Cinèma de comptador

Dimenge, me sacrifiquèri.

Non, legiguèri pas un libre de Robèrt Lafont.

Non, anèri pas a una conferéncia de Xavier Lamuela. 

Non, anèri pas a un concèrt de bohas en sosten a la calandreta del canton.

Non, me faguèri pas petar los budèls dins un metro clafit de mond per reclamar l'independéncia d'Occitània. 

Non, pugèri pas sus un autar per qu'un goró malonèst oferiguèsse mon pichon còs a un Dieu avid de verges innocentas.

Aquò foguèt pièger.

Anèri al Multiplèxe de Montpelhièr.

Pièger: anèri al Multiplèxe de Montpelhièr per veire Au bistro du coin

Trobères que Bienvenue chez les chtis èra missant e fasiá pas rire? E ben lo trobaràs genialissim en comparason amb Au bistro du coin. 

Rò la merdassa. Rò la causa que fa pas rire. Rò la causa que i a pas d'istòria e que, a la fin, te dises "aquò's una fin? Òsca, al mens es acabat." La sola qualitat del film es qu'es cortet, perque, de còps que i a, te fan de merdas longassas, aquí, es pas tròp longa. Rai, al cap d'un quart d'ora, n'as ja ton confle...

Mas perqué i anèri? 

E ben perque la segonda qualitat del film es qu'es estat doblat en occitan. Es estat doblat en breton, còrse, alsacian e creòl tanben, òsca, e tanben en chti, mas aquò nos en fotèm, èra per profiechar del business de la merdassa precitada. 

Alara, lo doblatge en occitan?! E ben es la sola causa bona del film!

Francament, es estrambordant de veire un film en occitan al cinèma : visca la normalitat!!!E òsca als doblaires, òsca als reviraires e mercés al mond que n'an agut l'idèa!

E, fasètz virar l'info : a totes los conasses que vos segatz, per blògs, fòrums o sits de tota mena, sus vòstre gascon, vostre prouvènçau, vouste biarnés voulountari e que disètz que lo lengadocian vòl colonizar, tuar, anequelir, far desaparéisser vòstre parlar de vòstre vilatge / canton / país, anatz veire lo film. Lo lemosin e lo gascon i enfifran pregondament lo lengadocian.

E sabètz qué? Quin coquinàs aqueste lengadocian! Aquò li agrada! 

Nòva de darrièra minuta: Me dison dins l'aurelheta que lo gropuscul "Lemosin al poder" faguèt una ataca aeriana partida del platèu de Milobassà a còps de pomas radioactivas per que son dialècte siaguèsse subrerepresentat. Per afinitat subvencionala a la region, ataquèt pas lo gascon e  mai li daissèt un pauc de plaça. Lo lengadocian, biaissut e fòrt de sa supremacia costumièra, sauvèt l'onor. Lou prouvençau, paure d'eu, en mai d'èsser tricastinizat, se prenguèt  una poma dins l'uèlh. 

Los autres dialèctes? 

Quins autres dialèctes???