dissabte, 15 d’octubre de 2016

Concèrt de Moussu T a Narbona

Pròche de l'ostal, ai l'astre d'aver tot plen de sala d'espectacles : la sala ZingaZanga que i a una programacion que m'agrada pas brica, lo teatre de Besièrs que la programacion m'agrada mejan, la sala de la MJC, la Cigalièra que m'agrada fòrça sa programacion. Pasmens, es a Narbona qu'anèri veire Moussu T perque totas aquelas salas precitadas an una programacion puslèu... pas originala. 

Anèri al DB una sala pichona pichona pròche de la 2nda sortida de l'autorota de Narbona (rota de Perpinhan), ont i a pas de cadièras, mas de cadièras, quand vas veire Moussu T e lei jovents, te'n cagas.
Lo darrièr còp que lo vegèri Moussu T, aquò èra sus la plaça de la Magdalena a Besièrs, per Fèsta d'Òc. Aquò èra abans l'arribada de l'autre conàs de Menard.
M'èri regalada del trio banjo-MoussuT-batariá, tot lo mond assetats, tranquillon Milon. E encara abans, l'aviái vist a l'Estivada a Rodés, èra a la tota debuta del grop me sembla, que lo tub èra "lo gabian" e qu'aviá sus l'empont una pelucha laida de gabian.


MÈFI, passada aquesta linha, SPÒILI , legiscatz pas se los volètz anar veire! 


E ben, aquò a completament cambiat! 
Ja, Tatou es pas mai assetat. A benlèu de morenas pecaire.
Lo banjo, l'an escampat, ara lo polit Blu es a la guitarra electrica. 
E ara, de percussionistas n'i a dos: un a la batariá e un autre a totas las autras percussions e a la charradissa. 
E a aquò, li apondètz un bassista.
E ben o vos disi, tot aquò, vos a musclat lo daquòs.
An montat lo tauç de testosterona sus l'empont e dins los decibèls.
E aquò m'agradèt !
M'agradèt d'autant mai que la sala èra pichoneta e l'empont bas, del còp aviam tot aquel mond plan pròche del public.
Lo public, parlem-ne ten del public ! Quina banda d'encloscats aqueles narboneses! Ja, èra pas nombrós nombrós lo public, çò que foguèt una decepcion per ieu. Son tan cons aqueles audencs que coneisson solament pas Moussu T. E quand cantèron una farandola e que la calguèt far la farandola, e ben, degun la faguèt pas, eriam 7, ai los noms e èran pas de Narbona!

Francament, me regalèri. 
Gardarai en sovenir per totjorn la represa punk de "Ma pichoneta, moi et mon bleu de Chine..."
I a una mena d'entracte, que al cap d'una ora, se'n van de l'empont puèi tòrnan, a la mòda vièlha: Blu al Banjo e Tatou assetat lo pè del micro entre los genolhs (erotisme caud caud a cada còp que lo vesi prene son pè - de micro). Fan aquò un bocin, e aprèp tòrnan a la guitarra electrica e a la version colhuda de la causa. 





En tot cas, los feliciti qu'an sachut far evoluir lo concèpte de Moussu T e lei Jovents tot en ne servant l'èime. Aquel espectacle es una capitada: i tròbas de tròces vièlhs relookats, una bona suspresa a cada còp, e te regalas de las cançons novèlas del darrièr disc, Navega!, que la FNAC me portèt dos jorns abans lo concèrt e ai pas encara causit quina cançon m'agrada mai.

Un pichon mot per dire que l'occitan es fòrça present pendent lo concèrt: e mai diriái que i a mai d'occitan que de francés dins las cançons... e en tot cas, entre las cançons, Moussu T parla occitan, pas solament, mas parla. Socializacion exemplara sens far de rasonaments. Total respècte.

A la fin dau concèrt, trista que siaguèsse acabat e trempa coma una sopa, crompèri un camisòt e d'afichas que lo visual m'agrada fòrça.




Messatge a Blu: mercés per tos dessenhs e vai-zi, fai-lo ton CD solet, BANJO! 





Concèrt que ven: Lopez-Chemirani al collòqui de la Flarep dissabte 22 e dimenge 22 Chronos 






3 comentaris:

Mirelha ha dit...

Òu, femna, sabes çò que te dison, los audencs ??? Figura-te que n'anam far una "overdose" de Moussu T que venguèt a Carcas aqueste estiu (monde fòl, èra a gratis), que tornan en decembre lo 10 a La Trivala (centre del monde !) e que vendràn a Concas d'Orbièl (al ras de Carcass) ja que los que los fan passar son plan coordonats ! Alara, anar a Narbona per rescontrar (non, dirai pas de noms !!!)...
Potons

Marge Manivette SALABRUM ha dit...

@mirelha : Cet été c'était Massilia et pas Moussu T; mais si pour toi "c'est pareil", effectivement on ne peut pas lutter avec les audois. Le 10 décembre c'est en soutien à la calandreta et à Conques c'est en février. 3 concerts en 5 mois, uuuuuuh ça fait trop beaucoup pour les narbonnais?!? Sans doute puisqu'ils ne viennent pas. Vivement qu'il n'y ait plus du tout de concert quand les salles fermeront faute de public.

Se que non, polit article Mel ! E òsca per menar la farandola

Mirelha ha dit...

Lo sens de l'umor es pas partejat per tot lo monde ! Souris, Marge, ça détend !