dilluns, 17 d’octubre del 2016

Escomesa novèla

Aprèp trenta-quatre pòsts escriches a la man sus mon quasernet a Nàpols puèi picats a l'ostal a la fin d'agost, me vòli escampar dins una aventura bloguesca novèla : lo Nanowrimo. Aquò's JP La Rapieta que ne parlèt sus un comentari, grandmercés l'òme! 

Lo NaNoWriMo, es un nom barbar per National Novel Writing Month, Nacional de sai pas qué, mas rai. La tòca, s'ai ben comprés, e ai benlèu pas tot comprés, es d'escriure del 1èr al 30 de novembre cada jorn per arribar a la fin a un roman de 50 000 mots. Avisa! Cal escriure cada jorn, cal pas anticipar e escriure abans lo jorn J. E ieu, fa moment que i soi pas mai dins una escritura jornalièra. Alara, zo, m'i escampi. E òc, farai coma Honoré de Balzac, Stephen King, Gustave Flaubert e Max Roqueta, escriurai aquí cada jorn !

Sabi pas encara s'escriurai lo matin, lo ser, la tantossada, a l'ora del dinnar, a las aubetas, aprèp sopar... serà tota una organizacion... Vos caldrà gaitar las oras de publicacion ;) 
Ai ja soscat a una idèa d'istòria. Per un còp, aquò parlarà pas de ieu, anam ensajar quicòm mai. Serà tanben diferent de mon bestseller, qu'es totjorn clavat a la pagina 22, pecaire. 

Aquí-la l'escomesa novèla ! 

Matieu, me seguisses? 
Legeires, nos seguiretz? Nos donaretz d'idèas dins los comentaris e ne fasèm una òbra collectiva? 

Rendètz-vos aquí lo 1èr de novembre a sai pas quina ora per començar lo NaNoWriMo! 





2 comentaris:

  1. Fa qualques annadas, m'èri mesa a escriure coma o dises, cada jorn davant l'ordenador e puèi un jorn, doblidèri... Benlèu i tornarai.
    Se vòls : es aquí : http://ostal.sirventes.pagesperso-orange.fr

    http://ostal.sirventes.pagesperso-orange.fr/Breviari1/breviari.htm
    http://ostal.sirventes.pagesperso-orange.fr/Breviari2/brev.htm
    Es sus l'ancian site de l'IEO d'Aude amb musica de Golamas !

    ResponElimina
  2. Adiu e benvengudaaaaaaaaaaaaaa chas NaNoWriMo


    De segur que fau, fau e fau escriure.
    Per mon peron, ai fach las grandas linhas d'un planh d'una istòria, nonmàs las grandas linhas, apres, la gens que vai contar la vita, faran çò qu'ilhs volen o poden ; emai serai darrier lur cuòu, quante l'istòria comanda, 'la comanda.

    La prumièra annada (2014) avia ajustat lu nombre de mòt ad un mile per jorn, perque eriá pas segur de tener, l'an passat i aguet los atentat, mas ujan...
    Per los, o b'etot las, curios-as, tise aquí :
    https://rapieta.wordpress.com/category/poema-haiku-haibun-eisagonala/nanowrimo/


    JPBertrand

    ResponElimina

Mercé :)