Granda Nuèit d'Occitània, o cossí aver l'impression de te far enfifrar dins una mina desafectada

Dissabte passat anèri a la messa de la granda nuèit d'Occitània dins l'encastre del Festenal Occitània. Un festenal que me fa regretar de pas viure dins lo ròdol mondin de tant que la programacion generala me sembla interessanta.

Dissabte, anèri doncas a Caramauç a Cap Descobèrta que l'aficha m'agradava bravament, mai que mai : Balaguèra (especiala dedicaça!!), Mosaïca ( d'arabs que cantan de borrèias, aquò m'agrada), Lo Còr de la Plana (lo boys band mai sexi del mond! ) e La Talvera e Silverio Pessoa. Ok , se paguèri 16€ la dintrada èra mai que mai per tornar veire La Talvera e Silverio Pessoa qu'aviái badats lo ser d'abans :P.

Dintrèri a Cap Descobèrta e aquí i aviá tot plen de cameras e d'installacions que la causa èra filmada. Aquò marcava plan!

Balaguèra canta en primièr. Cantan pas que tres cançons. Remarca, las polifonias bearnesas, n'ausisses 3 , as tot ausit. E se'n van installar dins lo radassièr, qu'aviái pas encara comprés perque i aviá un "salon" installat sus la mitat eskèrra de l'empont: akò's per las entrevistas! E un tipe que virava l'esquina al public entrevista Balaguèra. Del temps de l'entrevista, i a cambiament de platèu.

Tròbi lo principi genial: aprofechar los cambiaments de platèu per far d'entrevistas als artistas, akò m'estrambòrda! Aurem de musica, d'espectacles e d'entrevistas, los ausirem paarlar, youhou! Mas. (pensatz plan que i a un "mas"!). Capita pas de far Taratata lo primièr con que n'a l'idèa. Entrevistar lo mond e faire l'animator, aquò's un mestièr e s'improvisa pas.  E se siás pas un animator o un comedian, siás pas un animator o comedian, es aital, cal daissar la plaça al mond qu'o sabon faire. E, pecat, lo tipe que fasiá las entrevistas, o cal plan dire, èra nul. Primièr,a  despart del fach que virava l'esquina al public (eriam benlèu personae non gratae...) i aviá pas de ritme dins sas entrevistas, semblava de tele de las annadas 70 que te dormisses e te desrevelhas quand ven la reclama (o que te fot un còp de coide lo vesin perque roncas). Segond, quequejava, cercava sos mots e sabiá pas la mitat de las causas, me sembla pas gaire normal que quauqu'un que va entrevistar d'artistas sachèsse pas se lo disc que ne parla es lo primièr o lo segond o lo tresen, e s'o sabes pas, dissimulas, borricòt. Tres, volguèt improvisar e  aquò foguèt la cagada de la serada (o una de las cagadas de la serada): se levèt entre doas cançons de Mosaïca, genre "òu, vos veni veire anam improvisar una entrevista", la cata entrevistala e la cata tecnica (bon, los problèmas tecnics aquò pòt arribar)... Desiri bon coratge al mond de Piget Produccion pel montatge de las entrevistas per ne far quicòm de corrècte!

Mas aquò's pas la sola causa que faguèt que lo mond sortiguèron amb un sentiment de "m'an enfifrat pregond".

Sul programa oficial èra marcat: "La création occitane est foisonnante et diverse, cette 2ème édition de la Granda Nuèit d'Occitània, soirée exceptionnelle du festival, nous permet d'aller à sa rencontre avec de très nombreux artistes. Echanges feutrés et plateaux artistiques alterneront avec un « programa fabulós » : Mosaica, lo Cor de la Plana, Marilis Orionaa, Delphine Aguilera, La Talvera & Silvério Pessoa, Balaguèra. De plus, originalité cette année, avec la présence de compagnies de théâtre." E ne faguèri una brava reclama d'aquela serada! E finala, 16€ per veire tot aquel mond aquò's pas car. 

Mas los veguèrem pas. Bon, soi missanta, los veguèrem. Òc, los veguèrem , de perfil o d'esquina. Vertat es, lo Còr de la Plana, an totes un polit cuol dins lor jean de marca, mas m'agradan mai de fàcia. Me cresètz pas? Es normal que me creguessiatz pas, un espectacle normal que pagas 16€, los artistas t'agachan. E ben aquí non, agachavan la camèra (e, o avètz compres, la camera, èra pas del costat del public). Bon, coma vos sentissi increduls, la pròva, en fòtos :

 Delfina Aguilera

 Lo Còr de la Plana

Una causa mai! Caguèron l'òrdre dels artistas... Metre Marilis Oriona entre dos meteires de fuòc de fin de serada aka entre lo Còr de la Plana e La Talvera, èra una error per l'ambient de la serada. Auriá calgut far una primièra partida Balaguèra, Aguilera, Orionaa, Pausa, puèi en 2nda paritda los que faguèron montar l'alhòli: Mosaïca, Lo Còr de la Plana e Forróccitania /La Talvera-Silverio Pessoa, error estrategica, aquò arriba, es pas grèu. Las errors, tot lo mond ne fa. De bordas, tanben. Mas quand es un festenal gròs, amb un budget enòrme,  que n'es pas a sa primièra edicion, ben i a de causas que las engolisses pas.

E vòli plan precisar que los artistas, eles, faguèron plan son trabalh, pas res de dire contra eles :) al bèl contrari! deguèron far amb de condicions que devián pas èsser aisidas....

E perqué los artistas èran virats cap a la camèra? E ben perque aquela serada, sa tòca èra de far un DVD per promòure los artistas occitans.  Bona idèa! Sul principi. Perque normalament, quand vòs far de reclama, fas maitas presas. Jògas pas tot sus lo solet registrament d'una serada que los artistas èran quichats e pas en fàcia de son public. Mas rai, soi pas artista, bailegi pas cap grop, aquò's pas mon problèma. Mon problèma es lo problèma del public. 

E ieu, public innocent, m'agradèt pas.

M'agradèt pas de me far cagar grèu pendent las entrevistas.

M'agradèt pas de veire, en plaça del teatre anonciat, un montatge video de la Rampe que vesiam mal perque i aviá l'ombra chinesa dels cables sus l'ecran (fa seriós aquò ten) e qu'ausissiam pas perque i aguèt una cagada sonòra (fa seriós aquò ten), lo Joan-Loís Blenet ensagèt de salvar l'afar coma poguèt, e espèri que la Rampe-Tio que fan un trabalh remirable, auràn bramat.

M'agradèt pas de pas existir coma public. 

M'agradèt pas que m'enganèsson, aquelas causas, las cal prevenir "faretz lo public per un registrament video, es pas un concèrt normal" e pas anonciar la causa fabulosa coma èra fach dins lo programa, e pas far pagar 16€...

Urosament que pas degun del mond que lor faguèri reclama de la serada faguèt lo desplaçament, auriái agut bravament vergonha de los aver fach venir a aquela serada pietadosa.

Quand totes los amb qual parlas te dison  a la sortida "e ben m'esperavi pas a aquò,  los vesiam pas los artistas, o aguèsse sachut...", te dises que l'an cagada sa serada bèla de son festenal.

Tres jorns mai tard, lo cuol me fa encara mal.

.