dilluns, 14 de març de 2011

Carnaval de Limós - Farem de Carnaval la fèsta nacionala tres meses de temps

Un dissabte de la debuta de març, anèri far un torn a Limós, « capitala de la blanqueta e del Carnaval », per veire son Carnaval, lo mai long del mond.
I aviái rendètz-vos amb LaMissantaBèstia, una indigèna saberuda que me deviá explicar una molonada de causas e me convidar a dinnar a l'ostal de sa grand perque me cultivar, aquò m'agrada mas manjar, aquò m'agrada tanben.
Arribada sus la plaça de Limós a 10h30 lo matin. Pas gaire de monde...
Doas causas de saber abans de contunhar :
- Carnaval, aquò se fai sus la plaça de las arcadas de Limós que son nom es la plaça de la Republica e enluòc mai.
- I a tres sortidas per jorn e aquò se fai la dimenjada. La primièra sortida es de matin a 11h, una de tantòst a 5h e la darrièra lo ser a 10h.

Arribèri doncas per veire la primièra sortida.

Abans de contunhar, vos expliqui un pauc mai la teoria perque aquò's bravament complicat. Concentratz-vos, o tornarai pas dire.
Lo Carnaval de Limós dura quicòm coma tres meses (de la fin de genièr a  la debuta d'abrial). Marcha pas coma los autres, es una causa unica dins la galaxia. Cada dissabte e cada dimenge de la durada de Carnaval, una « banda » sortís (o doas, aquò depend) ; una banda, aquò's una còlha de personas... La banda sortís tres còps dins la jornada e cada sortida es diferenta e tot aquò es acompanhat per de musica jogada per de musicians vertadièrs.
La primièra sortida es lo matin ; son desguisats segon un tèma qu'an causit, fan una mesa en scèna sul tèma causit ; mèfi, es Carnaval, lo tèma serà risolièr, parodic, amb de sèxe e de politicament pas corrècte. Fan sa scèna puèi dançan  la Valsa, la Valsa es la primièra dança ; un còp la Valsa facha, fan lo torn de la Plaça. Lo torn de la plaça se fa pas de quin biais que siá : van d'un bar istoric de Limós a un autre cafè istoric de la plaça. En tot, i a cinc bars.

A 12h30, la banda beu (e dinna) dins son bar-ostal (cada banda es restacada a un bar) e lo mond del vilatge e los toristas van dinnar de son costat. Se passa pas res mai fins a 5h.
A 5h, es la segonda sortida. La banda del matin a cambiat de vestits ; la sortida de 5h es la sortida dels peiròts (« pierrots » en francés). Lo ritme es mai lent, mai solèmne e es de veire.
La darrièra sortida se fa de nuòch a 10h, mas vos pòdi pas gaire explicar que i anèri pas.

Vaquí per la teoria.

Ara, la practica:

A 11h, anèri cap a un canton de la plaça ont ausiguèri de bruch.
Se fasiá l'inauguracion d'un bordèl ; aquò èra lo tèma d'una de las bandas que sortissiá aquel jorn (soi pas nècia, i anèri un jorn que i aviá doas bandas, aital, aguèri lo doble d'espectacle!)


..la valsa...

e, aprèp la Valsa, comença lo torn de la plaça...

Abans de vos mostrar quauques fòtos... sembla que la dubertura d'un bordèl a Limós es una idèa que ne poiriá far d'uroses... que lo papet sembla plan interessat:

La banda los Bronzinaires aviá doncas causit lo tèma del bordèl... Aquí quauques desguisaments :


 çò escrich suls panèus: "Vite l'ouverture ou j'ai mon poireau qui va éclater... d'ailleurs c'est déjà fait", "Los vièlhs de la plaça, regardar sens tocar" e "J'entraine les vieux de Limoux pas pour marquer des buts mais pour aller aux putes".




Escrich sul panèu de Sarkòzi: "Casse toi pauv'con, t'as pas les moyens", 
Sarkòzi èra accompanhat de doas putas qu'avián un capèu marcat "las carlitas" :D

Las darrièras doas fòtos, se las ai mesas, es pas perque repàpii, es per vos mostrar la dança: las fecas. Ensagèri de prene en fòto los gèstes de fecas mas ai pas gaire capitat... En gròs, per dançar las fecas, cal chauchilhar d'un pè sus l'autre sus lo ritme de la musica en balancejant los braces.
Demostracion en video:

(aquela musica, la pòdi escotar pendent d'oradas)

La sortida del tantòst, son los Peiròts, e aquò's poliiiiiiiiiit.
Un parelh de videonetas per vos mostrar los Peiròts e las Fecas:

(aquela musica tanben la pòdi escotar pendent d'oradas!)


