Cronica d'un dimenge a Seta

Doas referéncias al darrièr disc de Mauresca Fracas Dub son amagadas dins lo pòst. Quinas?

Aprèp de setmanas d'ivernacion, me fotèri un brave còp de pè al cuol e enfin sortiguèri de ma tuta naut-debit. Dimenge, anèri a Seta per veire las mòstras fotograficas d'Images Singulières que n'èra lo darrièr jorn e aquò m'emmerdava de mancar aquò, que l'an passat m'aviá agradat fòrça. 

Anèri a l'ancian collègi Victor Hugo, sèti de la causa, per aver lo programa amb la mapa e la presentacion de cada mòstra. Aquí, una granda fòla un tipe m'aculhiguèt e m'expliquèt una molonada de causas suls artistas, lo tipe faguèt mai que plan son trabalh, èra fòrça interessant e me parlèt mai que mai d'un collectiu fotografic, Tendance Floue. Anatz veire coma ai plan escotat!

Aquel collectiu, una de sas activitats es de far de "residéncias instantanèas", es a dire que van endacòm en se dire "i demoram tant de temps", la tòca es que, a la fin del temps, devon publicar un libre sus l'endrech. Faguèron aquò en Índia e en China ont partiguèron tres setmanas, tres setmanas per descubrir, fotografiar e, a la fin de las tres setmanas, aver lo libre de publicat.

Lo concèpte m'agrada grèu. Aquò s'apèla "mad in...", "mad in India", "mad in China". E sabètz qué? La tresena tapa dels cabords es... Seta! E ben ieu aquò m'agrada que Seta siaga vista coma una causa tan granda e tant exotica coma Índia. Ai doncas comandat lo libre "mad'in Seta" :) e languissi de lo recebre.Dins la cort del collègi, podiam veire d'unas fòtos de las que seràn dins lo libre...

E aquel tèxt chucós :

 (clicatz sus la fòto per poder legir)

Lo tipe de l'acuèlh aprèp m'aver presentat Tendance Floue, me parlèt del fotograf convidat. Cada annada, lo festenal convida en residéncia un fotograf que deu far de fòtos de Seta per ne far un libre que se vend sul festenal. Ongan, aquò èra Juan Manuel Castro Prieto que sas fòtos èran expausadas dins la capèla roots del Quartièr Naut. Me dison dins l'aurelheta que lo libre es totjorn a rabalar dins l'auto.

Fotografièt mai que mai los artistas setòris, la Poncha, l'estanh e ben, anatz agachar! L'aficha del festenal es una fòto sieuna :)









Aquò foguèt l'escasença de passejar dins la ciutat, e aquò, fasiá de temps qu'o aviái pas fach, e èri plan contenta...

Aprèp la Capèla Roots del Quartièr Naut - son nom vertadièr es "chapelle du quartier haut", sant Quartièr Naut, pregatz per nosautres -, anèri cap al Teatre de la Mar - son nom vertadièr es "Theatre Jean Vilar" que Jean Vilar es dins lo cementèri marin juste darrièr, mas tot lo mond ditz "Teatre de la Mar".I aviá de fòtos sus Turquia que m'estrambordèron pas.

D'aquí partiguèri al Decòr, un restaurant que m'agradariá d'i manjar, ont i aviá una mòstra sus la Mar Negra. 

Puèi, dins mon auto supersonica, partiguèri a la dintrada de Seta, long del canal, veire la mòstra gròssa que voliái veire. 

Esperatz, vos expliqui. 

Lo tipe de l'acuèlh m'aviá dich que long del canal, i avia las fòtos mai duras del festenal : sus la mafia e tanben "sur l'onanisme". L'an passat, i aviá una mòstra suls transsexuals, ongan, sus la sèga, ma fista, me geinava pas, al bèl contrari.

Anèri primièr veire la Mòstra sus la Mafia dins los Chais Moulin, una mòstra collectiva sus mai d'una mafia dins lo monde. N'esperavi fòrça que lo tèma m'interèssa e pòt donar de fotografias polidas. Los Chais Moulin son en òbras, m'agradèt fòrça coma organizèron l'espaci : es un espaci bèl e vuèg, i metèron de contenedors e dins cada contenedor i aviá una projeccion e lo mond serpentejavan entre los contenedors. LA bona idèa del festenal.

Aprèp, las fòtos, m'agrada pas de las veire en projeccion, m'agrada de las veire penjadas a una paret... Aquò fa que, fin finala, e ben las veguèri pas totas aquelas fòtos de la mafia, me passegèri entre los contenedors mas pas mai, tot en me dire "quina bona idèa".

Fin finala, de totas aquelas fotografias, aguèri pas de còp de còr coma l'an passat, foguèri pas estrambordada per çò que veguèri, mas soi contenta d'i èsser anada e!, e  finalament, çò que m'agradèt lo mai es cossí organizèron los diferents espacis ocupats : sala normala, capèla, restaurant, chais, entrepresas...

Als Chais Skalli tanben i aviá de mòstras de fòtos. Coma l'an passat, m'agradèt de veire las rèstas de l'activitat economica aculhir de mòstras. E l'odor de vin que persistís totjorn. Aquò m'esmòu. Oè, es un pauc ma tissa del moment "de-qué-fasèm-de-nòstre-patrimòni-bastit-que-nos-servís-pas-pus?".

Es çò meme per AgroCanet, totjorn long del Canal, ont metèron de mòstras sul bolodròme de l'anciana societat e una projeccion entre las tinas :)

E la mòstra "sur l'onanisme" que voliái veire?
E ben, foguèri ben decebuda quand veguèri de retraches de nans.


Partiguèri d'aquí en me rire de mon aurelha qu'ausís çò que vòl e anèri a las ajustas al primièr torneg de la sason.

Las ajustas, aquò's lo tòp-depart de l'estiu que te fa agachar lo calendièr per verificar quora seràs en vacanças.

agachatz lo camisòt del jove al primièr plan :)))

L'escasença de se remembrar que las ajustas, aquò se comença jove...

E mai que mai l'escasença de veire Lo Mèstre e lo Pichòt :) :

E ben sabètz qué?

Foguèt una jornada plan bona :)