Çò que m'agrada - e m'alassa e m'estressa - del mestièr d'ensenhaire, es la remesa en question.
Siás de longa a te demandar de qué va pas, de qué te cal cambiar, ont poiriás melhorar, de qu'as fach qu'èra pas genial e que te cal cambiar per lo còp seguent.
Bon, es pas l'autoflagelacion permanenta tanpauc, i a de còps que i a que te dises "puta, que soi bona!".
Es l'interés del mestièr. E aquela escomesa permanenta m'agrada!
Mas i a de jorns qu'ensajas, que soscas e que capitas pas.
Uèi, ai fotut un escolan defòra.
Fotre un escolan defòra, es abandonar. (L'abandonar?)
Es reconéisser, aceptar e se resignar al fach que siás pas estada capabla de lo gardar, de capitar que s'interèsse, de capitar qu'arrèste de te respondre, de capitar de lo far dintrar dins ton jòc o de lo prene dins ta còla.
Ta simpatia, ton umor, ton jòc de l'autoritat professorala, ta fisança que crida son intelligéncia an totes fracassat.
Ai sortit lo carton roge.
Emai los collègas diguèsson qu'es parièr dins totes los corses, fòrabandir un escolan, aquò m'agrada pas.
Me diretz que lo carton roge se sortís pel mond qu'an passada l'òsca. Rai.
Mas quicòm me ditz que mon trabalh, ma tòca, mon escomesa a ieu es de mostrar ont es l'òsca e d'ajudar l'escolan a la passar pas.
Se la passa l'òsca, aquò vòl dire qu'ai perdut?
Aquò val pas res mas la falhòta te ditz que sès ma professora preferida preferida del mond entier !
ResponEliminaO siéu d'accord emé la falhòta! Siés genialo ma pichoto melanio, as pas de resoun de te faire de laguis ;) de cop n'i a que soun pas brave ba, es coum'acò, deforo, pount. Nautri t'amen, pount.
ResponEliminaFaràs pas jamai beure un ase que vòl pas beure, se ditz en francés.Es tota la dificultat del mestièr d'ensenhaire, encara mai d'aquesta passa, quand cadun a de dreches mas estima n'aver pas cap de devers.
ResponEliminaUna ist`pria (benalèia, nhòrla…) de quand èri al licèu :
A un escolan que fasiá lo piòt e que quitava pas de barjavar amb los vesins, lo professor de francés diguèt : « Jacques, prenez la porte ! »
Lo tipe se levèt, anèt a la pòrta e comencèt de la desgonfnar. E lo professor de dire : « Mas de que fasètz ? »
L'escolan respondèt :
« M'avètz demandar de prene la pòrta ; o fau ! »
Bon, ieu fau pas ensenhaire mai te pòdi dire que i a quicòm un pauc coma aquò, qu'es tarrible : quand ta filha qu'a pas que 4 ans te puja, te puja, que vòl aquò, e pas aquò e iiiiiiii ! e que tu a la fin te botas a bramar coma un colhon d'ase, qu'aprèp te sentisses una brava mèrda. E d'aquela passa, la pepeta aquò m'o fa cada matin. Mas la diferéncia amb ton fotaire de mèrda, es que ieu, quand la crisi es acabada, ai drech a mon poton. Aaa !...
ResponEliminaPer èsser sortit mai d'un còp , te pòdi dire que conflave sèc, mas sens malvolença , qu'èri colhandrut e jove e seguissiai la mia dralha, mentre que lo professor s'imaginava de far quicòm mai. Èra caput com'un miòl lo tipe , que volontava de nos ensenhar quicòm.Quna idèa! Bon per dire . M'empachèt pas de venir ase e ela d'èsser urosa de me veire trobar la meuna plaça . D'aquel temps timplavan per de ren , mas te fasian mal . Un ren qu'a l'ostal te tombava l'aurassa.
ResponEliminaE de tot biais me'n soveni pas mai.
Consi alara aprendre quicòm? Sens memòria?
Doncas pas de regrèt Melania buta ambe un diccionari per pas daissar de traças ...(Coluche) Mas lo butatz pas dins lo corredor que podrià trapar la crèba.
Jo, èi tant pauc de monde aus cors per adults qu'ensaji de har dintrar los que foten lo oai davant la pòrta...
ResponEliminamostrar los limits fa partida tanben de l' educacion. N' ia qu' an besonh de las palpar e que te demandan de las monstrar e de las faire respectar. As jogat ton ròtle, t'o demandava o as fach. Ara, a tu de li faire comprene qu' es colhon que cal pas tornar faire perque perd son temps (e lo teu)e qu' a la fac totes comprenon que i son per trabalhar amassa amb tot lo mond.
ResponEliminaBenlèu, li podrias demandar de s' excusar lo còp que ven d' aver desstorbar lo debanament d' un cors.
De causa a dire??... Cal mai de profesora coma TU ! E alara benlèu lo mond tornarà mai rond !
ResponEliminaAprèp sias pas una Jana d'Arc de l'occitan! Fas ton posible e aquò es ja fòrça important! Es la pròva de ton afeccion pel mestièr, e tos estudians!!!!
Una Melania naciaonala sias !
Falhòta, Borriqueta e Arm : Mercéeeeeeeeeeeeessss :)))))))
ResponEliminaK : urosament que i siás per dire de causas intelligentas! :D
Laurenç : los enfants, es lo mal.
L'arbitre non pòt pas pèrder, mes totun que hè part deu jòc...
ResponEliminaDèisha de't pausar questions, còps que i a, que pòt har deu ben !
N'ei pas atu, mes lhèu ad eth de se'n pausar : las bonas, e abans que non sia tròp tard...