dilluns, 14 de novembre de 2011

Cinèma sens pijama : Tintin

Coma l'Òmi de la fotografia, anèri veire lo Tintin de Spielberg que fa lo buzz : los que i son anats, los que i son pas anats, los que lor agrada, los que lor agrada pas, un pauc coma Avatar, qué. Qual se soven de l'istòria d'Avatar?  

M'agradèt lo Tintin de Spielberg? Òc, solide!
Mas m'agradèron pas las voses del doblatge francés ; caldriá veire en anglés o dins d'autras lengas çò que dona.
M'agradèt pas la cara de Tintin que sembla qu'a dètz ans. Steven, creses pas que, dempuèi lo temps, a quauques pels als alibòfis lo Tintin?
M'agradèron pas los uèlhs blaus de Tintin.
M'agradèt pas de pas rire amb l'alcoòl d'Haddòck. E puèi dins lo film, mon dieu qu'es plan educat. L'Haddòck que i aviá dins mon cap parlava mal e fòrt,  fasiá plan mai rire que lo de Spielberg.
Un còp que fas abstraccion de tot aquò, es plan :)


De legir sus la tela:
En francés :
- se volètz saber se Tintin es un film cripto-gay
- Tintin dins ton supermercat, dins ta banca, sus ta lèsca de cambajon
- perqué Tintin sortirà pas qu'a Nadal en los Estats Units?
- la critica de Bruno Podalydès

En espanhòl :
- perque soi pas la sola d'aver un problèma amb l'agach de Tintin
En portugués: 
- sus las qualitats moralas de Tintin uèi
En catalan: 
- un libre sus las paraulas finas del capitani Haddock



2 comentaris:

manjacostel ha dit...

curios , mas me donatz pas enveja d'o veire lo Tintin de Spielberg...
Quand èri jòve m'agradava mai los Pès Niquelats per exemple , mas qu'o legissiai lo Tintin , mas Tintin èra lo tipe del patronatge , dels curats , mentre que nosautres anavèm al Centre de las òbras laïcas . M'agradaven Kid Carson , David Crokett, Opalon Cassidy, Jeronimo,Pif ece ..
Cresi que lo monde èra different...

Anònim ha dit...

Vertat que las aventuras de Tintin èra los films fixes – los imatges dels albums sus una pellicula – que agachavèm al patronatge quand lo temps èra poirit e que podiam pas anar defòra per jogar.
Ne demòra pas mens qu'èra per nosautres un mejan de legir los dialògs mai o mens cadun son torn e atau d'aprene a legir a votz nauta en i metent la bona musica. E n'ai gardat un sovenir prigond.
Empacha pas que legissiái tanben l'illustrat « Tintin » en cò d'un amic que sos parents lo podèvan abonar. E n'ai passadas d'oras a o legir e o tornar legir – e los albums tanben – sens jamai me pausar la question – coma se fa a l'ora d'ara – de saber se Hergé èra un fascista, un pedofil o un omosexual. Pensi pas qu'aquò aja fach de ieu un sexo-pedo-ooo-ooo-fascista e qu'agi considerat los negres coma d'endarrierats o los Arabs coma de traficaires de aquic o d'esclaus o quicòm mai.
Cal dire que la vesina me donava tanben cada setmana l'illustrat « Coq Hardi » qu'èra – l'ai aprés longtemps après e ma prauba maire l'a pas jamai sauput, cresi – un illustrat del Partit comunista (o sostengut per el).
Èra una autra epòca mas me regali encara uèi de legir Tintin…