, es la prima...

Ièr agachèri la finala òmes de Roland GArros.
I coneissi pas res al tenis, e mai m'agrada pas.
Ieu çò qu'agachavi èra lo Rafael Nadal...





Son agach negre
Sos pials plen de susor
Sos braces musclats... Avètz vist sos braces???
Sa pel bronzada...
e son pantacort blanc...
Joga bonito lo Rafa ;)

aqueste pantacort blanc que li fa un tant polit cuol....



Per las fòtos del Rafa, es akí.....


rafaelnadal.com

Post-it: jogar al lòto abans la fin de la setmana

Tòrni de Montpelhièr
Coma sabi pas partir quand cal, parti a l'entorn de 8 oras del ser.
Avairon by night, coneissètz? Ne soi una especialista.

Lo pont d'Avairon... (òc, fau d'umor...)
Rodés
Arribi a La Sala.

La Sala by night, coneissètz? Ne soi una especialista.

La rota es plan bèla. Pas degun a La Sala (akò, èra pas necite d'o precisar... )

Un viratge.
Dins la corba sortís un òme, braceja amb un lum dins la man.


Akò, m'o faguèron ja un còp. Èra a Montpelhièr, un tip que braceja, de nuòch al mièg de la rota. M'arrestèri, un pauc espaurugada, e se m'agressa ( òc, es la fauta de ma maire que vei lo mal de'n pertot akò...), mas m'arrestèri, e s'aviá besonh de ieu akeste òme?. Èra per que lo prenguèsse en estòp...



E akesta nuèch, a la Sala:
Lo tip braceja: m'arresti, es benlèu qu'a un problèma. Doblidi pas de clavar la pòrta de l'interior. Baissi la vitra.
"Police, arrêtez le moteur SVP"
e mèrda....
a sa drecha, una clio de poliça, 3 òmes de mai, un agacha dins los gemèls.
e mèèèèèèèèèèèèèèèèrda.

"Vous avez été contrôlée à 68km/h en agglomération".

responsa meuna: "Ah" (de còps que i a m'escagassi per trobar la replica que cal....)

...

Sortissi totes los papièrs demandats.
Expliqui ont vau, d'ont veni, lo perque del cossí.
Parli tot suau.
Ma granda gula s'es esvanida. Capbassa...

Arriba un grandàs, magrostel... "Bon, ça va pour cette fois"
e lo que bracegèt al mièg de la rota: "Et attention à la vitesse hein"

Ne demorèri bocabadada.

"heuuuuuu, c'est gentil"
"Mais oui on est gentil, on le dit pas assez".
Bon alara, o cal dire:
La polagalha, los policiers de la Sala son braves (amb ieu) Les policiers de Decazeville sont gentils (avec moi). Decaze policemen ara nice people (with me)

Bon, soi una venduda, mas, akò arriba pas cada jorn alara o cal dire.

Ai pas encara compres perque me daissèron partir...
Perque francament, ja a La Sala, la practica es pas nombrosa, alara se daissan partir la soleta que se daissa prene, faràn pas gaire de beneficis ongan me sembla...

Doncas, la morala del jorn:

Fuck visca the police (of Decazeville, anam pas generalizar tampauc , cal pas desconar)




diumenge, 11 de juny de 2006

Cartas clandestinas de un cartero quasi enamorado - Pablo Caballero

Cartas clandestinas de un cartero quasi enamorado...
Akò n'es un de títol! que te dona enveja de legir lo libre!
L'agachi, collecion "nuevos autores, nuevas propuestas, nuevas voces" de l'ostal d'edicion Caballo de Troya. Akò m'agrada.
Legissi la quatrena de cuberta:
Aviso a los lectores
La imaginación es libre eso dice la tradición humanista. Otros argumentan sobre las relaciones entre la imaginación, el sueldo y las condiciones laborales. De esas cosas trata esta novela. Cartero es una cualquiera. Alguien con quien quizá te cruces cada día sin reparar jamás en él. Cartero es uno de tantos. Cartero es invisible. Su vida se sostiene en un precario equilibrio. Trabajo, rutinas, sencillas ceremonias cotidianas, poco más. Cartero es un tipo metódico, cada tarde escribe una página de su diario. Luego la arranca y la guarda es un sobre sin remite, con la dirrección de alguien a quien no conoce manuscrita. Al día siguiente introduce el sobre en un buzón de su ruta de reparto, cada día en un distinto.
Vive en un piso que comparte con un joven de su edad. Su relación con él es aséptica, informativa. Codicia a la novia de su compañero de piso. Unos ojos miopes envueltos en vaho, un albornoz usado una voz cantando al otro lado del pasillo. Eva entra poco a pocoen su restringido y precario mundo. Podría ser la mujer de su vida. ¿Por qué no? Se supone que uno debe hacer algo cuando ve pasar a la mujer de su vida por delante de sus narices. ¿Imaginar es una forma de consuelo?



