dimarts, 6 de març de 2012

Alegria

La Marieta e lo Pèire de la Sauma me fan totjorn de presents estranhs, totjorn made in Mallorca.  Per far passar l'estranhesa del present, l'acompanhan totjorn d'una sobrassada de l'ostal (foguèron diplomatas dins una vida anteriora).
Brèu.
Per Cap d'An, venguèron a Caramauç. En mai de diplomatas, an lo sens del sacrifici. Francament, quants de vosautres serián partits de Mallorca per passar tres jorns de vacanças a Ca-ra-mauç? E jos la pluèja en mai d'aquò. Blaye-les-mines jos la pluèja, o vos disi, aquò fa somiar, mai que mai amb los lums de "joyeuses fêtes".
E me portèron de presents! De libres en malhorquin que te cal èsser cencha negra ochen dan en catalan per los comprene. E un CD. 
Un CD... malhorquin, of course! 
Un CD ròse titolat El Pop d'Antònia Font - Versions Halògenes. Ieu tanpauc compreni pas lo títol, don't worry, te vau explicar. Antònia Font es pas lo nom de la mameta de la placeta, non, es lo nom d'un grop malhorquin subreconegut que se i aguèsse l'equivalent dels Inrocks a Malhòrca, Antònia Font ne farián la Una cada setmana.  (se'n parlèt ja aquí...)
Bon, e ben, lo CD, es un "tribute to" : de grops cantan las cançons d'Antònia Font a sa mòda, çò que fa que i a de causas plan diferentas e es ben agradiu. 
E i a una cançon que m'agrada molt fòrça, que me bota de bona umor, que la meti quand ai enveja de cantar, es aquesta:


La pòdi escotar dètz còps seguits :D 
Lo primièr còp que l'ausiguèri, diguèri "ten, i a una cançon en anglés?, trobatz pas que fa un pauc cantaire american lo tipe? Lo tipe es lo cantaire malhorquin Tomeu Penya que ne vos parlarai segurament un jorn :)

E ara, la canti en version iaort. "Version Iaort" aquò vòl dire que coneisses la melodia e un pauc la sonoritat dels mots mas pas degun poiriá reconéisser las paraulas... ni benlèu la cançon.
M'agrada de cantar iaort.
Òc, o sabi, respecti pas res.

Puèi, en escriure aquel pòst, me disi que caldriá benlèu saber a qué sembla la version originala de la cançon. E ben, l'avètz çai sota, e jos titolada amb aquò. Me'n cagui, ieu contunharai de la cantar iaort.


M'agrada!

3 comentaris:

Anònim ha dit...

c 'est le western mallorcin, version 1

Galoneta ha dit...

Hey ! Benvengut dins lo fan club d'Antonia Font !!! (ne siai fan fan fan, coma diria una qu'a un blog !)

Mela ha dit...

A, tu tanben Galoneta?
E cantas en iaort tanben?

T'agrada la version de Tomeu Penya?