dimarts, 26 de març de 2013

TESTejar

L'autre jorn anèri a la facultat de letras per una serada organizada pels estudiants del Medòc. 
Èra un concèrt de Christian Almerge, sabètz "Test".
Test, los aviái pas jamai vistes en concèrt, ai pas los CDs, ai pas telecargats illegament los MP3, mas coneissiái, que Test es ma magdalena de quand agachavi Viure al País quand èri adolescenta que metián de clips de Test a la fin e amb lo paire, aquò nos fasiá rire.


E l'autre dimars, a la facultat de Montpelhièr, me re-ga-lè-ri! Èra un ambient intim e ròck'n'ròll. La sala de la facultat, i a pas d'empont, enfin si, i a un empontet de quinze centimètres, aquò fa que lo public es tot pròche del grop e lo grop es dins lo public, o lo public dins lo grop, una proximitat amistosa que, o cal plan dire, es tras que simpatic lo Cristian Almerge e sos musicaires tanben! I aviá pas gaire de monde, un trentenat o quarantenat de personas, mas de mond que coneissián lo "repertòri", lo fan club de Test se volètz e eriam totes d'a fons. Passèri una serada excellenta e passèri la setmana a cantar "Pren un formatge e un crostet / Un pauc de vin dins ton pichon panièr / Mas atencion de pas trapar lo lop / Tanlèu qu'arribaràs a destinaciooooooon"



A despart de cantar los tubs I Love Cagaròls, Massey Ferguson, E ieu e ieu ieu, a me'n petar la votz, riguèri plan. Quina autoderision que t'an, fa de ben de veire de mond coma aquò.




Massilia Sound System, los Fabulous Trobadors, La Talvera, Nadau, Claudi Martí, Mans de Breish, e ara Test, vaquí, me sembla qu'ai vist totes los grops mitics occitans. Ara, pòdi morir.

Bon avètz comprés, soi super fan.
E n'i aviá de supersuper fans! D'unas se faguèron far d'autografs sus las popas: 
e ieu faguèri la fòto de pès :

e per far biscar totes los fans, capitèri de raubar lo plectre del sénher Almerge




(ò! lo Benazet Ros tot jovenòt!!!)


Granmercés al lobby audenc del Medòc per l'organizacion de la serada!

3 comentaris:

Quequejaire ha dit...

As vist los Hardidets de Maseròlas au mensh ?

Mirelha ha dit...

Los CDs que te mancan se pòdon crompar (legalament) al cercle occitan de Carcassona ! Potons.

Mela ha dit...

quequejaire: los Qué?

Mirelha : o nòti ! (mas ai pas besonh de l'integrala tanpauc...)