Vakí. Tot es dich dins la quatrena de cuberta. La resulta: me faguèri cagar tot lo long del libre - urosament es pas gaire long. Es per aquò qu'ai decidit de legir pas las quatrenas de cuberta, ni de veire las bandas anóncias del film ni de legir las criticas, etc. Fan cagar de me levar tot l'interés del dakòs.

Ara causissi los libres sus son títol, sa cuberta, lo nombre d'estèlas qu'a sus Amazon e los conselhs del monde.
Mas akò ne tornarai parlar quand ne serà l'ora....



dissabte, 10 de juny de 2006

vacanças: de qué farai aqueste estiu? (3)







30 de Junh, 1er e 2 de Julh,
serai a Sant Flor dins Cantal pel festenal Hautes Terres.

Hautes Terres es un festenal simpatic que quasi tot es a gratis e lo mond i dançan grèu.
Puèi Auvernha es polida.
Puèi la Marrida m'alberga.
Tot benef.
Benlèu i aurà de mond en cò de la Marrida, alara podrem rire.


Ongan, vòli pas mancar:
- Montanha Negra, soi fan....
- Voix d'hommes
- la scèna de solistas
- l'espectacle coregrafic "Bourrées" per la borrèia akò ma'grada, e que dedins i a PAtric Sauret, lo danáire, e que el tanben m'agrada.
- Xavier Vidal e Cyril Brotto, perque vakí, sèm de Carcin o ne sèm pas ...
- La Mal Coiffée, qu'es un grop de femnas plan bon... e que ieu tanben soi mal penchenada
- Trio Patrick Bouffard e Anne Lise FOy, perque la viela de ròda, es un instrument que me fascina

Plan segur, me passajarai, rabalarai d'una scèna a l'autra amb mon èr colhon e mon agach fascinat pels musicaires...




Cal dire que lo melhor moment del darrier Hautes Terres, foguèt la partida de babyfoot, mas s'o disi, perdi l'imatge de marca qu'ai pas , non?



Lo sit oficial: saint-flour.com/hautes-terres

Aki Salviac

A akeste, i anèri per l'aficha. Es polida, òi?
Bon e per lo títol... Najac. Sabiái qu'èra per aquí.
Aviái pas vist cap publicitat per aqueste documentari, sabiái quitament pas qu'existissiá! Passèri dabans lo cinema ABC de Caurs e agachèri lo programa, e demorèri per veire akò.

La primièra mièja orada, me faguèri un pauc cagar, amb doas questions que m'obsessionavan:
- son totes falords a Najac o lo JH Meunier nos a facha una seleccion? Aviái l'impression qu'aviá fach una seleccion dels colhons del vilatge.
- franchimandejan totes a Najac? Es plan per Avairon? Ne sètz segurs?
Bon finalament, al cap d'un brieu, comencèri de prene un pauc d'afeccion als personatges / a las personas / del film.
Urosament lo conse arriba e parla francés coma qualqu'un del país macarèl!

En tornant de la sesilha, legiguèri suls forums de cinema, lo mond cridan a la poesia del documentari etc. Ieu la veguèri pas. DEvi pas èsser poèta. Es pas mal, mas bòf bòf. A mièg camin entre Las 4 sasons d'espigola e Profil Paysans, que m'agradèron, aqueste m'agradèt pas tant. Pasmens, plan de sequéncias m'agradèron: lo vièlh amorós de sas veituras, lo jove païsan biò mas sai pas. Soi pas convençuda per aqueste tip de "documentari".Ont voliá anar lo realisator? Mostrar la vida d'aqueste mond? Es que la mòstra vertadièrament? Cresi pas. Es que los aimam a la fin del film? Non. Es que soi sortida amb lo risolet als pòts o soscaira? Non. Alara perque m'agradèt pas? O pòdi pas explicar clarament. Benlèu perque a ieu me cal un fial conductor, aki lo vesiái pas.


Soi benlèu tròp cartesiana.
Pas pro poèta.


