dilluns, 15 de febrer de 2016

Tròç de vida 008

A lo pel frisat e una pichòta cinquantena.
Soritz.
Lo prenèm a Castras, a la gara rotièra. 
Lo cargament de l'auto l'espauruga un pauc. Fisançosa, li disi que risca pas res, tot es plan cunhat, aurà pron de plaça e i a tanben de plaça per sa saca. 
Li explicam que montam a un festenal a Rodés e qu'ai l'estand d'una associacion mas que tendrai lo talhièr d'una autra associacion. Compren pas tot, mas se'n caga, es tan content d'aver trobat una veitura que fa aquel trajècte.
Sembla que se vòles far Castras-Rodés en tren, te cal d'oradas e d'oradas e còsta un ren. Mentre qu'amb ieu, li còsta 5€, viatja amb la crema del femelum d'Occitània (qual a rigut?), i serà lèu lèu, rai, la veitura es cargada coma s'anessiam prene lo Marrackech a Seta, mas li pausa pas problèma.
Es referent tecnician a EDF, nos explica de causas interessantas qu'ai oblidadas. Benlèu èran pas tant interessantas qu'aquò.

Es dels òmes que m'agradan. Ai una teoria : los òmes son a son apogèu entre 48 e 52 ans. 
Abans son d'adolescentasses que pudisson dels pès, aprèp son de vièlhs que sentisson a pissa. Es una forqueta corteta qu'explica benlèu la colleccion de neoquinquagenaris dins mon tablèu de caça. Rai! 

De qué i va brandar a Rodés? 

Cal totjorn pausar de questions. Aquel tipe tant agradiu es benlèu celibatari, veuse o divorciat. 

Va quèrre l'auto que li crompa a son dròlle. 
E aquí lo paire nos parla de son enfant. 
Sa sexitud ven de perdre 150 punts. 
Parla del modèl de la veitura. 
Sa sexitud ven mai de perdre 150 punts. 
Li crompa una Gòlf. Lo segond modèl. Lo melhor.
Aquò li fa pas ganhar de punts. 

Lo daissi pròche de la gara de Rodés sens saber s'es disponible ni quant de temps li demòra abans los 52. 

3 comentaris:

rapieta ha dit...

Me fau eïperar 3 ans de mai aüei per que poguessem manhar lu varruelh de St Liunard tots dos.

Mela ha dit...

Bon anniversari l'òme ! :) :) :)

Per çò qu'es de l'espèra, tot es negociable... Mas cresiái que caçaviam los meteisses... :D

賈尼 ha dit...

los òmes son a son apogèu entre 48 e 52 ans
Mercés a ton blòg me suicidarai pas dins un mes.