Trufa que trufaràs

Dissabte, amb los collègas, anèrem trufar. Non, pas "se trufar", akò esperam pas lo dissabte, o fasèm tota la setmana. Anèrem cercar de trufas, o de rabassas s'aimatz melhor (e pas de rabasses! ).

La trufa? N'aviái pas jamai tastat. Sabiái pas grand causa dessús levat que creis jos la tèrra e còsta un braç. LoTruficultor (ensajaretz de lo tornar plaçar dins la convèrsa) nos convidèt al mes de decembre mas coma sèm emmascats, cada còp que i voliam anar, èra pas possible, nèu, pluèja, o autre tèrratrèmol. E dissabte, i anèrem.

Al programa:

- viatge long amb decalatge orari fins a l'ostal del Truficultor

- caça a la mosca

- dinnar

- tantossada amb lo can.

Aprèp lo cafeton dau matin, anèrem pels euses per cercar la mosca. La mosca, es una bestiòta, una mosca ten, blanca, fina e longa qu'esquata jos l'euse a l'endrech ont i a una trufa.La tòca doncas es de veire ont es la mosca per saber ont i a la trufa. Very aisit. Mas sachent que 1- sias un pauc bòrni 2- la mosca es pichona 3- la mosca fa pas de bruch (levat quand peta, segur), cossí fas? 

E ben, te cal espinchar d'ont s'envòla la mosca. La tecnica? Agachatz:

(o sabi, es un pauc poirida ma video mas èra lo primièr jorn que fasiái servir l'aparelh que me portèt lo Paire Nadal lo factor, e ne profechi per granmercejar l'Amazòn que me'n faguèt present :) )

Lo tipe passa amb una branca, e quand la mosca s'envòla, li cal esperar que tòrne per veire ont èra exactament. Afar de paciéncia e de còp d'uèlh. Es polit lo gèst, revèrta lo del sorguièr, lo tipe que passeja son tròç de branca e los de la vila se pensan qu'es fadòli.

E la mosca, la veguèrem? E ben non! Quand o vos disi que sèm emmascats! Mai seriosament, la mòsca, akò li agrada pas gaire lo vent, lo freg e lo gèl. E dissabte, fasiá de vent e fasiá pas caud. Alara, la mosca, lo venguèt pas faire son uòu sus la trufa. Bon, pas grèu. Çò mai polit es de veire lo Truficultor que sembla alisar la tèrra :)

Dinnèrem un repais de trufas, requist! Vos metrai las fòtos dins la setmana :)

Puèi la tantossada, anèrem trufar amb lo chin.

E lo chin, n'aviam ausit parlar tot lo repais, que lo chin, es melhor qu'amb la mosca, veiretz mon chin coma es bon, patin cofin.

E aquí, apareguèt lo chin. Un trace de chin que l'acampariás pas de pel sòl, tot borrut, que sabes pas ont es lo davant del darrièr, que sabes pas s'avança o se recuola. Exageri? Agachatz:

Lo chin, quand dintra dins lo camp d'euses, corrís, pissa un còp o dos, nifla un pauc pertot. Puèi nifla mai seriosament, puèi... esperatz, aquí la video!

Lo chin tròba ont i a una trufa, cava, lo mèstre pren la plaça per trobar la trufa e lo chin espèra sa recompensa :))) E aquò a la cadena! lo chin es subreficaç!!! E s'engana pas! E mai ieu m'i metèri de tant que lo chin anava lèu. (oè , o sabi que se cal pas fisar a las aparéncias).

Quand començas de cavar ont lo chin a indicat, o sabes lèu se i aurà una trufa o pas: aquò sentís fòrt!!! La tèrra pren l'odor de la trufa. Mas ai pas comprés se dependiá de la talha de la trufa, ieu ne trobavi pas que de pequeletas de trufas, pas coma las de la fòto :) e la tèrra sentissiá fòrt!

D'aquela jornada trufaira, çò que m'agradèt mai, es pas la valor gastronomica o financièra d'aquela causa negra de la nolor fòrta, aquò, rai, me'n foti un pauc. Me regalèri de las explicas del Truficultor, aquò s'¡mprovisa pas! M'agradèt tanben lo costat caça al tresaur , cossí serà la trufa que trobarai? E la trobarai? Mas çò que m'agradèt mai es lo tocar. Tornatz agachar la video ont i a lo chin e l'òme. Agachatz coma cava la tèrra l'òme. O cal far tot suau per pas esquintar la trufa, i a una sensualitat bèla.

Tocar la tèrra, aquò fa de ben.

Granmercés al Truficultor que nos convidèt e nos faguèt passar una jornada que se'n remembrarem totes! Legirà pas aquò k'a pas l'adsl dins som camp d'euses, mas fa pas res :) E mercés al collèga qu'insistiguèt per m'embarcar aquí dedins :)