dissabte, 5 de setembre de 2015

La vidèo de Rémi Gaillard

A que fa de ben la darrièra vidèo de Rémi Gaillard !
Se l'avètz pas vista, aquí l'avètz :



Soi pas d'acòrdi amb l'argument, sus la supression de las regions, eça. Mas la vidèo m'esmòu.
Rémi Gaillard a fach lo torn de Lengadòc-Rosselhon e a capitat a cada còp de far dançar de mond. E ne sortís una vidèo plena de vida, d'energia e de bonur ont vesèm de mond que sautan, dançan e bracejan just pel plaser de far los colhons davant un païsatge. Totes participan a un projècte individual, lo projècte creatiu de Rémi Gaillard, e a un projècte collectiu, aquesta vidèo seriá pas estada possibla sens la participacion de desenats de personas volontàrias e los internautas son a la far seuna.

La musica, la coneissiái, es la dels collègas de Goulamas'K, e avèm una vidèo partatjada mai de 10 000 còps en mens dos jorns amb una musica e de paraulas en occitan, s'es pas de socializacion aquò, me fau capelan.

Ieu me'n lassi pas d'aquesta vidèo, me fa de ben al moral, e , coma eles, ai enveja de sautar pertot en rire.

Ai enveja de granmercejar Remi Gaillard per aquò. Per nos far rire. Per nos donar de bona umor. Per mostrar aqueles païsatges. Per crear aquí e n'aver un resson internacional.

Es un tipe que me fa rire dempuèi la debuta, emai siaguèsse de còps que i a un umor un pauc de marrit gost per d'unes... Lo tipe traça son camin, seguís sa dralha, en demorar luènh dels mèdias, pièger, lor pissa al cuol. Soi convençuda tanben qu'es un tipe plen de sensibilitat, vos remandi per aquò a sa video Dog (que seriá daumatge de ne reténer que lo costat lebretaire!).
Rémi Gaillard, lo tipe que me suspren de vidèos en vidèos, que me fa rire, soscar, plorar. 
Soi fan.

1 comentari:

Lilian ha dit...

Adi' la Melania!

Quò fai un moment qu'segue ton sití, e sovent me fai ben riser...
Qu'es 'rai que z-es brava questa videò, en mai d'aquò me fai viar la musica delhs Goulamaska!
Ieu ne'n trobèt v-una que prisentava los païsatges de mon país d'Auvernhe, engaita-la...

https://www.youtube.com/watch?v=jLAo9heXWtE

Bona contunhacion a tu!