Harry Potter e la pèira filosofau

Ai acabat Harry Potter e la Pèira Filosofau. L'aviái ja legit en catalan fa plan de temps, e aquí, l'ai legit en occitan e me soi regalada :). Espèri de poder legir los autres tòms lèu-lèu!

La debuta, sonque per vos far biscar:

Capítol Un - Lo nin que subrevivó

Sénher e Dauna Dursley qui demoravan au 4, Privet Drive, qu'èran gloriós de's díser perfèitament normaus, Diu mercés. Qu'èran las darrèras personas qui podossin imaginar de trobar implicadas en quauquarren d'estranh o de misteriós, pr'amor non suportavan pas las farlabicas. 

En Dursley que gavidavan la Grunnings, ua enterpresa qui fabricava taravèras. Qu'èra un òmi gran e bèth, qui n'avèva quasi pas nat còth, mes qui portava mostachassas de las bèras. Na Dursley qu'èra prima e blonda e qu'avèva un còth dus còps mei long que la mejana, çò qui èra hòrt utile puishque passava la màger part deu temps a espionar en çò deus vesins, per dessús deu plèish. Los Dursleys qu'avèvan un hilhòt nomat Dudley qui, a'us escotar, èra lo mei beròi nin deu monde. 

Los Dursley qu'avèvan tot çò que volèvan mes qu'avèvan tanben un secret, e çò que cranhèvan mei qu'èra qu'estossi descobert. Que credèvan que non poirén suportar que quauqu'un e s'assabentèssi de l'existéncia deus Potters.

E un extrach per dire òsca a la reviraira:

- Plan ce digó. Qu'i a ua lista de tot çò qu'as besonh.

Harry que despleguè ua dusau huelha de papèr qui n'avèva pas notat la velha.

ESCÒLA HOGWARTS DE BROISHAMI E DE MAGIA

- Unifòrme

Los estudiants de purmèra annada qu'auràn besonh:

- tres raubas de tribalh unidas (negras);

- un capèth ponchut unit (negre) tà tot dia;

- un par de guants protectors (pèth de dragon o equivalent);

- ua capa d'ivèrn (negra dab estacas d'argent)

Que'vs brembi totas pelhas qu'an d'estar mercadas dab lo nom de l'escolan.

LIBES

Cada estudiant qu'averà d'aver un exemplar deus libes seguents:

- Iniciacion aus broishamis (nivèu 1) de Miranda Hauconeta;

- Istòria de la magia, de Batilda Torndessac;

- Teoria de la magia, d'Adaltbèrt Farlabicon

- Manuau de de metamorfòsi entaus començants d'Emeric K Cambiat. 
(...)

E ben o vos vau pas tot marcar :))) 

M'an agradat tanben los noms dels ostals dels escolans d'Hogwarts... mas vos daissi anar descubrir tot aquò. 


Podètz crompar lo libre sul sit de son editor, Per Noste.