dijous, 26 de maig del 2011

Cabòries, Allucinacions, Occitanisme e Conariás

Dimenge, aquò èra las eleccions en Espanha.
Paco Boya, lo polit Sindic d'Aran, a perdut. 
Èri plan decebuda e un pauc suspresa d'aquela resulta que me semblava que lo tipe trabalhava bravament per son país.
I soi pas en Aran, i soi anada pas qu'un parelh de còps e i demorèri pas gaire mas, dempuèi mon recanton del País Bassòl, me semblava que la còla del govèrn de Paco Boya fasiá un trabalh bèl a totes los nivèls, tan socials o economics coma linguistics e culturals. 
Mas los Araneses an votat pels autres.  Me sembla que Unitat d'Aran an pagada la factura del PSOE de Zapatero... Rai.
Ai legit aquí que Paco Boya èra Sindic dempuèi quatre ans, pas mai. Es estranh, aviái l'impression qu'èra aquí dempuèi totjorn Abans l'arribada de Paco Boya al govèrn, sabiái pas qu'aquò existissiá la Val d'Aran. Sabi pas s'es perque en quatre ans desvolopèron las relacions panoccitanas o s'aquò's ieu que m'i interèssi mai. Opti per la primièra opcion.

Mas lo pòst d'uèi es pas per lamentar la desfacha de Paco Boya (e la lamenti!).

Lo pòst d'uèi es per parlar del comunicat vergonhós del CAOC. Aquí l'avètz:
Cars amics occitans,

Ièr i aguèt un càmbiament fòrça important a la Val d'Aran en l'escasença de las eleccions municipalas e del Conselh Generau. Ara lo novèl Sindic es Carles Barrera.

Amb Paco Boya s'acaba la demagogia, la megalomania e lo secessionisme e las malas relacions entre lo Conselh Generau e la Generalitat e las pus marridas relacions entre lo Conselh Generau e lo CAOC.

L'obstruccionisme e la tergiversacion de la Lei de l'Occitan s'es acabat.

Ara comença una novèla etapa de relacions occitano-catalanas de la Generalitat, del CAOC e del Conselh Generau d'Aran amb una tòca mai clara de trabalhar per l'unitat de la lenga e la cultura occitana, que pels catalans fa partida fòrça importanta del nòstre patrimòni cultural e lingüistic.

Tot çò qu'èra arrestat, ara se metrà en marcha, e sonque pòt s'alentir per la crisi o per la manca de sòus, mas lo procès a començat e degun l'arrestarà.

Lo CAOC es fòrça content perqué lo trabalh da 40 ans a estat pas en de badas e ara trabalharà amb mai de mejans oficials.

Coralament,
Enric Garriga Trullols
President CAOC

CAOC - Cercle d'Agermanament Occitano Català
Hotel d'Entitats. Providència, 42
08024 BARCELONA
Telf. 93.284.36.34
www.caoc.cat
Primièr chòc: Cossí es possible d'emplegar de mots d'aquela violéncia e de las connotacions mai que dobtosas? De qu'es aquela difamacion vergonhosa un endeman d'eleccions?
Segond chòc: Cossí se pòt permetre que lo president d'una associacion, al nom de son associacion, se pausicione tan clarament politicament? Foguèsse sòcia del CAOC, e ben, ne seriái pas gaire orgulhosa de n'èsser e demandariái lèu fach la demission del president. 
Tresen chòc: "descarats"! Sabi pas s'es de cinisme, de senilitat o quicòm pièger. Mas cossí se pòt èsser tan "descarat"?

Una error de comunicacion? Qué nani! I a lo segond capitol aquí.

Al-lu-ci-ni. 

M'anatz dire de pas metre mon nas dins los afars catalans, dins lors istòrias politicopoliticianas, mas aquí, lo President del CAOC a passat l'òsca. 

Sénher Garriga Trullols, "amics occitans", "agermanament occitanocatalan", n'ai bravament, de dobtes, sus aqueles tèrmes, quand vos legissi. Val mai aver d'enemics que non pas d'amics coma vos.
 
Un detalhon mai : aprèp "quaranta ans de trabalh", seriá temps d'escriure un lengadocian corrècte.

E enfin, quaranta-ans-relacions-occitan-patin-cofin, sabètz de qué caup dins lo mot "cobeitat"?
Agachatz-vos.



8 comentaris:

  1. Ieu fa un bèl briu que n'ai pron del Sénher Garriga Trullols, reaccionari e ultracatolic.

    ResponElimina
  2. O_O Alucini ieu tanben. En Paco Boya secessionista? Quand aguèri l'escasença de parlar amb el e l'escotar (al CAT, remembras?) M'emportèri una image fòrça mai bona que la que lo senhor Garriga a.

    Demagogia e populisme!


    http://www.youtube.com/watch?v=uoneLvl3mYI&feature=related

    ResponElimina
  3. Ua letra francaments lamentabla que demane rectificacion. Eth CAOC aurie de felicitar eth nau govèrn; e se non vò cap arregraïr era gestion deth govèrn que ges, en tot cas exprimir eth desir d'ua bona gestion deth govèrn nau. Exprimir es fòbies politiques personaus en nòm d'ua entitat non hè cap de favor ath CAOC e mens encara as catalans que trabalham pera lengua occitana e peth país.

    ResponElimina
  4. Soi completament d'acòrdi amb ton tèxt e amb los comentaris de Jordi e de Farri. Bon, mas lo coneissèm, l'Enric. E soi pas convençut que ne cal far grand cas, en realitat.

    ResponElimina
  5. Jdp: l'edat o pòt pas excusar tot. Puèi coma o ditz Farri, aquò demanda rectificacion. I a pas un burèu-una junta- al CAOC per pensar qu'aquel comunicat es vergonhós e doncas prene las decisions necessàrias?

    Farri: me sembla que i a moment que lo mond fan la diferéncia entre lo CAOCTrullols e los catalans occitanofils o occitanofòns.

    ResponElimina
  6. Òc, los qui vòlen impausar un occitan estandard dab ua vision de la Catalunya com motor lingüistic de l'Occitania.

    Duas letras atau mei, e jo, que'vs preni la carta a l'Enstitut Biarnés é Gascoû !!!!

    ResponElimina
  7. Ieu maitot allucini a legir quela conaria ! Bon, me sembla logic que los aranés aian votat CDA, los catalans en generau avian votat CiU per las autonomas. Emai Carlos Barrera farà benleu dau bon trabalh per l'occitan, veiram ben. Mas tot-parier, se fai pas d'escupir entau sus un òme, quitament si a pas las mesmas idéias politicas ! E enquera mens au nom d'una associacion d'afrairament !

    Per info, me sembla que lo sindic davant Paco era... Carlos Barrera !

    ResponElimina
  8. Oc, Barrera, sabèm pas grand causa d'el, levat que foguèt lo sindic d'Aran pendent un fum d'annadas, just abans Paco. Ça que la, pas degun lo coneis au Barrera, per dire l'impacte qu'aguèt en çò nòstre lo Conselh Generau d'Aran de l'èra d'abans Paco!
    Esperem que Barrera farà de bon trabalh per l'occitan...
    E ieu espèri que Paco tornarà far bramar lo topin amb sa banda e qu'aurem l'escasença de los escotar!

    ResponElimina

Mercé :)