de mon cuol e autras pensadas sus l'istòria marselhesa....

Primièr, cal legir aquò.

Pòrta d'Ais: Aver un cuol coma la pòrta d'Ais
Se ditz d'una femna (totjorn d'una femna è, pas jamai d'un òme) qu'a un tafanari que pren de plaça...

Expression qu'emplegava regularament mon paure paire.

Alara, un legeire lemosin se pausa de questions.
Cal saber que lo lemosin es finòt. Que nosautres, monde de mar e de garrigas, o sabèm pas: lo Lemosin es finòt e a d'umor. òc-ben, vos o juri.
Doncas nòstre lector lemosin que li direm Pasha demanda: ont es la pòrta d'Ais??

Alara, Pasha, t'o vau dire.
Mon paire es cevenòl.
Ieu, entre montpelhierenca e setòria, mas los pès dins l'aiga, lo cap dins las vinhas, e lo cuol dins lo shòrt de fotbòl.
E la pòrta d'Ais es a Marselha. (res de veire, sabi plan, mas fau çò que vòli es mon blòg)

Es una pòrta bèla de mai de 17m de naut e de larg.
D'aquí la comparason.

Per ne saber mai sus la pòrta d'Ais, es aquí o aquí


Pasha, abans qu'o demandas, o disi.
De que ven faire la pòrta d'Ais coma comparatiu dins una familha que demòra a 200qm de Marselha?? Ben mon paire visquèt a Marselha d'unas annadas e s'adaptèt a l'environa...

Pasmens sai pas s'aquesta expression es marselhesa o provençala o sonque la frucha de la poesia paternala....





Veni de verificar dins lo Tresor dou Felibrige , a l'article "Ais": la porto d'Ais: nom d'une porte de Marseille. Ditz pas res mai lo Fredo, aviá pas rescontrat mon paire...