dilluns, 17 de desembre del 2012

Porto (1) : as pontes

Porto, perqué i anèri?
Voliái anar a Portugal e i a pas que dos aeropòrts internacionals : Lisboa e Porto. Auriái trobat mai pichon que Porto, i seriái anada. Lisboa, per las fòtos que vegèri, es magnifica, mas fugissi las capitalas, me disi que lo mond i son mens aimables...
Causiguèri Porto sens pas res saber.
Crompèri la guida blava "Ulysse" abans de partir e la legiguèri dins l'avion de retorn.
Aviái l'adreiça de l'ostalariá, trobada sus internet, causida per son prètz tras que bas e sa centralitat. Aprèp, "veiriái plan".
Porto m'agradèt fòrça! Passèri una setmana a caminar per la vila. La jòia de conéisser las carrièras e de reconéisser de caras ja vistas.
Dins las causas que m'agradèron de la ciutat, es sa geografia : Porto monta, davala, de longa. Es pas una ciutat pels bicicletaires! Siás totjorn a montar o a davalar e tot en bas, as lo riu, o Douro, per ont davalavan las barricas del vin famós, puèi as la mar, enfin l'ocean.
M'agradan las ciutats que i passa d'aiga: Porto, Girona, Besièrs, Tolosa e Seta plan segur. Es çò que manca a Barcelona.
E se i a aiga, i a ponts. E a Porto coma la vila es en naut, e que lo riu es ample, los ponts son impressionants e son una atraccion toristica! En plaça del trenòt ridicul per toristas, as de batèus que te fan passejar sus Douro per te far veire los ponts... Aquò s'apèla una mini-crosièra pontificala.
A la debuta, la volguèri pas far la mini-crosièra. Mas regreti pas d'i èsser anada! Dempuèi lo batèu, al mitan de Douro, as una perspectiva completament diferenta de la ciutat, de las ribas e dels ponts!

Zo, quauques fòtos: 















3 comentaris:

  1. N'i a un, de pont, qu'es d'Eifel. Mas as desoblidat qu'es dangeros, l'aiga, quora sortisses de las cavas de porto que son lo long del Douro... ;-) E que monta-davala dins Porto quora tornas de las meteissas cavas, es pas aisit tanpauc !
    Aimi força Lisboa tanben, l'ambient es diferen, lo parlar mai doç. T'i caldrà anar.

    ResponElimina
  2. un grand viatge que faguère per lei vacanças de Totsants. Me siau regalat. Lei ponts son belàs e la vila a una arma. Arma que manca a Lisbona me sembla. De remarcar: lo gentum dei gents enlai e lo biais de parlar doas o tres lengas. Te mandarai mei fotos. Qu'ère sota la pluèia!

    ResponElimina
  3. E ben, pauròta, mon sovenir de Oporto es plan diferent del teu ! Una ostalariá de m..., un portièr idem, una banca que caliá far una coa de 50 mètres per aver un pauc de moneda, de monde que volián pas comprene ni lo francés, ni lo castelhan (e tanben mon magre portugués)... Ne passi ! Mas i aviá O Douro, urosament e tanben las cavas (e un taxi per tprnar !).
    Per çò qu'es de Lisboa... Seriá tròp long a contar : foguèt une meravilha !

    ResponElimina

Mercé :)