dijous, 24 de maig del 2012

Enriqueta, mas cu es Enriqueta?

Coneissètz lo jornal La Marselhesa?
E ben cada dijòus i a una pagina en occitan que se ditz Mesclum
E cada dijòus dins la pagina Mesclum, i a la rubrica "provèrbi".
E cada setmana lo reprovèrbi es "comunicat per Enriqueta Gibelin, de Niça".
Lo primièr còp que legiguèri la rubrica Mesclum, èra en 1998, lo reprovèrbi èra ja a l'epòca "comunicat per Enriqueta Gibelin, de Niça".
Fa mai de quinze ans que i a una vièlha que cada setmana "comunica" un provèrbi per aver son pichòt encadrat dins Mesclum.
Mas es benlèu pas una vièlha. 
Benlèu Enriqueta Gibelin es un nom de còdi coma Eric Dampierre e i a un molon d'Enriquetas Gibelins que mandan caduna son torn un reprovèrbi.
Benlèu que l'Enriqueta la collectèron fa vint ans, qu'èra una vielhòta que coneissiá de reprovèrbis a bodre e que registrèron totes los reprovèrbis e benlèu qu'es mòrta e que ara flipan perque lor demòra pas que quatre reprovèrbis inediches e que se càmbia la provenéncia e que nos marcan "comunicat per Andrieu de Gavaudan, de Barbasta", los legeires ne poirián petar, òm cambia pas vint e sièis ans de reprovèrbis comunicats per Enriqueta Gibelin de Niça coma aquò sens far un comunicat per anonciar que los provèrbis seràn pas mai comunicats per l'Enriqueta, òu.
Benlèu Enriqueta es una femna qu'existís vertadièrament e que te pond un provèrbi cada setmana coma la Pitia de Dèlfas sas senténcias incomprensiblas. 
Benlèu Enriqueta a un email o un compte Facebook. Enriqueta, se legisses aquò, I want to meet you, you are my idòla, i want to take an erootic fòto of your feet with my feet. 


 (o foot, ai pas jamai sachut de qu'èra lo singular e de qu'èra lo plural)

6 comentaris:

  1. Quequejaire25/5/12 10:31

    E, qui sap, aquera Enriqueta qu'aurà com dusau prenom "Margarida", o qu'aima de's béver a Margaritas, o ...

    ResponElimina
  2. Tot probable se sona "Henriette"... Seriá un escais-nom, se diriá "Riqueta". Lo meu gafet se sona Dan-Enric, lo soni Riquet o Riqueton per lo far biscar...

    Tè ! una paraula que lo meu paure pepè me disiá sovent quand èri pichon : "Tu, ès coma la lèbre : perdes la memòria en corrent !"

    NB : one foot, two feet...

    ResponElimina
  3. enriqueta? Es glaudi barsotti! Pas lo cantaire...

    ResponElimina
  4. Adieu
    Vòli pas faire mon interessanta, mai sabi cu es Enriqueta Gibelin. E la croniqueta que parles es en fach una bèla istòria d'amistat e de fidelitat.
    Enriqueta èra la frema de Jòrgi Gibelin, un de mon vilatge, La Palud dins lei Aups Bassas, un òme tras que bòn e cultivat qu'es pas de crèire. Jòrgi morriguèt fa un brave temps, pas gaire vièlh, me soveni manca pus s'arribèt fins a la retirada. Sa vèusa, Enriqueta donèt a Glaudi Barsotti de recuelhs de provèrbis qu'avián collectats ela e lo Jòrgi. Fa d'annada que l'Enriqueta a despareigut dau monde conscient, un Alzheimer l'a escafada... Mai lo Glaudi contunha cada setmana de gardar son sovenir, d'ela que n'a pus ges. Me pertòca fòrça que son de monde qu'ai fòrça aimat, son una part de mon enfància, de mon país….
    Vodriáu pas rompre l’ambient, mai me semblava necessari de lo contar .
    Adieu

    Magalí Bizot-Dargenttsiduna
    P.S. La seccion IEO dau 06 se sòna Jòrgi Gibelin, que faguèt sa vida d’ensenhaire e de militant a Grassa.

    ResponElimina
  5. Veses, Mèla, s'es de questions existencialas o de mistèris universals de resòlve, basta de ne parlar dins ton blòg... E òp, la responsa t'arriba sul còp !

    La classa, disi ieu.

    ResponElimina
  6. Magalí: gramaci per ton testimoniatge. Ai enfin la responsa a la question que me pausavi dempuèi tant d'annadas. Es encara mai esmovent de saber que la rubrica del jornal es sa memòria perduda...
    Per aquò e mai la rèsta, big up a Glaudi Barsotti!!!

    ResponElimina

Mercé :)