dijous, 10 de novembre de 2011

Cinèma jol plumon : Lo Cat del Rabbin



Lo Cat dau Rabbin, aqueste d'aquí de film l'agachèri perque m'escacalassèri quand legiguèri la benda dessenhada. 
La mesa en animacion es capitada, pas res de criticar mas ai totjorn de problèmas amb una causa : los personatges an pas la votz qu'avián dins mon cap  e me cal plan la mitat del film per m'acostumar a la votz causida pel realizator.
Es lo plaser de la lectura : s'imaginar las causas, ausir los personatges... E aprèp, al passatge al cinèma e ben, te cal aceptar las causidas d'un autre... 
Mas se vos parli del film, es pas per lo film en se  (que vos cal legir la BD abans!). Enfin, si, dos mots per dire que lo passatge ont rescòntran Tintin al Congò es juste genialissim, quin con aquel Tintin... e  veguèri Le Chat du Rabbin just abans de veire lo Tintin de Spielberg
La musica del film es just excellenta. Es çò que m'agradèt lo mai. Del còp, comprèri lo CD de la benda originala. E es normal que m'aguèsse agradat, es, entre autres, l'Amsterdam Klezmer Band que i jòga, e ieu lo klezmer, e ben aquò grèu m'agrada, e l'Amsterdam Klezmer Band, aguèri l'astre de los veire a Manresa l'an passat e me regalèri.
Mas s'avètz legit lo libre, m'anatz dire que l'istòria se passa en cò dels josieus arabs e que lo klezmer es benlèu una musica de josieus mas pas la musica dels josieus arabs, mas puslèu la dels josieus de l'Èst. E de qu'es la diferéncia entre un josieu arab e un josieu de l'Èst? Aisit! Lo josieu arab es un josieu que fa rire amb sas merguez e sas boletas que n'ausissèm parlar pels comics franceses, coma lo film La Vérité si je mens per exemple, e lo josieu de l'èst, es lo que fa plorar que lo vesèm dins los films lacrimogèns coma La Lista de Schindler.  
E perque an mes de klezmer dins lo film alara? E ben, perque lo klezmer, es bon! E puèi an l'excusa que dins l'istòria, arriba un josieu rus caçat pel comunisme. 
E fin finala, dins la benda originala del Cat dau Rabbin, trobam la musica klezmer amb de musica araba o la musica araba amb de klezmer, e francament, la resulta es adictiva!
Fa quatre jorns qu'ai lo CD e me'n lassi pas. 
Un parelh d'extraches : 



ligam dirècte

ligam dirècte



7 comentaris:

Anònim ha dit...

Seriá pas un pauc intellectuala, tu ? M'a calgut legir tres còp aver l'impression de comprene…

Mela ha dit...

raaaaaaaa :((((
ont es pas clar?

Anònim ha dit...

es que soi pas pro aluserpit…

Patricia ha dit...

Ieu, la BD m'agradèt pas brica. Fa qu'ai pas vist lo film.

Mela ha dit...

De que t'agradèt pas dins la bd?

Patricia ha dit...

Aime pas lo dessenh, ja e pièi ne disián talament de ben... Ne crompère doncas un album per me far la colleccion. Me soi arrestada al prumièr. Pas cap de plaser.

Tam ha dit...

ieu trobe qu'es biais nou de faire de BD. E ai totei leis albums! Me congostère de veire lo film.