Lectura ivernenca : Lo Blòc

Lectura ivernenca e plan freja... Le Bloc de Jérôme Leroy es mon amic virtual que me'n faguèt present en me dire "es tan plan fach que fa paur". Ben òc, aviá rason lo tipe. Le Bloc, m'agradèron son escritura e son estructura : un capítol es escrich a la primièra persona e l'autre a la segonda. L'alternància de cada capítol es l'alternància de las istòrias dels dos protagonistas : son istòria personala per arribar ont ne son dins lo partit Lo Blòc Patriotic, partit d'extrèma drecha. Tot se passa la nuèch que lo Blòc es a negociar sa plaça dins lo govèrn novèl qu'es a se bastir. Mai d'un nivèl de lectura per aquel libre, primièr, lo perqué me'n faguèt present lo collèga : la lectura istorica, una descripcion de la pujada de l'extrèma drecha en trenta ans. Es una ficcion, aquò rai, mas totes i reconeisseràn lo Front Nacional francés (non, pas de ligam cap a son sit internet!).

Puèi, quicòm mai que m'agradèt : lo costat "roman d'aprendissatge" ; avèm lo percors dels dos protagonistas, de sa casuda dins lo faissisme, de sa pujada dins l'estructura del partit e de son futur immediat. L'alternància de capítols qu'altèrna los personatges e qu'altèrna la narracion es facha per aquò. 

Bon, avètz comprés, en gròs, avèm l'istòria d'un FN vist dempuèi lo punt de vi(st)(d)a de dos òmes: lo cap de securitat e lo marit de la filha del fondator del partir, futur secretari d'estat, levat que, ò ficcion!, lo partit pòt negociar de ministèris (infèrn e damnacion!). Es plan escrich : lo mond coma cal d'esquèrra i veiràn una descripcion de la gangrena de la drecha extrèma e lo passaràn a totes sos amics. Mas ieu, çò que me geina aprèp la lectura del libre, es que me disi que lo neonazi de basa lo pòt legir aquel libre en se segant de tant que s'i pòt regalar. Dins l'aurelheta, me dison que lo neonazi de basa sap pas legir. I a pas una critica "oooo, los missants!", es lo legeire qu'interpretarà segon son intelligéncia, son sens critic e sas conviccions. A una epòca que la drecha vira cap a son extrèma, que lo centre vira a drecha e que l'esquèrra arriba al centre, a una epòca que lo racisme es a se normalizar e ont una persona sus cinc vòta faissista, la causida de l'autor me pausa question.

Pasmens, i a quicòm que me rassegura :

-  l'autor es comunista (o ai legit sabi pas mai ont)

- lo libre es publicat en cò de Gallimard dins la colleccion Seria Negra. Sabètz, los romans "negres" son aqueles romans òrres que te contan d'istòrias afrosas que a cada còp te dises, benlèu un pauc innocenta, "urosament, aquò arribarà pas jamai!" 

De legir :

- la critica sul blòg de Yan "encore du noir"

- una entrevista de l'autor dins lo NouvelObs e dins Marianne

- lo blòg de Jérôme Leroy 

D'escotar: entrevista sus France Info