Mariscal

Cada còp que vau a Barcelona, vau veire la mòstra que i a a la Pedrera perque es totjorn una mòstra interessanta e, punt positiu, a gratis. D'aquesta passa, i a una mòstra retrospectiva de Mariscal.

Mariscal, lo coneissètz pas? Mas siiiiiiiiiiiiiiii, es lo tipe que dessenhèt Cobi.

"Que dessenhèt qué?"

Cobiiiii!!! lo gosset-simbòl dels Jòcs Olimpics de Barcelona en 92, e mai ieu qu'èri pas nascuda, me'n soveni!

Enfin, Mariscal, sabiái pas qual èra, e i anèri a la mòstra perque las mòstras de La Pedrera m'an pas jamai decebuda.

E en arribant, sul trepador,te vesi aquò:

La mòstra tòrna sus 40 ans de carrièra de Mariscal, tot plen de dessenhs, tot plen de causas, de creacions de tota mena sus de supòrts variats, d'art modèrn sanitós, qué. Sabiái qu'aquò podiá existir. A la debuta, me faguèt pensar a Ben (que ne veguèri la mòstra a la debuta de julh a Lion) mas pas brica, es plan mai agradiu que Ben. Ben, i a quicòm que te destorba dins çò que fa e Mariscal non, te fa de ben! (òp òp òp jòc de mots!). Puèi, Ben, as totjorn l'impression que te pren per un con, e aquí Mariscal, as pas aquel sentiment, las causas son simplas, enfin, semblan simplas, mas trabalhadas e soscadas, bon, bref, m'agradèt. Ne sortiguèri plan contenta! Coma de costuma a la Pedrera, es una mòstra rica, amb una molonada de causas, plan presentadas, cada còp trabalhan plan l'ocupacion de l'espaci, la valorizacion de las òbras, aquí tot l'espaci èra ocupat amb tot plen d'òbras que i passavas dedins, o a travèrs, entre de dessenhs, entre de sacas amb de logos de Mariscal, entre d'afichas de Mariscal, entre de revistas d'art de Mariscal, a travès de telas, a travès d'installacions sonòras e lumenosas. Enfin, a aquela mòstra, i pòs passar la jornada se vòs :)))

Acabi amb una citacion que se legís a un moment de la mòstra:

"La seva obra destil·la ingenuïtat, optimisme, frescor, bondat. No hi ha mai sang, ni sexe, ni gore. No hi apareixen monstres, ni dolents de pel·lícula. No hi ha res lleig ni ofensiu. tota la seva obra és apta per a menors, i en canvi és tan perversa..." Juli Capella, Arquitecte i teòric del disseny

La mòstra es fins a la fin del mes de genièr de 2011, a la Pedrera, passeig de gràcia a Barcelona, totas las infòs e un fum de fòtos per aquí!