Ièr anèri veire Lo còdi de Da Vinci.
Legiguèri lo libre, lo comencèri de matin dins mon lièch e l'acabèri la nuèch dins mon lièch...
Voliái doncas veire lo film.
L'istòria, la coneissiái...
Avètz vist lo que fa Silas coma fa encara mai paur que dins lo libre? A, me cal precisar, que quand legissi, m'imagini fòrça plan e plan precisament los mostres, los marrits, los decòrs, etc. D'aver pas la television, akò daissa mon imaginari plan intact... Doncas Silas ja me fasiá paur dins lo libre. Ben dins lo film encara mai.
Bon, me cal avoar quand òm lo vei nus a se flagelar e ben... um, Um. Cambiem de subjecte.
Doncas l'istòria la coneissiái. Sabiái pas que Silas aviá una Megana e un silici en inox, mas es pas grèu.
Sabètz quand son totes dins lo castèl de l'anglés fadòli?
E que Silas es aquí a espiar?
Ieu o sabiái ja çò qu'anava arribar.
E ben quand Silas li sautèt dessús al Forrest Gump,
ieu,
t'aguèri paur,
te sautèri sul fautuèlh,
bramèri un "aaaaaaaaaaaaaa"
del saut, te botèri un còp a l'òme que m'acompanhava, que del còp sautèt e faguèt paur a las filhas d'a costat.
del saut, fotèri un còp de pè al sèti de dabans que faguèt subresautar tota la rengueta.
del bram, tot lo mond s'espantèt.
Vakí , es fach, donèri la petòcha a la sala tota d'un multiplex...
L'òme que m'acompanhava me tractèt de totes los noms que li passavan pel cap que resumirem aital: "Colhassa, perqué as paur, se legiguères lo libre?"
E aprèp totas aquelas emocions, me venguèt un rire que podiái pas téner.... E de rire, de rire, pendent un quart d'ora.
Es dificil de rire quand lo film es pas brica una comedia...
Òc, la caluga del fons de la sala que brama quand fa pas paur e ritz quand fa pas rire, akí l'avètz :)
Cap comentari:
Publica un comentari a l'entrada
Mercé :)