Total Merdum a Mesa

Dissabte, èri a Mesa per jogar de musica a l'escasença dau grand Total Festum organizat per la Region.

Quauques explicas per lo mond qu'an pas l'astre de viure en Lengadòc-Rosselhon : Total Festum es una manifestacion culturalo-festiva que se debana entre debuta de junh e la Sant-Joan organizada per la Region per... per... per qué? I vau soscar. 

Son las associacions qu'organizan las jornadas o seradas Total Festum e la Region subvenciona. Aquò a de succès, o pas. 

E lo 16 de Junh es la jornada organizada per la Region que paga lo bus a totas las associacions qu'organizan un Total Festum per que vengan tota la jornada. Òc, aital, aquò fa de public. Es la jornada-reclama megamodèl amb ton camisòt de la region, ton pin's de la region, brèu chucas la Region d'a fons. Aquò's la règla dau jòc, l'acceptam o jogam pas.  

Aquela jornada del 16 de Junh èra pas completament desagradiva, anèssetz pas pensar que soi negativa del tot. 

Mas, de còps que i a, me demandi de qu'an dins lo cap los qu'organisèron aquò! Pichòta tièra de las causas que trucan e que, amb un bocinon de cervèlas, se poirián evitar : 

- centrar las causas sul solet luòc de Mesa ont i a pas un pet d'ombra un dissabte d'estiu a 30º.

- pas donar de qué beure al mond venguts far l'espectacle. A ben oè, arribas a 2h30, en plen calimàs, jògas, caminas e te deves crompar ta beguda. Dins totes los festenals pichonèls, amb d'associacions pichonèlas, i a quauqu'un que s'ocupa de t'abeurar regularament. La Region se pensa que lo mond son de camèls? 

- lo grop de la serada fa las balanças davant lo mond que comença de sopar. Ah ah ah. Ont s'a vist aquò?

- just abans las balanças, la musica difusida per los nauts-parlaires subrepotents èra Rage Againt The Machine. Ieu me'n cagui, aquela musica m'agrada fòrça. Mas i a pas quauqu'un de la Region per dire "mmmm, benlèu seriá melhor de passar un disc de musica occitana?"

- aquò se voliá una jornada "bèla". Un passa-carrièras amb un parelh d'animals totemics, un parelh de chivalets e un parelh de gigants. Es aquò l'ambicion de la region per sa jornada "bèla"? La Fièra Lengadociana de Lopian, sens cap reclama e segurament amb un budgècte plan inferior, capita de recampar al mens quinze animals totemics e sai pas quantes milierats de personas que los venon veire.

- Lengadòc-Rosselhon. S'aquela jornada se vòl la veirina del Total Festum, i deuriá aver un pauc mai de representants de la region dins son entièr. Urosament que i aviá la valenta e subresimpatica Colla Gegantera d'Elna per representar la cultura catalana.

- l'animator. Ah ah ah. L'animacion èra assegurada per un camion Midi Libre. Lo tipe èra un parla-ponchut qu'èra pas completament al fial de las causas : prononciava cossí que siá "Festum", "castanha" e "mauresca" e quand li anèri dire, plan aimablament e risolet als pòts, cossí se prononciava, m'agachèt genre "Siula, siula!". Coma partiguèri jogar, poguèri pas verificar se corregiguèt sa prononciacion aprèp mon intervencion. Lo grand moment foguèt l'arribada del passa-carrièras : quand veguèt los gigants catalans, demorèt coma un bedigàs a pas saber de qué dire perque sabiá pas de qu'èra. Pas un mot d'occitan ni de catalan dins tota l'animacion, pas besonh d'o dire, o aviatz comprés. Sabi pas s'es la fauta del tipe qu'aviá pas fach lo trabalh de preparacion per l'animacion e s'es la fauta de la Region que l'an pas coachat per li indicar çò que li caliá faire tota la jornada mas èra VERGONHÓS!




M'enràbia. 


Urosament que i crosèri un polit nòrd-catalan plan simpatic :))))