dissabte, 4 de setembre de 2010

Mela fai d'espòrt: de la civilizacion a la toristalha

Coma vòli far e aqueste còp acabar lo canal de Riquet, m'entraini.
Faguèri doncas, un autre canal, mai cortet, lo de Narbona a Pòrt la Novèla (lo primièr que se trufa, lo negui dins la Robina)
Per aquò far, ne faguèri de camin! Partiguèri (en bicicleta, of course) de l'ostal a 6h10 per prene lo trin a 6h30. 3 quarts d'ora mai tard, a Narbona, montèri sus la bicicleta, un còp sortida de la gara, prenguèri a drecha, passèri dabans la mediatèca e seguiguèri lo canal... fins a Pòrt la Novèla, es pas complicat.


 Cal far un pauc mèfi entre la gara e la mediatèca qu'es una rota d'una via que se transforma en 3 vias, es un pauc lo rambalh per las autòs, vos disi pas en bicicleta, subretot que cal anar sus la via d'esquèrra! Çò melhor es de davalar de la bicicleta e de prene tranquiletament lo passatge per pedons. Aprèp , i a una pista ciclabla long del canal , doncas pas de lagui del centre de narbona fins al Pòrt :)

La pista ciclabla es long del canal, aquò o aviatz compres. A drecha, paralela al canal, i a la via del tren. Podètz pensar qu'aquò deu destorbar e far de bruch mas non, seguir una via de tren es plan mai agradiu que non pas de seguir una rota... puèi as totjorn la securitat que lo tren te va pas dintrar dedins...
A drecha de via del tren, i a un estanh. E a ton esquèrra, i a un autre estanh :)

Pendent de quilomètres, siás donc entre dos estanhs, lo de Sijan e lo de Bages (me sembla, ne soi pas segura). S'as d'astre, pòdes veire  tot plen d'aucèls :) ieu veguèri un bernat pescaire gris (Ardea cinerea) que s'envolèt quand arribèri pròche d'el, akò me faguèt la jornada :) Passas al ras de l'iscla Santa Lúcia qu'es una reserva naturala (o quicòm aital), aquí, i a de causas de veire, mas ieu m'i arrestèri pas.

Vesètz sus las fòtos que fasiá pas gaire polit quand i  anèri. Lo cèl de mas fòtos sembla fotoshopat, mas o vos prometi, me sabi pas servir de fotoshòp ni de gimp, es lo cèl que i aviá akel jorn. E valiá mai! I a pas un pet d'ombra tot lo long de la via ciclabla, doncas i cal pas anar un jorn de calimàs ni un jorn de ventàs, que se i a una aureta, te mancarà pas.

Long de la via ciclabla, i a d'indicas de kilomètres, akò es bon pel moral! En tot, aquò fa 23km, que los sentisses pas passar! D'aquela via long del canal, se pòt anar a Gruissan e Gruissan plaja tanben. Arribas a Pòrt La Novèla, pòrt, luènh de la plaja.Oè, soi colha, preni los panèus en fòto, es  pas perque son polits, es perque soi contenta de los veire e me disi "wow, as ja fach "9km" e passi los 9km seguents a far de calcul mental carcular ma vitessa. Seriá mai aisit de saber far marchar mon comptador...

I anèri fins a la plaja, per far la fòto :), a 9h del matin, i aviá pas degun!
Per l'istorieta, en traversant lo vilatge, un tipe en veire ma bicicleta customizada diguèt "Aaaaaaa, vaquí la crotz nòstra" (sic!) :)
Per tornar, aviái la causida de tornar pel canal fins a la gara de narbona o de prene directament lo trin a Port la Novèla. Coma soi una fenhantassa, volguèri prene lo trin directament, que me sentissiái pas de far 23 km de mai.



Mas. Pensatz plan que i a un MAS dins l'istòria. Per evitar d'aver lo vent en contra, volguèri passar per de carrieronas per anar a la gara... e me perdèri. Anèri petar al super U, e  se sètz un pauc sociològs, sabètz que los superU son pas jamai a costat de las garas e son totjorn luènh de tot. Enfin, al cap d'un brieu, poguèri prene un TER qu'aviá pas de vagons bicicleta.

Tornèri a l'ostal al cap d'un trentenat de quilomètres a bicicleta, plan contenta, èra miègjorn :)

Vau far d'espòrt e tòrni per dinnar. D'aquí pas gaire, roncarai e beurai de cervesa en agachar lo balon a la tele.

3 comentaris:

André ha dit...

Esportiva… Fòtos polidas coma a cda còp
Se metes tròp de T quand vas a la pla(t)ja, n'auràs mai a beure un còp tornada a l'ostal

Mela ha dit...

Andrieu: Esportiva, non, mas me doni bona conciéncia :P
Mercés per l'error, l'ai corregida :)

manjacostel ha dit...

Me dona enveja de far d'espòrt.
Per dire.