dimarts, 8 de febrer del 2011

De l'òme que caminava dins la palun

L'an passat, un jorn de fin d'ivèrn-debuta de prima,  per mas paluns, te veguèri un tipe que caminava. "De qu'es aquel conàs dins la palun?". Ben òc, cal èsser con per caminar dins una palun: es fangós, quand es pas fangós es plen d'aiga, e quand es ni fangós ni plen d'aiga, i a de moissaus, sens parlar de la salicòrna seca que t'escarraunha las cambas. Doncas, ieu, quand vesi un tipe que camina dins la palun en agachant pel sòl, me disi que lo tipe deu pas virar redond. 
E aquí, coratjosa, li fau de ma votz de professora autoritària:
- Bonjorn Sénher (pas jamai mancar de respècte als calucs, primièra leiçon del manual de subrevida per l'infirmièr en espital psiquiatric).
- Bonjorn
- Qué fasètz per aquí? (jos entendut: nèci que siás!)
- E ben, agachi se i a d'uòus de moissaus.
- Vertat? e cossí fasètz? (jos entendut: te creses qu'arribi d'Agde per la plaja?)
- E ben s'aquò bolèga, es que i a d'uòus, e se bolèga pas, e ben es que n'i a pas.
- Mas son benlèu amagats entre las plantas. (segonda leiçon del manual precitat: seguir lo deliri del caluc per li mostrar son incoeréncia). Mas perqué fasètz aquò?
- Trabalhi a la Companhia Litorala Anti Moissaus.
Mèrda, es pas un caluc. E ben caliá començar per aquò, conàs.
 - E coma avèm tractat, ben vòli veire s'aquò a foncionat, e s'aquò a pas foncionat tornarem passar. 
E aquí, me tèni drecha, dintri lo ventre, ensenhi las popas, perque òm sap pas jamai, sus un malentendut poiriá foncionar, ai totjorn somiat de far l'amor dins las paluns entre fanga, salicòrna e moissaus.
- Son los avions que passan es aquò?
E lo tipe de m'explicar: 
- Òc, escampan lo produch, es un produch ecologic amb una bacteria dedins, la larva de moissau la manja e aquò la tuga de l'interior. Aital, vos faretz pas fissar! 
N'aprenèm de causas , è! (los saberuts, ne podètz explicar mai e melhor dins los comentaris!)

E ben figuratz-vos que l'autre jorn, lo veguèri l'avion qu'escampa lo produch! Es un avion de pas res del tot, que fa plan paur que passa al ras del sòl qu'as l'impression que se va espotir dins las canas. 
Coma èra lo primièr còp que lo vesiái e que pensi de longa a vosautres legeires tant aimats, ne vos faguèri una videoneta, amb la risca que l'avioneta me gisclèsse dessús son produch ecologic que tuga las larvas de moissaus e que sabèm pas quinas consequéncias auriá agudas sus la paura de ieu, ne sètz conscients de las riscas que preni per vosautres? È?
Bon, aquí l'avètz: 




Tu que siás jos una pluèja tolosana, limotjauda, paulina o parisenca, as las bolas?

9 comentaris:

  1. Coratjosa mas pas temerària pr'aquò… la videasta !

    ResponElimina
  2. Quequejaire8/2/11 10:40

    1. Òsca tà la video !

    2. Ploja ? A noste ? E saps quin s'apèra l'imne deus Paulins ? "Bèth cèu de Pau" ! Pro clar tà tu ?

    3. çò màger : fin finala, as bicat, o non ????????

    ResponElimina
  3. André: mas ieu i sabi metre de videos sul blòg!

    Quequejaire:
    1: mercés
    2: m'agrada l'ironia paulina
    3: te creses qu'un tipe que cèrca d'uòus de moissaus dins una palun amb de bòtas fins als colhons, akò m'excita????

    ResponElimina
  4. Lo ciau es tant blu coma chas te, p'ita. Pas de plueja a Limotges.

    ResponElimina
  5. Sherlock Hòlmes deu Peiroton9/2/11 13:40

    Lo tipe dab qui batalajètz dens la palús en bèth rentrar lo vrente e ensenhà'u las popas, a pas arren a véder dab lo praube malurós deu quau e'ns parlètz quauque temps a? Lo que quitè la palús en elicoptèr, sabetz?

    (Notatz qu'a Tolosa, i hè bèth temps quasi tostemps. I plau quasi jamés.)

    ResponElimina
  6. a z'aigas mortas es ço parier, dempuèi pichot vese de ragondins e d'avions dins la palun...

    ResponElimina
  7. geniau la video. as trabalhat lei brutatges qué?

    ResponElimina
  8. Quequejaire10/2/11 15:19

    Jo, çò qui vei, qu'ei que n'i a pas arrés de París tà't contradíser tà çò de la ploja.

    E mercés Melà, d'aver hèit vàder au bèth pregond de jo, aqueth sentiment de solidaritat dab monde de Tolosa e de Lemòtges, qui non sospieitavi quitament pas...

    Enfin, que disi aquò atau... mes totun ne conèishi pas nada canta, jo, qui s'aperèsse "Bèth cèu de Tolosa" o "Bèth cèu de Lemòtges"... enfin.. rai !

    ;)

    ResponElimina
  9. Ouais... as rason, menas una vida a la Lara Croft, paura de tu! A la distància qu'èra l'avion riscavas pas de far lo remake de "La Mort aux trousses".. Enfin.

    Me permetrai de contestar la vision idillica de KKJ pertocant lo temps bearnés dins la mesura qu'un bearnés ditz que "hè beth temps" quand i a una setmana de solelh per mes.

    "Lo sage e lo fòl pour les exilés"!

    ResponElimina

Mercé :)