L'estan l'estan l'estanquet...

Dijòus, anèri veire l'Estanquet al teatre la Vista. 

Se siás un legeire fenhant o preissat e que vòs pas legir la seguida del pòst, te fau lo resumit: Vai-z-i, te farà de ben, mas passa pel pissador abans de t'assetar dins la sala, riscariás de banhar ton estring de la forra de rire qu'auràs.

La seguida es pel legeire mens fenhant o mens preissat.

Coma o disiá un filosòf creòl, lo teatre, es bon per lo moral. L'estanquet es de teatre. L'estanquet es bon per lo moral. 

Fasiá moment qu'èri pas anada al teatre, e vertat es, l'espectacle viu, aquò te manda un buf que te requinquilha dins ta morositat ivernala. 

L'Estanquet, aquò's cinc istòrias diferentas, cinc scènas ont se parla de sèxe. D'istòrias d'adultèris, de còrnas, d'istòrias de cuol a te far petar de rire. Rises de la debuta a la fin e de l'ora e mièja que dura l'espectacle, te fas pas cagar una minuta e aquò's lo luxe ultim.

Ja, t'assetas que lo decòr te met de bona umor: un estanquet de fusta sul costat de l'empont e al mitan de l'empont, pas res o una taula que ven cambiar l'ambient. M'agradèt fòrça tota la creacion musicala: tant la musica que sortís de las maquinas coma las prestacions vocalas dels actors. Ò 'fant, los actors! Las istòrias te fan rire, rai, mas la mesa en scèna e lo jòc dels actors te fan la diferéncia. Te botan una energia aquí dedins, ne prenes plen lo morre, te prenon a tu e te remandan un sai pas qué que t'embriaga. 

E aquí, òsca òsca òsca òsca a l'Isabèla François qu'es tot simpletament perfiècha, e que se merita un Cesar, un Oscar e mai un Ben. Dins una de las scènas, fa un numèro de clown que i es genialissima. Tanben te jòga la sexi de la pèça e aquò, o fa tras que plan. Òsca a ela e mercés per tota aquela energia. Puèi, o cal plan dire t'a un cuol e un parelh de popas a te far venir lesbiana.

Fins a dimenge a La Vista puèi de susvelhar per la virada all around Occitània. I pòs anar amb ta femna, ton marit, ton amant, ta mestressa, tos parents,ta dròlla que met de mocadors dins son sosten, ton dròlle que se sèga dins la cambra tot lo sant clame dau jorn o ta tanta Nina. La pèça es en occitan de cap a cima amb los jos titols en francés. E tot lo mond se regala e ritz. Qué demandar de mai?

- lo vejaire de Manon

Aristofanada, las femnas al poder!

Tòrni del teatre La Vista que i ai vist Aristofanada la darrièra creacion de La Rampe.
E ben me soi regalada.

- Una pèça TOTA en lenga d'òc e de la bona, mossur, que lo tèxt foguèt escrich per Mossur Marcèu Esquieu d'aprèp l'òbra d'Aristophane - 9 comedians, ò putan que fa de ben de veire tant de mond sus scèna, tant de mond a l'encòp, e totes de bramar o cantar en occitan. N'aviái mon confle de veire de pèças de teatre a pichòt mejan amb dos comedians e mièg, enfin una pèça que se dona los mejans... - Teresa Canet jòga dedins, ò putan la Teresa Canet ne soi fan, (a pas pro de tèxtes a mon vejaire, mas mila dieus, que dança plan la borrèia!).

- una mesa en scèna de Claudi Alranc. Claude Alranq, se merita una estatua lo tip, per tota son òbra, per tot son trabalh, per tot çò que ditz, ieu soi d'acòrdi a 100% quand parla. Aqueste tip es un gèni, e pas degun li ditz. Ai l'impression que los teatroses lo coneisson pas, que parla patois, qu'es pas gaire reconegut quitament dins lo mitan intellectual occitanista, enfin, es l'impression qu'ai, e aimariái de m'enganar. Claude Alranq es genial, las darrièras pèças vistas mesas enscèna per el: Le Dit d'Alleuze, L'Armassièr, String Security e ara Aristofanada, e a cada còp, sortissi encantada, que i tròbi d'umor, de baugum e una soscadissa sul país.



Pels clapassièrs e vesins, i podètz anar tota la setmana que ven, alara profechatz-ne, val lo còp!
E per un còp qu'avèm una pèça en lenga d'òc, la cal pas daissar escapar!

Pels autres, esperi que passarà en cò vòstre ;)
Ba, se deuriá veire a Estivada e al Festenal Occitània de Tolosa.

Es tota en occitan e jostitolada en francés, seriá una bona idèa de los faire en català los jostítols! qué ne pensatz los catalans? Te, me'n vau lor dire al teatre de la Rampe!


FEMNAS AL PODER!
.