Los Peiròts an un accessòri, la carabena, qu'es un bocin de cana long decorat de papièr, aquò's l'accessòri de la dança mas es mai que mai l'accessòri de l'intriga. Agachatz la fòto coma lo Peiròt va amb la carabena tocar l'aurelha de quauqu'un aquò vòl dire "te coneissi, t'ai reconegut (uda)".
Un autre biais pel Peiròt de dire al mond que los a reconeguts es de los shampoinar de confettis:
Lo tipe mascarat va anar intrigar l'espectator: li dire que lo coneis, li dire de causas un pauc personalas, benlèu porcassièras... e l'espectator e ben deu reconéisser qual s'amaga jos la masqueta...

Aquò m'agraaaaaaaaaada.



Ongan, lo Carnaval de Limós s'acabarà lo Dimenge 10 d'abrial ;  i a las sortidas de 11h lo matin e 5h lo tantòst e la cremacion de Mossur Carnaval que ongan es el Quijote. Lo jutjament de Carnaval se fa tot en occitan e aquò sèra a partir 10h la nèit (m'adapti a l'occitan d'alai, som un cameleon linguistic). I serai, d'autant mai qu'es la Nèit de la Blanqueta! Volètz venir?




LaMissantaBèstia, sa maire, MamiJo, ieu e los confettis!

Totas aquelas causas, las sabiái pas abans d'i anar e, se las sabi, es mercés a La MissantaBèstia que prenguèt lo temps de m'o explicar tot. Doncas un brave mercés e un potonàs a LaMissantaBèstia, sa maire e MamiJo per l'acuèlh, lo repais, las explicas, la blanqueta e mai las causòtas pebradas.



Ara, metètz la musica e tornatz legir:)

E anatz veire las fòtos del Carnaval de Limós de Georges Souche!



 
Anóncia: 
Se cèrca òme pelut de Limós per far Carnaval tres meses per an. 






9 comentaris:

La Maire de la MissantaBèstia ha dit...

Le godilh ( mascat cossi que siá e subretot les òmes en femnas e las femnas en òmes) e les Peiròts de la banda se devan de " chiner " les espectators. Es a dire que les cal dire causas las mai saladas e las mai personalas possibles...
L'espectator deù pagar a beure al chinaire e li demandar d'entresenhas per l'endevinar si que non deù tornar pagar a beure ....
Es evidentament enebit de desmascar le chinaire per arrestar de pagar ! Le que desmasca qualqu'un es fòrrabandit de la plaça ! ! !
Per faire pagar, se cal mascar la votz ( ponchuda , aguda , tremolanta ...)
La " chine " se deù faire en occitan mas al temps d'ara ... aquò se pèrd ! ! Quin malastre ! !

Lola ha dit...

Sabi pas ont es Limos .. mas lo despartament es fòrça plan non ... =D

Tam ha dit...

adieu m'agrada ton article. vau ne parlar ai jovents. E te marcarem un pichot mot...

fabou.du84 ha dit...

Adieu, la coneises desempuèi longtemps la MissantaBèstia? o es una simple conneissènçia?? Gramaci

Morgane ha dit...

nos agradam aquesta blog perqué i a dei polits imatges. Lo blog es ben fach! Mai qu'es la "blanqueta"?

Océane ha dit...

Aquesta annada trabalham sus lo carnavau, aviam agachat lo blog. I a dei polidas foto mi agrada, lei aticlas son ben esrich.
Perqué traita tu lamissantebèstia d'indigèn?

Mela ha dit...

Fabou du 84 e Oceane: bonjorn e benvengudas sul blòg :)
La Missanta Bèstia la coneissi dempuèi quatre ans. "indigèna", aquò's pas una escòrna, es per dire qu'es originària de Limós.

Morgana: la blanqueta es una beguda, es un vin que pica, es lo Champagne occitan. E se fa a Limós!

Mercés a totas tres per vòstres comentaris e compliments :)))))

lo mèstre d'aurenja ha dit...

ara faudrà apregondir un pauc l'ortografia

Laura ha dit...

M'agrada ton article amé fÒrca indications sus lo carnavau de LimÒs. Contunha coma aquÒ :)