dimarts, 28 de desembre de 2010

3615 Ula

Mos vesins an una amiga que per servar son anonimat l'apelarem Ula perque dins la vida vertadièra a ja un nom de puta russa.

Ula, la coneguèri que pesava 150 kgs, èra omosexuala e se faguèt far un pichon per un espermatozoïd anonim.
Ula se faguèt copar l'estomac.
Ara, pesa 55 kgs.
E ara, a un tipe.

Dempuèi qu'es linja l'Ula, es urosa, es polida, a un amorós.
E son amorós es brave. Es generós e l'aima. 
E per Nadal, l'amorós d'Ula li faguèt un polit present. 
"un polit present", dins l'esperit d'una femna, akò vòl dire un present "car", una causa que còsta de sòus. Sas, la causa qu'auriás pogut cambiar l'autò o partir en vacanças a la plaça. Es sovent un present car E inutil.
Lo polit present que li faguèt a Ula l'amorós: un reloquing especial en cò d'un reloquingaire professional.

Ula i passèt la jornada (o una setmana, l'istòria o ditz pas).



Puèi metèt las fòtos sus Fèçabòc.

Çò bon amb Fèçabòc, es qu'aprèp, lo mond comentan las fòtos tota la serada uhuhuhu.

E aquí, molonada de comentaris amistoses:
"raaaaaaaaa, siás over poliiiiiiiiiiiiiiiiiiiiiiida".
Mas Lengadepelha nº1 telefona a LengadePelhanº2:
- e te telefoni qu'anarà mai lèu que pel tchat de Fèçabòc. As vist aquò?!?!
- oè.
- non, mas sembla una puta sortida d'un manga!!!
- oè! lòl.

E Lengasdepelha son pas conas, mancan pas de bon sens:
- E mai, de tot biais, lo tipe, se li paga un reloquing a Ula, es que li agrada pas coma es ara. Se t'agrada ta femna, li fas pas faire un reloquing, me vas pas dire òu!
- Oè. E ben ieu la trobavi mai polida amb sos 150 kgs.
- Non, passes pas l'òsca tanpauc. Mas aquí, coma èra abans , la setmana passada, aquel cairat e aquel tòp, èra tras que polida. 
- E creses qu'a pagat car?
- E ben, te cresi! èra marcat "reloquingaire professional".
- E ben , per li cambiar lo loc, li a cambiat lo loc. Te la crosi dins la carrièra, li fariái pas lo poton!
- E creses que vendrà dimenge? 
- E ben sai pas. La podèm metre sul trepador!

Escotavi las Lengasdepelha.
E demandèri de veire la fòto, pardí! 
E veguèri la fòto. 
A ben òc, aquò n'es un de cambi, ò fant!, nòstra Ula qu'èra una dròlla normalòta, naturala, sembla ara una kagòla de luxe.

E ben, l'Ula m'interròga.
Son operacion li cambièt la vida.
E benlèu qu'ara vòl contunhar de cambiar, vòl contunhar d'agradar,vòl contunhar de sedusir. E benlèu qu'aquel reloquing, li demandèt a son amorós de ne li far present. Benlèu sabiá que sola capitariá pas  jamai de se metre de pinturas sus la cara, las parpelas e los pòts, de cargar una faudeta corteta e de metre de talons d'agulha e qu'aviá besonh per aquò far d'un tipe que la coneis pas, qu'a un agach exterior e que li dirà "vaizi, siás polida, kagoleja fòrt se n'as enveja!".
E Lenga de Pelha 1 e 2, sas amigas, que l'aiman, se rebifan "a mas non, aquò's pas ela!". 
Ben si, benlèu aquela cagòla de luxe que vesètz aquò's Ula. benlèu que n'a enveja de semblar a aquò. E s'es anada veire un reloquingaire professional, es per sortir de l'imatge que rabala dempuèi totjorn.

E lo podèm cambiar l'imatge qu'an los autres de nosautres? Quand tu càmbias al dintre de tu e en defòra tanben, te veses parièr? E los autres, cossí càmbian cap a tu? Tos amics lo pòdon aceptar ton cambiament?

Paura Ula, 60 kgs de perduts, mas es pas ganhat.


5 comentaris:

Cercaval ha dit...

Pòt èsser dangierós de cambiar de cara. Ne vaquí un exemple.
Grèvament malauta una femna madura se tròba a l’espital. Sus la taula d’operacion, se pensa pròcha de la fin e vei Dieu en aparicion. I demanda :
- Es arribada l’ora ?
E Dieu respond :
- Non, te demòra encara trenta cinc ans, sèt meses e dotze jorns.
Alavetz, al despertar, decidís doncas de demandar una lipò-sucion, retocar la cara, adobar las popas, etc. qu’ara, aquò val la pena.
Tot aquò petaçat, sortís de l’espital. Mas en traversant la carrièra se fa espotir per un camionàs.
Arribada davant Dieu, demanda :
- Me sembla que debiái viure encara mai de trenta annadas ? Per de qué m’avètz pas esparnhat aqueste auvari de camion ?
E Dieu moquet i fa :
- Me damne ! T’aviái pas reconeguda ! »

Digó János ha dit...

@Cercaval: Ha ha fantastica, aquela :D

Comitat de censura ha dit...

150kg-60kg=55kg
Mararèl, sias pas professora de matematicas tu !

Patricia ha dit...

Ieu disi que la vida es pas aisida per degús, que degús es pas dins lo cap de quauqu'un mai e que doncas cadun fa un pauc coma lo sentís. E las errors fan avançar. :)

kkj ha dit...

A 150kg o a 55kg, jo, que crei que deu chucar tostemps de la medisha faiçon, non ?
On ei lo cambi ?