divendres, 15 de juliol de 2011

Las espardelhas

L'autre jorn qu'èri a far las crompas a Intermercat, tombèri sus d'espardelhas. "Ten, d'espardelhas!".


Las primièras que veguèri èran als pès del Papet Colom.
De sabatas de papet. Blavas, poscosas e traucadas al det gròs. 
Dins mos sovenirs, a pas res mai als pès, estiu coma ivèrn.



E l'autre jorn, te veguèri un polit mascle en pantacort, lo botelh musclat e pelut. 
E t'aviá d'espardelhas als pès.
E trobèri aquò terriblament sexy. 


E l'autre jorn, te veguèri un jove qu'aviá d'espardelhas en plaças de las tòngs Quiksilver e aquò me faguèt sorire. 

Te dintrèri dins un grand questionament metafisic sus la plaça de l'espardelha dins la societat occitana d'uèi : es-ti una cauçadura identitària? Es-ti una grola del passat? E las femnas, ne pòdon cargar d'espardelhas? Perque las cagòlas cargan pas d'espardelhas en plaça d'aquelas balarinas laidas, pas confortablas que t'embocanan a 50 mètras a la ronda. A si, la balarina embocana! Question als mascles: trobatz aquò sexy las balarinas? Vos fa pas desquilhar, la pudor de la cagòla que se descauça? 


Vòstras responsas al sondatge sus las espardelhas :






aquò's la cauçadura occitana de l'estiu!
  3 (33%)
n'ai de totas las colors
  1 (11%)
aquò's l'accessòri sexy del mascle pelut
  1 (11%)
son d'un autre sègle
  0 (0%)
n'ai totjorn un parelh als pès
  0 (0%)
aquò's la savata del papet que jòga a la petanca sus la plaça del vilatge
  1 (11%)
remplaçaràn las balarinas de las cagòlas
  0 (0%)
qué?
  3 (33%)

 

Aqueste estiu, vau de las tòngs a mas sabatas laidas o a las que pudisson
Dau còp, l'autre jorn, a Intermercat, quand te veguèri las espardelhas a 5,90€, e ben me'n crompèri un parelh. 
Rai, per ara, las ai pas gaire cargadas que sabi pas quora o amb qué las cargar, puèi me son un pauc pichonas. Vai-te'n, tu, ensajar de cauçaduras entre lo carreton e las bóstias de sardas a l'òli.

Mas quand las vesi rabalar dins ma cambra, e ben soi ufanosa. Ai d'espardelhas. Aver d'espardelhas es un pauc coma aver un pegasolet macarel al cuol de l'auto.  "ieu tanben ne soi". Ara, fau coma los motards, quand vesi quauqu'un qu'a d'espardelhas e ben lo saludi.

Espardelhats del mond entièr, uniscam-nos !



3 comentaris:

Anònim ha dit...

Las espardelhas que son per tots.
A sheis euros,que deven vénguer de Bangladesh damb lo sagèth « Fabrication France »[emission suu Fenestron, i a guaire], hargadas damb lo trabalh de drollets e drolletas hèra « under age », es a díser que n'an pas sonque tretze o quatorze ans.
Hèitas en çò nòste que còstan mei de dotze euros…

Que van a tots, òmes e hemnas, joens e vielhs…

Anònim ha dit...

Las espardelhas que pòden embocanar tanben sustot s'as pres la ploja un còp e que las as deishadas secar, normau ; mès ne't disi pas quand las tonras hicar e que, après aver caminat un chic, las tiras…

De tota faiçon, las espardelhas que son un « must » ende jo los dos o tres mes d'estiu ; que m'agrada mei que los pènuds…

Anònim ha dit...

« Ara, fau coma los motards, quand vesi quauqu'un qu'a d'espardelhas e ben lo saludi. »


E lèvas la cama ?