Rai, es un fach, soi pas sensibla a la poesia.

divendres, 9 de juny de 2006

vacanças: de qué farai aqueste estiu? (2)

Anèri a Barcelona fa quauques jorns.
E veguèri lo programa dels corses d'estiu de l'Universitat de Barcelona titolat "Endinsa't a la UB".
Son de corses pendent una setmana, cada matin o cada tantossada, pendent lo mes de julh.


Suls 40 corses prepausats, n'i a 3 que m'interessan bravament:



- Dels superherois als manga: el llenguatge en els còmics. La BD espanhòl m'interessa fòrça, mai que mai son evolucion, e tanben l'evolucion del nom per la designar. Vos sovenètz benlèu dels vòstres corses d'espanhòl ont vos fasiatz cagar coma una rat mòrt vòstra professora (òc, en espanhòl, es totjorn una femna, es estadistic akò) vos parlava de "tebeo" quand passaviatz 3 oras sus una vinheta de Mafalda... A, Quino, cossí farián los professors d'espanhòl sens tu???
Ben, quand desbarquèri en Espanha, ausissiái pas jamai lo mot "tebeo", mas totjorn lo mot "cómic" e lo mot "historieta". Cada dakòs son genre, son nom. Sens parlar del manga.
Vakí un tema que m'interessa fòrça, emai i coneguèsse pas grand causa.
Lo cors es doncas del 17 al 21 de Julh, de matin e còsta 155€.

- El cinema d'avantguarda i la seva relació amb les arts plastiques. Mai que mai perque i coneissi pas res al cinema d'avantalmodovar... Al programa projeccion d'un film de las annadas 20 amb comentaris. Lo pè.
Lo cors es del 17 al 21 de Julh, l'aprèp miègjorn e còsta 155€.

- El paisatge del vi: la construcció del no urbanitzable... Ieu que soi d'un país viticòl...
Lo cors es del 17 al 21 de Julh, l'aprèp miègjorn e còsta 155€.

Es plan, de matin: BD, lo tantòst: cinema o reflexions sus l'evolucion del païsatge! T'ai un art per emplir las jornadas...


Mas, i a un problemòt...
Akò tomba exactament al moment d'Estivada de Rodés!

Grrrrrr
E ieu sabi pas causir...



Per veire lo detalh de totes los corses prepausats, es akí, als Juliols de l'UB.

Fenèstra amb vista....

Ostal de K
Lo cagador.
Quand t'assetas sul cagador de l'ostal de K, de la fenèstra, veses akò:




e ausisses akò:




Cagador setòri....
Veses lo cèl
Veses lo vent
Ausisses los gavians rire
Benlèu se trufan de tu.
Non, siás tu que te trufas dels gavians...
que per un còp te podràn pas cagar dessús!



Soi poèta...

dijous, 8 de juny de 2006

Lo còr cramat

L’ivèrn a enfin daissat Carcin.

Barbacoa sortida.

Pensavi de ne faire amb l’Aurelheta e l’Astroneta mas finalament, faguèrem un picnic al molin de conhaguet…
Me caliá acabar la carn crompada pasmens.
Direccion la barbacoa dins la cort.

Abans de contunhar, o cal dire: soi maladrecha que non sai. Mon paire me disiá totjorn “Tu, fas çò k vòls amb tas mans, non?” Èra d’ironia, aviatz comprés… es que sèm comics dins la familha…

E sabi pas alucar un fuòc. Ai pas passada la preistòria: lo fuòc, lo mestreji pas… Las aluquetas, es tròp complicat per ieu. Las copi. Fau tombar lo paquet. E ne passi. E quand capiti de n’aver una que pren fuòc, lo fuòc s’escantís. E quand s’escantís pas, que pòdi tocar lo papièr jornal amb l'aluqueta enfuocada, akò pren pas. O cal faire quand meme: capiti pas de far cramar un tròç de jornal.


Intermarket, compri de carbon, e de dakòs k’o fan cramar tot genre “tu tanben podràs alucar un fuòc”. Compri tanben La Dépêche, qu’ai pas de papièr jornal a l’ostal… ne profechi per la legir, ten, akò tomba plan, i a un article sul collègi. Ai d’astre dins ma conariá de còps que i a.

Soi metodica.
Lo papièr jornal.
La lenha tirada d’una caissa raubada a la cosina del collègi.
Lo carbon.
E entre tot akò, lo dakòs “tu tanben pòdes alucar un fuòc”.

