La talvera a Limós

Dissabte, èri a Limós-vila-del-carnaval-e-de-la-blanqueta per me regalar a Total Festum, veguèri un film plan interessant sus la bodega que ne vos tornarai parlar dins los jorns que venon, escotèri mos collègas bodegaires que los aimi fòrça, sautèri amb la Fanfara das Golamàs e escotèri la Talvera. Tot se deviá far defòra mas la pluèja audenca nos faguèt dintrar. Daumatge, perque La Talvera, aquò m'agrada mai sus un empont bèl :) Coma lo grop coneis mon nom e per las danças dison "agachatz, Melania o vos mòstra", lo mond se pensan que fau partida del grop e m'arriba sovent que de mond me diguèsson " mas, tu, te coneissi, siás de la Talvera!".Aqueste còp, a pas mancat, soi segura que totes los limosencs se pensan que fau partida del grop... en mai d'aquò, lor pòrti las cervesas... (o sabi soi la femna i-dea-la)

Doas videonetas de la Talvera que lo Dieu Loddo i jòga de quicòm mai que non pas de diableton o de craba...

La primièra, i jòga de boha. Traïson! Me li cal dire quand meme que la boha es una cornamusa de tapeta, benlèu o sap pas. Mas cossí se pòt passar de la craba/bodega a a aquela pecòla de cabra??? (veni de perdre l'integralitat de mon lectorat bohaire me sembla). Enfin, los bohaires se pòdon consolar, i a pièger que la boha coma cornamusa de tapeta, i a lo bòt aranés qu'a pas de bonda solament. :D (uèi, ai decidit de me far d'amics).
Anem, la musica:


La segonda video, lo Dieu Loddo jòga de guitarrona sus la cançon "Lo meu País" qu'es una cançon plan plan polida que la podètz escotar sul disc Bramadís (de crompar, of course). Me dison dins l'aurelheta qu'aquesta guitarrona a un nom e que se ditz un ukulele.



E ben ieu soi contenta, quand vesi un grop en concèrt pel 50en còp, d'aver de suspresas a cada còp :)