Aluqueta. La meti sul papièr e sul dakòs “tu tanben pòdes alucar un fuòc”.
Enfin, pas la primièra d’aluqueta, cal pas somiar, la quatrena o la cinquena…

Akò pren.
Akò pren plan.
De flamas bèlas.
Coma pas jamai ne capitèri dins ma vida.

Las marridas lengas a aqueste moment del raconte van lèu. Vos arresti tre ara: NON, metèri pas lo fuòc a l’ostal.

Ai pas de paciéncia.
Preni la grasilha.
I meti dessús los magrets de rit (òc, èran de magrets, akòs bon).

Non, pòdi pas esperar que i agèsse pas mai de flamas. O sabi que la carn, la cal faire amb la brasa de la barbacoa, mas ieu fau coma vòli. Las vau manjar ieu, non?

Mos magrets se craman plan. Quand son totes plan cramats/negres/salats/erbasdeprovençats, los mèti dins una sièta.
Las flamas contunhan de flamejar.


Dins lo paket de carn, demòran de trocets de carn: son de còrs. Ara compreni la preséncia de pals dins lo paket: es per far de broqueta. Yopí. T’empali los tròces de còr sus l’ast.
De broquetas, n’ai 4 en tot .

Sai pas se manjarà totes aqueles còrs, que lo còr manjat, akò marca mal… mas bon los vau pas escampar non?

Te meti mas broquetas sus las grasilhas e m’assèti per manjar un bocin de magret. Es bon lo magret emai amb de maionesa e de pespilemon.

Sètz encara akí? Oaf oaf oaf



Al cap d’un brieu, me levi per veire ont ne son mas broquetas.



Los astes èran de lenha… e las flamas contunhavan de flamejar.

Akò aviá cremat.

Aviái pas mai de broquetas.

Romanzo Criminale

Yopi, un film en VO a Gordon.
I anèri, pensatz plan.
Diluns caumat. 3 oras. Quina calor a Gordon.
La sala es fresqueta.
Coma de costuma, ai pas legit la presentacion del film. Ai causit sul critèri "VO". D'un autre costat, a Gordon, avèm pas gaire la causida... Akò o 4 étoiles, un film francés, aimi pas lo cinèma francés, me fa cagar lo cinèma francés. Doncas entre una merda francesa (es un pleonasm? mas nooooooon) e un film escur (dins totes los sens del tèrme:P), la causida foguèt lèu facha
Legiguèri pas de qué parlava, pasmens entre lo títol e l'aficha, aviái una idèia...









Per l'aficha e lo títol: Itàlia. Mas pas l'Itàlia dels films de Benigni, l'Itàlia un pauc (fòrça?) mafiosa... 2oras30 a seguir una banda de trafiquants, de jovenòts puèi un pauc mens joves, que, per argent, "prenon" Roma e bailejan lo trafic de drògas. Es un bon film que veguèri pas lo temps passar (supòrti pas de demorar assetada mai de 3 quarts d'ora a de reng...). Pròva que la cobesía e sed del poder poirisson l'òme (la femna tanben, è, vos rasseguri) mas tanben panorama de la situacion politica e sociala de l'Itàlia de las annadas 70.

Kò èra marcat a la fin del generic (òc, me soi pas sonhada: legissi totjorn e encara los generics cap a la fin....) k'akeste film s'inspira de la situacion en Itàlia en 1970 e 1992. Alara, ieu, qu'agachi pas Questions per un Campion me demandèri, de que i aguèt en 1992 en Itàlia?
Sus Wikipèdia, aprenèm que : Nel 1992 iniziano dei processi per corruzione (il cosiddetto pool di "Mani Pulite" o "Tangentopoli") che coinvolsero tutto il pentapartito e che ne distrussero di fatto la struttura, colpendo anche partiti esterni come la Lega Nord. Reestructuracion politica en Itàlia, doncas, perque akò èra lo oai (ai un esperit de sintèsi meravilhós, sabi)

Enfin, quand meme, i a quicòm que me fa cagar akí dedins: es que sabiái pas res d'akò. E akesta ignorància sus l'istòria recenta d'un país vesin me fa vergonha. Bravament vergonha.

Urosament, que vau al cinema veire de films en VO per ratrapar mon ignorància generala...

Tè, vòli anar veire Il Caimano... que lo General m'o conselhèt e que passa a Caurs en VO. Parla de politica en Itàlia, de Silvio... Vos rasseguri, aqueste, sabi kal es.... mas soi segura que n'aprendrai de bèlas!


Pùei que parli de cinema italian, avètz vist Viva Zapatero?


Quand meme, i tèni:





La vita è bella!